¹ Diosonü barü naliwaisita Moisés Aarón Egipto jawáta. Pakuenia jumaitsitsi: ² "Pajjamü nejja má pa-juametotaje penamatajjaináe juameto tsane, penamata jjainae juameto pajjamü nejja. ³ Patsipaebare wekae nakaetuatsi Israel monae: "Baja rá pajuametota décimo (10) matakabita pekae tuatsinejja ovejawi péjananüanü cabrajji ata baja rá pamonae nejja, kaetuata pona kaebo kanakuijitsia, kaenüyo. ⁴ Pabota bitsó kaejiwiyo beje ovejayo pewi ayaijawa nejjata penamujjü nenia nukaenübeje namata jüpaeya pejji pita ponaena. Peyá kaüpae kueniatsi pitsiana dajjita penábani nejja, baja rá pakuenia kaekuenia pane notsi nejja pewi dajjita panejjae nejja. ⁵ Panija ovejeyo cabrayó ata ápo penabeje naenü pebitoyo tsane kae wai pejjainaenü. Pane itapetsinü ovejayo o cabrayo. ⁶ Panutétsianame ata ü pepatsi jawábeia catorce (14) matakabi pataka tó kaüjütsi juametota. Baja rá jjua kuijinae pena kaetuatsi jawáta israel monae pabéname maponüjji bajayakanúa ajena juamelo pitsatabina. ⁷ Pakaaetua tsianame pejána panemujjü janabinejja baupa pemujjübürü pewaeta banukae jawa pijinenia baupa pabota jjaejitsia pewi. ⁸ Pejjae nejja baja rá pamerrawi, pesebi kuijjinae, matá kajjaena malísika perita, piatsajja bájjuta yajawa matá kajjaena. ⁹ Pütsa pajjanemé asiá o penezetsi jáwa merata. Pazebiáname isotota pematabokoto yájawa yatajjuaya, pünü yajawa. ¹⁰ Pütsa payá jiwünü kopatame itsa matakabi jawábelia nejja. Peneta itsa pakaló nakopata patajuitsianame bajáyakanua. ¹¹ Panenábaninejja: pasiwá naepaküre correllata, pasiwá nattjjü jatáme, kobená nukaeya nenaka tsubi nae pajjae jjubiáname bepijiayo. Tsipaji Dioso pewünta. ¹² Diosonü paka juimaitsi tsimajjü ponáenajjü Egipto iráreka marawi wereba bénajü pekkoji namata jjainaenü pebijiwi pakueni dajubi nüjjiata Egipto irápijiwi. Tó kopatsiarenajü tajamatabü pfáfanae tae ejjanae nejja penadioso binüjji Egiptola janü raja Diosonünü. ¹³ Pejana penayapü taenejja panija bókuene pakuijinae paka kuijitsianatsi. Pakuijinae taenajü pejana jjanü paka jjenetsianatsi pakuijinae bijiápaita nukaponae-najü Egipto irra jawata pejina wanapaewi ápo pa-itsakuenemü tsane pane werewerekae yéniwa. ¹⁴ Má pamataka bijije nakopatsia panená najamatabuná pita biabinejja pajjamü, pataename pakuenia babaruyá tanetsi Diosonü. Dajjita matakabinejja panejume kowünüta wanapae nejja, pane ajja jawawelia kuijinae panejji paniájiwi jawata pataema pamatakabije. ¹⁵ Pajjaename malisika perri siete (7) pamatacabi beje pajukaeremeliá mukujuí perri pitawetsi kuijinaetsi ataü pewerre werrekae jawabelia petó kaüjütsi matakabi, baja ra pajiwiyó tüpaena Israel yajiwünüwi. ¹⁶ Penamata jjainae matakabi panajumetae name jjanü nejja saikaya, nejja séptimo (7) matabi ikatsia pana kaetua tsianame kae jiwiyo ata ápo nakuenebi tsane baja rá pamatakabianü, kaejawa apo pakopatsimü tsane pane zetsijawa pane nábani nejja baja rajane jjua káejawa ápo paka itawetsitsi. ¹⁷ Pakana üjüre pane nabarrüya tae matakabimü