¹ Nejjata, bajayajebi pamatakabibejekujinae DIOSO pejumeliwaisi Elías jawaberena pata, akueyabi pawaibeje petsewikujinai, jumaitsitsi: "Ponare, natsitajüre Acab jawabelia emarabaja jjanü itorobiarekajü irabereka". ² Elías pona pematsitajütsinejja Acab jawabelia; bajarota bitso janibo Samaria jawata. ³ Acab nejjata junata Abdías, ponü penamatakaitorobikuenia palaciobo nuka. Abdíass peyaiyatainü DIOSO, ⁴ tsipaji pakuijinai Jezabel tobe ejjana najetarüka DIOSO pija profetawi, Abdías pita cien (100) pa profetabeje matayatabaja cincuenta ponübeje kanakujitsia matayata ibowajuta pejjaijawa abata mera yajawa. ⁵ Acab jumaitsi Abdías jawabelia: "Ponare bajara pa irajawa dajjita mera matathaibüanüjawa penajatonüjawa. Belia wajaitsibeje namatajjünaitsitsi patsibeje pona nejjata asaüyabienatsibeje waja cabayonü waja mulabeje piasaünüanu, jumetejema wajanakato napenetsiyaniwa dajjita dajubimonae. ⁶ Nejjata natsikotsatabeje ira peponaenejjabeje bajarajjoya mera pejaitsinejjabeje. Acab pona kaenamutua Abdías pijinia itsanamutua pona. ⁷ Itsa abajjü Abdías najetarüka namutojawa, Elías namatajjüna jemata. Abdías yapütane pematabakabüta nukajunua. Bajaraponu jumaitsi: "¿Jjamüraja tajatujjanenümü Elías?" ⁸ Elías nejjata jumekanawiata bajaraponü. Ponare jumaitsimüre nijatujjanenü: "Taema, Elías jota nuka". ⁹ Abdías jumekanawiata: ¿Depakuenia itsinu pabijiakuene, jjamünerajutsine nijaniwitonü Acab pekobeyabelia, jumetajema bajaraponü tenebeyajjuabinejja? ¹⁰ Asaü nija tujjanenü DIOSO, tsipaji itsatomarajawa ata apokanamatajjünae, tajatujjanenü Acab kajaitsi ejjanae ata. Nejjata itsapatomarata ajibi Elías ma jotaje itsajai, Acab nejjata itoroba bajarapamonae jjaniajaiya petsipaebinejjatsi, apo pe kanamatajjünae yabara. ¹¹ Abajjü bajarapakuenia itsa ata jjamü nejumaitsimü ponare, tsipaibare nijatujjanenü Elías rabaja majota nukaje. ¹² Be najjatsiayo taponatabijawata, DIOSO pija Espíritu ka kaponaena itsabelia jjanü apoyapütaenü. Ikatsia, itsaponajü tatsi paebinejja nejjata itsatsipaebajü Acab, Nejjata ikatsia itsa apokanamatajjünae, nebeyajjuabiana. Baitsijane jjanü, nija pieninünü, pewüjüato kujinainü DIOSO yaiyataya ponaponajü. ¹³ ¿Apokayawatsipaibi kajena, tajatujjanenü, jjuajjanü itsinü pakuijinai Jezabel tobeyajjuaba DIOSO pija profetawi, pakuenia matayatajü cien (100) pa profetabeje cincuenta ponübeje kanakujitsia pija ibowajuta abatajüyajawa pejjaijawa mera yajawa rajutajü bajarapamonae? ¹⁴ Nejjata ikatsia jjamü jumaitsimü: 'Ponare, tsipaibare nijatujjamenü Elías majota nükaje, jjanü nejjata bajara ponü tanebeyajjuabinejja". ¹⁵ "Nejjata, Elías jumekanawiata: "Asaü DIOSO pinijibitsaüto pejjainainü, ponü pitabünejewa nukajü, kajena pepokuene natae ejjanaenajü Acab jawabelia ajena". ¹⁶ Nejjata Abdías lia penanamatajjünaenejjabeje Acab beje, nejjata tsipaeba jjua Elías jumaitsitsi. Nejjata reinü namatajjünajopalia Elías. ¹⁷ Pakuijinae Acab tane Elías, jumaitsi: "¿Jjamütsabaja? ¡Jjamü, ne kayajatsinü Israel pijiwi!". ¹⁸ Elías jumekamawiata: "Jjanü raja apojumatabükuene bejiobi ejjanainü Israel pijiwi, jjamü rabiji ajja pijamonae