¹ Itajju tejema jiwi ata itsa nakobe tojjota baka pebito u oweja ata, beyajjuaba o kanajeta jjuaba, nejjata bajara ponü matamotsiana cinco (5) ponü beje bajara pa baká pebito yabara y cuatro (4) ponü beje kae oweja yabara. ² Itsa penakobe tojjotsinü kajjitajarabanatatsi penakobe tojjotanukaenü, tsa konibabiatsi y tüpa, bajara jjua yabara apo nanekonitsi tsane pane kobewanitsinü. ³ Baitsi jane, itsa matakabita peyajjuabatsi, nanekonitsiana penakobe waintsinü. Penakobe tojjotsinü matamotsiana penakobetojjotsi jawa. Itsa apo jjaina itsakuene jawa ata, kanajeta jjuabianatsi pe namatamotsi kuenia pe pitsi jawa. ⁴ Itsa penakobetojotsinü pesaünü kajjitajarabiana ne kobeta, bakapebito, burro u oweja ata, anijanü beje kuenia matamotsiana. ⁵ Itsajiwitonü yaeweta ponapona piaja bakajji wayafo tusato jawata o pe ubüatsi bakabota y kopabanuba piaja nüanü itsa to jjane itsa piaja bakabo jawabelia, pejjainaenü matamotsiana peto bijianae jawa pejjainae jawata pejjania pejjainae jawata. ⁶ Itsa tajuitabaya trigo bakabo jawatsia, o pekaetuatetsi jawa, o pejana bakabo ata, o tajua pe bakabonü, pe tajuitabi jiwiyo matamotsiana pe tajuitabi jawa. ⁷ Itsa jiwitonü palata rajuta o pejjainae jawa to pueneta buaba peyapütaenü jawabelia itsa piaja bo jawata najjuaba, itsa kajjitaraba ne pitsinü, anija matamo beje kuenia to kanawiatsiana. ⁸ Itsa penakobe tojjotsinü apo nakajjitajarabi, nejjata bo jjainaenü tsia tsane juecewi jawabetsia penayapütae nejja itsa bajara ponü nakobe kajunua. ⁹ Kae liwaisi kanakujitsia yabara, baka pebito ata, buro, oweja, penajjatatsi jawa, o itajjutejema jawa ata penajjuabi jawa yabara itsa jiwiyo jumaitsi: "JJua tajawaje", juecewi jumetaena anija jiwi beje jawabelia. Pa jiwiyo juecewi tajjitajarabiana pe nanekonitsinü kuene matamotsia ejjanaena anija matamo beje kuenia. ¹⁰ Itsa jiwitonü rajuta pejanü buro, baka pebito, oweja o itajjutejema dajubi ata petó ewetsi nejjatsi itsa tüpa o nabijiapita, o nakobe tojjotatsi kae jiwi ata tae nejewa, ¹¹ bajara pa jiwi beje DIOSONÜ jawabelia pe najumetae ejjanae nejja beje, apo pe nakobejé kuene kaenü ata. Pe jjainaenü jejai itsanü pijinia apo matamotsi. ¹² Itsa to nakobe tojjotatsi, pejjainaenü jawabelia matamotsiana. ¹³ Itsa dajubi ata titibajjae yetatsi, tsitajjüta itsinü jawabelia pe tae nejja. Bajara ponü akuenebi pe matamotsi jawa bajara jjua yabara. ¹⁴ Itsa jiwi ata kowaeta itajju tejema dajubi ata peyapütaenüta bajara pa dajubi denotekatsi o tüpa pe jjainaenü tae nejewa, pe kowaetsinü matamotsiana. ¹⁵ Itsa pejjainaenü pitabü nejewa pe kowaetsinü akuene pe matamotsi jawa; itsa matamota pe tsikopatsi nejjatsi, matamotsiana pakuenia najumetane beje. ¹⁶ Itsa pebi najitsipaeya ejjana pejana wa jawabelia piaja jaranü apo pe jjainaewa, barü majita, bajara ponü nejjata pitsiana, matamotsiana jjua wajjuka pe ukue nejja. ¹⁷ Itsa pajja apo jitsipae tsane pe pitsi jawa bajara ponü, matomotsiana palata jawata pe barü majitsi jjae pejanawayo. ¹⁸ Pütsa asaütsaponae ejjaname pe jorobiwa. ¹⁹ Itajü tejema jiwi ata itsa kenetsiatane dajubi pe tüpae jiwiyo tsane. ²⁰ Itajü tejema jiwi ata tó bena itsa diosowi nejja itsa apo DIOSONÜ nejja na werebiabiana. ²¹ Akuenebi ne bijiobia ejjanae jawa sajinayanü yamajjü itoro ijitsipame ata, tsipaji jjamü ata sajinaya nümü Egipto piaja iratalía. ²² Akuene ne yamajjüitorobi jawa pe wekua tüpae watsi pamona o suti jiwiyo ata. ²³ Itsa nueya ejjaname y bajara pamonae nawajüka jjanü jawaberena, DIOSONÜNÜ, JJanü jumenaükotsinajû. ²⁴ Anaepanaejajû pebisia kuene paka beyejebianatsi; pa nija wanü kae wajji nakopabiana y pane jji sutiwi tsane. ²⁵ Itsa tsikopatame palata taja tomara piajiwiyo jawabelia, itsa pebijiobinü, akuenebi be petsikopabinü kuenia ne jai jawa bajara ponü jawabelia O pe kamatamotsi jawa bebeliyo. ²⁶ Itsa na kowaetame pe namata akatsi pana, merari nejewa tó kanawiatsianame, ²⁷ tsipaji kae panayo penamata akatsi nejja; pe nakatsi nejja. ¿De jjuata namatá akatsipa? Pakujinae ne junata, JJanü jumetae najû, tsipaji JJanü ta itajjuto bijiobia taenü. ²⁸ Pütsa pe bisiakuene Dioso barakuikuijamü, pe bisia kuene ata tó wajükame pe itorobanukaenü niaja tomara. ²⁹ Pütsa asiwamü tane rajutsi nejjamü nekaetuatsi jawa nija pabi jawata o ne kaetuatetsi jawa. JJanü ne rajutsianame matapijiwiyo nejji yajawünü. ³⁰ Pijinia bajara pakuebia itsi tsane nija baka pebito yajawa owejajji. Siete (7) pa matakabi beje pe jota tsane, ocho (8) pa matakabita jota JJanü jjanü nerajutsianame. ³¹ Pajjamü pataja tomaramü tsane natsatsiana jjanü nejja. Nejjata pewi apo pa jjaemü tsane pe titibajjae jawa itsakuene nü ata. pató penetsianame awirijji.