malisika perrianü tsipaji ma pitsi matakabitaje kapatame niajiwi, wajabitsae monaenü pepobitsüüto kanaküjitsia, ápo Egipto pijiwi baja ra pakuenia pane kanaüjütsi nejja baja ra pamatakabi panejji nejja. Ma jjuaje dajjita matakabi nejja ü panejume kowünütsi nejja pajjamü. ¹⁸ Ü pane jjae wanapae nejja malisika perri manübeyota kuijinae catorce (14) matakabita kaniwiyó jawabelia baja rá pajuametota. ¹⁹ Abajjü siete (7) pamtakabi beje panepae nejewa, apo pakae tuatsimü tsane mulujui perri pana wekua jutajjuare Israel wekua, pená patajopae nü ata o baja rá jota pijinü ata. ²⁰ Pütsa payájawa kajjanemé mulujui perri jota pajina wanapname, malisika perri pajjae wana páename. ²¹ Baja rá jjua kuijinae Moisés kaetuata liwaisi yapütaewi itórroba: "Pakaetuare paita perre aveja cabrajji ata papekayá kaüjüpáe kuenia panejji pane abatsinejja pabeyajjua biáname ovejayo panena barrüyá ta matakabi. ²² Baja rá jjua kuijina papitsianame pemata pepetoyo pajabu tsianame pejana rata pajanata jota ekaena. Pejanata pakaiki náename atübüyó jjua bá waetaba baupa pemujju nénebeje pijinenia. Kaejiwiyo ata pütsa pitsapaliá abajjü ata ü peyananianae jawabelia. ²³ Tsipaji Diosonü namajjü wani tanuka ponaena bijiá paitijitsia Egipsiowi. Pakuijinae taena pejana baupá jawá, nuka ponaena panija baupá jawá itawtsiana penamajjü wanitsiwi papeka bijia paitsi yéniwa. ²⁴ Pataema majjua pitsijawá. Má jjuaje panejüme kowünütsi nejja panejji ata pijinenia. ²⁵ Pakuijinae pa-patsianame Dioso papeka rajutsi irrábelia, pakuenia paka jumaitsi papeka tó kanawiatsi nejja, panaürre pane asiwa jawaje. ²⁶ Pakuijinae paka yanijiobiana panejji: ¿Dé jumaitijitsia majjua pana barruyá taebiabame bitso? ²⁷ Nejata pajjamü patsipáe bianame: ¿Pa-barrüya taniji pató biáju tsipaji Diosonü paneyájawa tsapóna ponae, pakuijinae Dioso nukapona tane patajabojji kuene pajjanü pa-Israelmonae kuenenü Egiptota bijobi rajuta egipto pijiwi. Baja rá ponü kapánepa Israelmonae." Nejjata baja ra pamonae irrataya otopa irrábelia baja rá pakuenia nawajüka Diosonüta. ²⁸ Israelita monae pona itsi pakuenia Diosonü itorrobatsi Moisés Aarón beje. ²⁹ Jjeneta núkapona merrawi tutújuta wérrebaba dajjita matapijiwi Egipto pejinawana paewi, Faraón pejjünato matapijinü wérrena kuijinae, ponü itórrobeca biaba pajja pewüta, pejji ata penané konitsiwi vacá ata ponü bá náejjana nama-tajjainaya naejjana. ³⁰ Faraón nonotapuna merrawi, pemitsa nakueba bibiwitsi yájawa Egipto pijiwi, ü peaü aüjawi bitsó natsi núa Egipto pijiwi, tsipaji kaebó ata ápo nákopatsi dajjita ü petó tüpaewitsi ³¹ Faraón junata Moisés Aarón ata baja rá pámerraw: jumaitsiji tsiatsi: "Barrü nanatapúre, páponare baja taja tómara wekua, pajjamü béje Israelmonae yájawa pápone, parrüya tae ejjanare Diosonü, pakuenia pane jumaitsimü pane itsinejja. ³² Pakápone panija oveja panija vacá pakuenia pane jumaitsimü pápore, pijinenia panená rajure pejanía kuene." ³³ "Egipto pijiwi bitsó bepíjiyo jitsipa