¹ Nejjata DIOSONÜ jumaitsi Moisés jawabelia: "Aekonojjae jjamü taename jjua JJanü itsinü tsane Faraón. JJamü taename jjuaje, tsipaji bajara ponü paka kopatsiana ta kobe saü yabara. Ta kobe saü yabara, bajara ponü paka jutajjuabiana piaja nakua wekua. ² DIOSO barü kuikuijai Moisés y jumaitsi: "JJanü raja DIOSONÜNÜ. ³ JJanü tsita naitajütajû Abraham, Isaac pijinia Jacob DIOSO dajjita pekapanepaenü kuenia; tsipaji tawünüta, DIOSONÜ, JJanü apo ne yapütae bajara pamonae. ⁴ JJanü ata pijinia najume liwaisi yapütaeya ejjanajû pamonaetaje, ta rautsi nejja Canaan nakua, pa ankuata sajitayawi kuenia jinawanapa, pa irata saya baja pamonae jinawanapa. ⁵ Pijinia, JJanü jumetaniji pe nuejawa israelitawi pamonae Egipciowi bitsó nakuenebia ejjana, najamatabüná pitajû jjua tajumaitsi jawa. ⁶ Nejjata; jumaitsimüre Israelitawi jawabelia: 'JJaü raja DIOSONÜ. JJanü paka jutsianatsi bitsó pa peka nakuenebia ejjanae jawerena Egipciowi, JJanü pe kobe jawerena paka jutsiarenatsi, JJanü paka yawenonaenatsi petae nejja ta saü, ⁷ JJanü taja jiwi kuenia JJanü jawaberena pa kajutsia renatsi, pa nija DIOSO nü tsane. Pajjamü pa yapütaename JJanü DIOSONÜ nü kuene pa nija Dioso, pa peka jutsinürena Egiptowi kobe jawerena. ⁸ JJanü paka kaponaerenatsi pa ira jumaitsinü ta rajutsi nejja Abraham, Isaac y Jacob. JJanü paka rajutsianatsi pa nija jawa nejja. JJanü raja DIOSONÜ. ⁹ Pakujinae Mosisés jumaitsi jjuaje Israelitawi jawabelia, pamonaeje apo jume jjaniajai tae bitsó pe bijiobia ejjanae jjaetsi penakuenebi jawata. ¹⁰ Bajara pakuenia DIOSONÜ Moisés jawabelia jumaitsi: ¹¹ "Liamüre y jumaitsimüre Faraón, Egipto piaja reinü, kopatsianame Israel pia jiwi nija nakua wekua." ¹² Moisés jumaitsi DIOSONÜ jawabelia: "Israelitawi apo nejume jjaniajaitae, ¿De juitsia Faraón ne jume jejai tsipae, ta nejume arübinü saya?" ¹³ DIOSONÜ Moisés y Aarón jawabelia barükuikuijai. Bajara ponü itoroba Israelitawi jawabelia yajawa Faraón, Egpto piaja reinü, pe jutsi nejja Egipto piaja ira wekua. ¹⁴ Pamonaeje piaja wiriawi kanakujitsia: Rubén pejji, matapijinü Israel pejjünato, Hanóc, Falú, Herón yajawa Carmi. Pamonaeje pejji Rubén. ¹⁵ Simeón pejji Jemuel, Jamin, Ohad, Jaquin, Zohar y Saúl, pejjünato Cananeawa. Pamonaeje pejji Simeón. ¹⁶ Jotaje wünü rubena Lewí pejji, pejji tsaponae yajawa. Pamoneje Gersón, Coat yajawa Merari. Lewí ciento treinta y cinco (135) pa wai beje jawabelia ponapona. ¹⁷ Gersón pejji Libni y Simei. ¹⁸ Coat pejji Amram, Izhar, Hebrón yajawa Uziel. Coat ciento treinta y tres (133) pa wai beje jawabelia ponapona. ¹⁹ Merari pejji Mahli, Musi. Pamonaeje piaja monae Lewí piaja wiriawi kanakujitsia, pejji yajawa tsaponae. ²⁰ Amram ukua Jocabed, pajja pejuyapijiwa. Bajara powa itajüta Aarón yajawa Moisés. Amram popona ciento treinta y siete (137) pa wai beje y tüpa. ²¹ Izhar pejji Coré, Nefeg yajawa Zicri. ²² Uziel pejji Misael, Elzafán yajawa Sitri. ²³ Aarón ukua Eliseba, Aminadab pejjünatoyo, Naasón pejuyapijiwa. Bajarapowa to itajüta Nadab, Abiú; Eleazar yajawa Itamar. ²⁴ Coré pejji Asir, Elcana yajawa Abiasaf. Pamonaeje piaja wiriawi Coreitawi. ²⁵ Eleazar, pejjünato Aarón, yajawünü ukua Futiel pejjünatoyo. Bajara powato itajüta Finees. Pamonaeje pe matakajina wanapaewi Lewitawi piaja monae jota, pajji yajawa. ²⁶ Pa Pebi beje Aarón y Moisés DIOSONÜ pe jumaitsitsinü beje: "Pa juremelia beje Israelitawi Egipciowi piaja ira welia, kae wiriawi kana kujitsia." ²⁷ Aarón y Moisés barü kuikuijai Faraón jawabelia, Egipto piaja reinü, pe jutsi nejja Israelitawi Egipto piaja ira wekua. Pa jiwi beje Moisés yajawa Aarón. ²⁸ Pakujinae barü kuikuijai DIOSONÜ Moisés Egipto piaja irata, Bajara ponü jumaitsi: " ²⁹ JJanü ra DIOSONÜNÜ. Faraón jumaitsimüre, Egipto piaja reinü jawabelia, dajjita kajumaitsitsi." ³⁰ Baitsi jane Moisés jumaitsi DIOSONÜ jawabelia: "JJanü rá apo jume ponaenü, ¿Nejjata de jjua yabara Faraón ne jume jejai tsipa?