¹ JJuanü kujinaeje, Moisés y Aarón lía beje Faraón jawabelia y jumaitsi beje: "JJua maje DIOSONÜ, Israel piaja Dioso, jumaitsi: 'Taja tomara ponaya ejjanaename, bajara pakuenia pamonaeje jamatabú kuene barüyaya ne barüyatajetsi tajeta majjü iratalia.'" ² Faraón jumaitsi: "¿De ipatsa DIOSONÜ? ¿De jjua yabara jume jjania tajetsipajû y kopatsipajû pe ponae nejja Israel? JJanü apo yapütaenü DIOSONÜ; pijinia, jjanü apo kopatsinü tsane Israelwi pe ponae jawa." ³ Jumaitsi beje: "Hebreowi piaja Dioso pane barü nakae tuata. Panekopare pata ponae jawa akueyabi (3) patamakabi beje tajeta majü irabelia pató bejitsianü DIOSONÜ nejja pataja Dioso, bajara pakuenia Bajara ponü patane tsijjuabi yenewa domae o patane beyebi yenewa. ⁴ Baitsi jané Egipto piaja reinü jumaitsi: "Moisés y Aarón, ¿De jjuitsia saya jamata ejema tomara pia jiwi apo nakuebia ejjanaemü? Pa nakuene barümelia". ⁵ Baraja ponü Pijinia jumaitsi: "Aekonojjae bitsó hebreowi ayai bitsaüto pataja irata, y jjamü itsimü penakobé kuene kopatsi jawa." ⁶ Bajara pa matakabi, Faraón itoroba pe matakajina wanapaewi penakuenebiwi y pe itorobiwi tomara jawata. Bajara ponü jumaitsi: ⁷ "Aekonojjae kujinae, pajjamü apo pa rajutsimü tsane pona pe itsi nejja ladrillo jawanü. Ponaelia kaetuatsiana piaja kuata pona. ⁸ Itsiata baitsi jane, pajjamü pa itsia ejjanaename pa ladrillo wajüto itsi tsabiabi. Be welia pütsa pa wekua pitame, tsipaji pamonae afaetabi tsawanapa. Bajara jjuitsia pamonaeje jumaitsi tsaponae: 'Pane ponae ejjanare pataja Dioso pa rajutijitsianülia'. ⁹ Bebeliyo pana kuenebia ejjanare bajara pa pebijiwi bajara pakuenia nakueneba wanapaena y apo jume jjania jai tae tsane pe najumetsünütsi liwaisianü." ¹⁰ Nejjata pe mata kajina wanapaewi penakuenebiwi y penaitajjuto kaewetsiwi tomara pia jiwi tsipabarena. Pamonaeje jumaitsi: "JJua Faraón jumaitsije: 'Pona baja apo pa karajutsi tsanetsi. ¹¹ Pajjamü panija kuata pa jaitsianame pona tsabelia pa jamatabü pa kaetuatame, baitsi jane jjua wajüto pa kanawiata biabame tsitekaena.'" ¹² Nejjata tomara pia jiwi dajjita Egipto najua jawa natsana pe kaetuatsi nejja pona. ¹³ Pe itorobiwi penakueneba wanapaebi kanajjaîntanubenatsi y jumaitsitsi: "Pa werere pane nakuenebi jawa, pona be pa pekarajutsi kuenia." ¹⁴ Faraón pia jiwi pe itorobi monae penakuenebiwi konibabeya biaba Israelitawi pe barü nakueneba wanapaewi, pa pebi jiwi bajara pamonae noba pe barü nakuenebiwi nejja. Pe itorobiwi penakuenebiwi yanijoba biaba: "¿De jjua yabara pajjamü apo pa itsimü dajjita ladrillo jawanü, kaniwi o ajena ata, pakuenia pa itsimü tsabiabi kopiaya?" ¹⁵ Nejjata pe barü nakueneba wanapaebi israelitawi Faraón jawa berena nekonirena. Pamonaeje jumaitsi: "De jjuitsia nija pieniwi bajara pakuenia itsimü? ¹⁶ kae ponato ata baja apo rajutsitsi niaja pieniwi, itsiata abajü pamonaeje pane jumaitsi: '¡Ayaijawa ladrillo pa itsimüre!' Pajjanü, pa nija pieniwinü, pa nekonita biaba, tsajota bajara jjua pejamatabü kuenia nija tomara pia jiwi." ¹⁷ Faraón jumaitsi: "¡Pajjamü pa afaetabimü! ¡Pajjamü pa afaetabimü! Pa jumaitsimü: 'Pane kenopare pata tó be otjopae nejjalia DIOSONÜ.' ¹⁸ Bajara jjua yabara kae wüalia pana kuenebare melia. Kae ponato ata pajjamü apo paka rajutsi tsane, itsiata pa kanawiatsianame pa ladrillo beje pa itsimü tsabiabi." ¹⁹ Israeliatwi pe barü nakueneba wanapaewi tane pe tsita ayapü beje wajatsi pakujinae jumaitsitsi: "Pütsa be welia pa kanawiatame kaemata kabi kanakujitsia." ²⁰ Pamonaeje kajjitajaraba Moisés yajawa Aarón, pe nukae nü beje reinü piaja bo jjaneto pünüwelia, tajü baja pe pua ponaelia Faraón wekua. ²¹ Pamonaeje jumaitsi Moisés yajawa Aarón jawabelia: "DIOSONÜ paka naükotsi beje y paka itsi beje bajara ponü pejamatabü kuenia, tsipaji pajjamü beje nekoni panetsi itsimü Faraón yajawa piaja pieniwi itajjutua. Pajjamü patsikobe rutame espada jawa pa tanebeyebi nejja." ²² Moisés kaewüalia DIOSONÜ ta y jumaitsi: "Diosonü, ¿De jjuitsia saya bitsó liwaisi pa tomara nejjaje? ¿De jjuitsia jjanü ne itorobaremena? ²³ Ta rena kujinae Faraón jawaberena ta jumaitsi nejja ne wünüta, bajara ponü ya liwaisiba pa tomaraje, jjamü saya apo itsimü itsakuene jawa ata ne jutsi nejja nija tomara."