pepitsa páejawa baja pá-irrawekua, tsipaji jumaitsi tsánu benae: tsipaji baja dajjita payájiwünü werre werrekajü." ³⁴ Nejja baja rá pamonae nota malisika matabuanü wajji petsapaka biabi jawata tsipaji baja káeja kübejeba, pená jjatabi jawanü ü pekapona nejja baja. ³⁵ Baja rá jane Israelmonae itsi jjua jumaitsi Moisés panae néjewa wajüka palata, oro jawanü, penajjatabi jawanü yájawa. ³⁶ Diosonü itsi Egipcios monae jamatabü jjanepae ejjana pejamatabü barrüya ejjanae nejja Israelmonae. Pakuenia má rajutaje Egipcios monae jjuabeje wajutatsi. Ma pakuenia wekua notaje, Israelita monae wekua kapona Egipcios pijiwi. ³⁷ Israel monae warrapa Ramsés wekua pona Sucot jawabelia. Baja rá pamonaemi seiscientos mil (600.000) ponübeje namatájutsi nejewa petirriawi pejewajji ata. ³⁸ Itsa bitsaütónü ata ápo penajume jupaewi nápona Israel monaeta, ná-kapona piaja ovejji vacá ata, pepo ayei vacá bitsaütonü. Baja rá pamonae perreba najeta bepijiayo rubena, malizika perrianü pekapo náejewa. Egipto werrena. ³⁹ Malizica tsipaji pejutsi jáwa Egipto werrena pebéjjüa tsaponae yeniwa penábani éna enaejawata. ⁴⁰ Israelita monae jinawánapa cuatrocientos treinta (430) pawai beje. ⁴¹ Pakuijinae cuatrocientos treinta (430) pawai beje werrewerreka najetarruka, baja rá pá-matakabi, Diosonü pejjainanubi wájabitsaü pitsapa Egipto irrá werrena. ⁴² Má pamerrawi panenaü kotaponae nejjaje, Dioso papeka jutsi nejja Egipto irra wekua. Baja rá jane pamerrawi Diiosonü tane pebarrüyá tae kuenetsi dajjita Israel monae pejji penai tajütsiwi baja ra pamonae jawata. ⁴³ Diosonü jumaitsi Moisés Aarón beje jawabelia: "Paka jumaitsá netsi beje pane jume kowünütsi nejja beje pane barrü pane paejjaebejejamatéjema: apo itsa israelita jiwiyo tsane pütsa na-jjane. ⁴⁴ Apo itsa kuene itsa pekotó nakuene binu, nekomüatsi nüjjae, ná-jjaepóna ponaena itsiata baitsi jané pepua páne bó úpi maütoyo jutsi kuijjinae. ⁴⁵ Itsa nakuá pijiwi pijinenia pamonae bá nakaba semana ápo na-jjae tsane penenamitsa kaponáejawa. ⁴⁶ Pá-nabane bíabianame kaebota. Pütsa payá jiwünü jutame bó wekua, pesitojji pütsa patsika káme. ⁴⁷ Dajjita pajjamü Israelmonaemü panebarrüya nejja pakuenia bá-pabarrüyámü itomo jawata. ⁴⁸ Itsa náponapona pajjamü jawata itsa nauá pijinü nájjitsipa pená na barruyá tae ponaponaejawa nájame tabü barrüyá tae ponapona Diosonü, dajjita piajamonae pébijiwi pá-bo upimaü kauku biananame. Nejjata baja pamonae ná-taena. Paka jüpaena bé panija irra jawata penaejjaenü tsane. Itsiata baitsi jané, kaenü ata ápo itsa na-bo úpi kaukutsia wjjanaenü ápo nájjae tsane pane namitsa koponáejawa. ⁴⁹ Pénajume puenetsi jumé baja rá pajumeta paká kaüjütsiana pajjamü ata pijinenia itsa nakua pijiwi ata pena jina wanapaewi pajjamü tuatújuta." ⁵⁰ Baja rá nejjata pakuenia Israelita monae itsi jjania waetsia pakuenia Diosonü itorrobatsi Moisés Aarón beje. ⁵¹ Baja rá pamatakabi taliá, júta israelita monae Egipto irrawerrena Diosonü piaja wajabitsae monae.