¹ DIOSONÜ jumaitsi Moisés jawabelia: "taema, JJanü ka notatsi be diosonü kuenia Faraón nejja. Aarón, ne juyapijinü, ne liwaisi pe jumaitsinü tsane. ² JJamü jumaitsimü tsane dajjita jjua ka itorobatsi ne jumaitsi nejja. Aaron, ne juyapijina, barü kuikuijai tsane Faraón pe kopatsi nejja piaja ira wekua Israel tomara pia jiwi. ³ Baitsi jane JJanü ajamatabü kuene taja ejjanaenajü Faraón y jjanü tsitajütsianajü tasaü, kaeto ata apo petae jawa Egipto nakuata. ⁴ Itsiata Faraón apo paka jumetae tsana, nejjata jjanü Egipto jawabelia nakobe buatsialiajû y jutsianajû taja wajabitsaüto, taja tomara, Israel pejji, Egipto piaja ira wekua pe ayai kueneta. ⁵ Egipciowi yapütaena JJanü DIOSONÜ kuenenü pakujinae takobe saü tsijopaenatsi y jutsianajû Israelitawi bajara pamonae jawerena." ^{6 7} Moisés yajawa Aarón itsi beje bajara pakuenia; pa jiwi beje itsi pakuenia DIOSONU itorobatsi. Moisés pe jjai naenüta ochenta (80) pa wai beje pakujinae barü kuikuijai beje Faraón. ⁸ DIOSONÜ jumaitsi Moisés yajawa Aarón jawabelia: ⁹ "Pakujinae Faraón paka jumaitsi beje tsane: 'Pa ne tsita itsimüre beje kaeto ata apo ta tae jawa', jjamü jumaitsimü tsane Aarón: 'Nija nae buatajara bare Faraón itabü nejewa, jomo pe naejjanae nejja.'" ¹⁰ Nejjata Moisés y Aarón lia beje Faraón jawabelia, pa jiwi beje itsi pe itorobi kueniatsi DIOSONÜ. Aarón buatajaraba piaja nae Faraón y piaja pieniwi itabü nejewa, jjuaje jomo naejjana. ¹¹ Bajara jjua kujinae, Faraón pijinia junata pia jiwi peyapütaewi y penajorobiwi. Pamonaeje itsi bajara pakuenia piaja jumalita. ¹² Kaenü kanakujitsia piaja naenü jebaraba, bajara ponaenü jomo naejjana. Baitsi jane Aarón piajanae kijoba pamonaeje piaja jomonü. ¹³ Faraón ajamatabü kuene taja y apo jume naükotsi, pe jumaitsi kuenia DIOSONÜ. ¹⁴ DIOSONÜ jumaitsi Moisés jawabelia: "Faraón raja ajamatabü kuene taja, bajaraponü apo kopatsi tsane pa jiwije. ¹⁵ Lia müre merawia Faraón wajabelia pakuejinae rekatsane menia bereka. Mene itapata nukaename ne kajjitajarabi nejja, koneba nopare pa naejawa naejjana jomo. ¹⁶ Jumaitsimüre bajara ponü: DIOSONÜ, Hebreowi piaja Dioso, ne itorobarena jjamü jawaberena kata jumaitsi nejja: 'Ponaya ejjanaename taja tomara, tane brüyatae nejja tajja majjü iratalia. Abajjü aekojjaeta jawalia jjamü apo jumetae jitsipaemü'. ¹⁷ DIOSONÜ jjua jumaitsije: 'JJua yabaraje yapütaename JJANÜ DIOSONÜ kuenenü. JJanü Nilo mene konita jjuabianajü takobena nukae naeta y pa meneje pe jana naejjanaena. ¹⁸ Dujai pa meneta pe jinawanapaewi tüpaena y mene tujjutsaebiana.Egipcio pia jiwi apo apae kapanepae tsane pa mene piaja mera.'" ¹⁹ Nejjata DIOSONÜ jumaitsi Moisés jawabelia: "JJua jumaitsimüre: 'Pire naebo kaita ropire Egipto meranü jawabelia, menianü, penajetonü, pekaetuatanubi jawanü y dajjita jawa tsajjuayo mera ena, piaja meranü pejana naejjanaejitsia. JJua itsimüre pe jana nejja dajjita Egipto nakua jawa, pijinia peyanubi jawanü naejawa e iboto wajjianü jawa ata:"' ²⁰ Moisés yajawa Aarón DIOSONÜ pe jumaiti kueniatsi ejjana beje. Aarón yota naebo y mene konitajjuaba, Faraón y piaja pieniwi itabü nejewa. Dajjita mene piaja ra pejana naejjana. ²¹ Dujuainüanü tüpa y mene tujjutsaeba. Egipciowi apo apae kapanepae mene piaja mera y pejana dajjita piaja Egipto iranü jawa. ²² Baitsi jane Egipto piaja jiwi peyapütae jawanüta itsi bajara pakuenia, bajara jjua yabara Faraón ajamatabü kuenesaü y apo jumetajitsipae Moisés y Aarón jawabelia, pe jumaitsi kuenia DIOSONÜ pe apojejai nejja. ²³ Nejjata, Faraón nawialia piaja bo yabelia. Bajara ponü jamata ejema. ²⁴ Dajjita Egipciowi mene itapaya kua mera pe ape nejja, tsipaji pamonaeje akuenebi pe apae jawa mene piaja ra. ²⁵ Siete pa matakabi beje kujinae DIOSONÜ pe bijianae jawa mera.