¹ Samuel dajjita Israel pijivi barüya kuikuijai, ajenakonojjae Israel pitsapalia Filisteovi pe barünabe nejja. Bajara pamonae tajjunae nato ejjana Ebenezer javata, juya Filisteovi Afec javata pija tajjunae ejjana. ² Filisteomonae najjaniavaeta Israel pe barünabe nejja . Petajjuabi javata penabejava, Filisteovi Israel pijivi amoneyaba be (4) mil ponübeje kuenia bajaraa pa panabota. ³ Pakujinae bajara pa tajjunae javaabelia jivi palia, Israel pija ancianovi jumaitsi : "Itsajjujitsia ajena Petuujjanenü naka najjuabi ejjana filisteovi javaabelia? pakaponaremena itsajota ekabiaba petuujjananü pija pacto ma jootaje Silo velia, wajjaitsi naka yaajava jitsia, naka yakarantijitsia waja wajabütsaü pekobe vekua". ⁴ Neejjata bajara peebijivi itoroba Silo javaabelia; bajara velia kujinae bajara pamonae Petuujhjanenü pe ekae bota wajabitsaünü pematabokotonü, pe ekabiabünü kerubin matatsinüveetsika. Eli pejjünatobeje, Ofni Finees beje, bajarajota Dioso penajumelivaisi rajutsi bo kanukabeje. ⁵ Pakujinae Petuujjanü penajume livaisi rajutsi bo pata pijatajunaejavata, dajjita Israel tomara asaüya kuenia wawajai, bajarajota ira natjünüta. ⁶ Itsa jumetane filisteovi ayaikuenta pewawajaijava jumaitsi: "De meta itsi hebreo pijatajjunaetalia bitso saya wawajai pijarü?" Neejjata bajara pamonae yakuenetane Petuujjaneü pija bo bajara jootalia kanubenalia. ⁷ Nejjata filisteovi junava bitso; jumaitsi: "Bajaraa pa tajjunaetalia raja Dioso palia" Bajara pamonae jumaitsi: !Ay! wajjaitsimü!" Be pitsikuene apo taetsi bajayata!. ⁸ !Ay! wajjaitsimü!?Ipatsa naka yakarantsiana pekuenesaüvi dioso vekuaje? Ma pa diosovije Egipciomonae domaeta verebiaba tetusatota. ⁹ Pa aitatsamüre, pa pebijimüre, pajjamü pa Filisteovimi, itsajume meta ebreovi pa pija pianivimi tsane, pakuenia barapamonae panijapianimi pikani. Pa peebimüre pa barünabema. ¹⁰ Fuilisteovi nabia juya Israel pijivi amoneyatsi. Kae pebi kanakujitsia najetabijirava pijabojjiya, ayaikuenia bitso beyejebatsi; be (30) mil beje kuenia Israel pija wajabütsaünübeje tüpa. ¹¹ Dioso pija bo to nakotojjotatsi bajara pakuenia Eli pejjünatobeje, Ofni Finees beje tüpabeje. ¹² Benjamin virianü najetabijirava penatsekonae panabo veerena bajara pa matakabi Silo javaaberena rena, ajuma ese beje tsekaponae atsa matawünükekapona ¹³ Pakujinae bajara ponu palia, Eli pijatajjunaeta eeka namuto mujjuneneta tayeka tsipaji jamatabü bü jai Dioso pija bo yaabara. Bajara ponü aajena tomaraabelia junua livaisi tsipaeba, dajjita tomara wawakirna. ¹⁴ Pakujinae Eli jivi jumetane pe wawajaijava, bajaraponü jumaitsi: "?Itsajjujitsia jivi namataatsapata?" neejjata jivitonü Eli javaabelia tsipaeba. ¹⁵ Bajarapakujinae Eli noventa ocho (98) pa vai beje jjaina; itajjuto tsiküna baja, bajaraponü baja apo tae. ¹⁶ Bajaraponü Eli jumaitsitsi: "Jjanü raja penabee java veerena renanü. Jjanü najetabijirivaju ajena pe nabe java verena. "Bajaraponü jumaitsi: "?Deitsi wajajivi, tajjinato?". ¹⁷ Livaisi kanajetarukaenü jumaitsi: "Israel pijivi rüküpeka Filisteo vekua. Bajarapakuenia ayaikuenia amoneyabatsi. Nejjünatobeje, Ofni Finees beje, tüpabejebaja, bajarapakuenia Dioso pe ekae javata tsabiabi nakobetojjota." ¹⁸ Pakujinae Dioso pe ekea javata tsabiabi yaabara kuikuijai, Eli pepünüyaabelia jopa pe ekae bankata java veereka baupa mujjunene jajaveelia. Bajaraponü wüsitanatatsi, neejjata tüpa, tsipaji raja bitso perujunü nasita nua. Bajaraponü Israel tomara cuarenta (40) pa vaibeje derena ponapona. ¹⁹ Juya peekopena, Finees pijawa, nakojjina imojjoyo pe ejjanaejava. Pakujinae jumetane livaisi, Dioso pe ekea javata tsabiabi penakobetojjotsi vatsi pakuenia pajjuyo pamona ata tüpabeje, neejjata bajarapowa pematabakabüta ekaya ejjana, tsipaji pe ejjanae nejja atane. ²⁰ Petüpaejavata, peyavenonae waanü jumaitsi:"Pütsa junavame, tsipaji raja pebinakueto ejjaname."Itsiata bajarapowa apo jumetae apo namujjunaa evetsi ata. ²¹ Bajarapowa Icabod wünüruta, ma junaitsije:"!Israel to ajibitsi Dioso pe kotia", tsipaji raja Dioso pe ekaejavata tsabiabi to nakobetojjotatsi, pajjuyo pamona yaajava pe tüpaejjaebeje. ²² Neejjata ma jumaitsije:"!Israel to ajibitsi Dioso pe kotia,tsipaji raja Dioso pe ekaejavata tsabiabi to nakobetojjotatsi."