yajawa panenakayajatsiwi panekopabijjae panija tujjanenü pejume liwaisi panepüma ponaenejja Baal pija ídolo nü. ¹⁹ Aekonojjae nejjata, itorobare liwaisi nejjata kaituare jjanünejja dajjita Israel pijiwi Carmelo tsutojawata, yajawa cuatrocientos cincuenta (450) Baal pija profetawi bajara pakuenia cuantrocientos (400) pa profetabeje Asera pija nüanüpamonae jjayabiaba jezabel pija mesa jawata". ²⁰ Nejjata Acab itoroba liwaisi Israel pija tomara jawabelia nejjata kaituata profetawi Carmelo tsütojawata. ²¹ Elías imojjoyota bajarapabitsaüto nejjata jumaitsi: "¿De pa matakabibeje bitsó pajjamü panajume liwaisi tijjiba najetarübenaename? Nejjata ista Baal dioso nü, papünapanare bajara ponü". Nejjata apojume kanawiabitsi liwaisi. ²² Nejjata Elías ikatsia jumaitsi bajara pamonae: "jjanü kainünü, nakopatajü Jehová pija profeta kuenianü, beitsijane Baal pija profetanüanü cuatrocientos cincuenta (450) ponübeje. ²³ Nejjata nakarajutsiana bajara pamonar najuatorobeje, nejjata bajara pamonar itapetsiana kainü, nejjata pakajjiukare petupa kuenia, nejjata pajebare iso matatsünüwereka, beitsijane pütsa isoto paitajurutame pebüjjüpanata; nejjata jjanü jjaniawaitsianajü itsa toro, buatsinajü iso matatsunüwereka, nejjata isoto ata ajibitsane. ²⁴ Ikatsia pajjamü pawajütsianame panija dioso pewünüta, nejjata jjanü ata tajatüjjanenü pewünüta, wajutsianajü, nejjata ponü jümepitsiana isoto kotiata, nejjata bajaraponü DIOSO tsane". Nejjata dajjita bitsaüto jümekanawiatatsi pakuenia jumaitsije: "Majjüaje jjanepana". ²⁵ Nejjata Elías jumaitsi Baal pija profetawi jawabelia: "Pa itapere kainü toro pajjamünejja nejjata pajjaniawaire kopiata, tsipajirapajjamü papiniji bitsaütomü. Nejjata pawajükare panija dioso pewünüta, pütsa baitsijane isoto pabuatame toro pebajjüpanata". ²⁶ Bajara pamonae pita toro perajutsinütsi bajanejjata jjaniawaita, nejjata wajüka Baal pewünüta bajaya kunüa kujinai ata matoneje jawabelia, jumaitsije: "Baal, panejümetaema". Baitsijane ajibi itsajumeyo ata, itsajiwiyo ata pejumepitsinejjatatsi ajibi. Belia bajara pamonae jirajirewa penakuenebanatsi altat mujjunenia. ²⁷ Nejjata matoneje epatota, Elías kapokapona bajarapamonae nejjata pakuenia jumaitsije: "¡Ayaijumeta pawawajamüre! ¡Bajara ponürabaja dioso! Belia najamatabünanotanükajitsipa, belia majitanükajitsipa nejjata üwajayatijjobinejja". ²⁸ Nejjata bajara pamonae wawajai pinijijumeta, nejjata üpamonae nakajjiuka bajara pakuenia saya, bajara pamonae baja penabeibiakuenia, espadata lanza janebaja, bajara pamonae pejanata üpenatsikatsinejja. ²⁹ Nejjata matonejebaja panepa najetarüka, bajarapamonae abajjü jirajirewa kaniwiyo epato jawabelia sacrificio petojebi hora, itsiata baitsijame ajibi pejume ata ajibi ata itsajiwiyo pejumepitsinejjatsi, ajibinua itsajiwiyo pejumetaenejjatasi pewajükaejawanü. ³⁰ Nejjata, Elías jumaitsi dajjita bistaüto jawabelia: "Paponaremena, pane imojjoyore nejjata dajjitajiwiyobeje imojjoyota bajaraponü. Nejjata bajaraponü pejanakuenia jjanebba DIOSO pija altar jjuapikani abeje. ³¹ Elías nejjata doce (12) pa ibotoyobeje pita, kai ibotoyokanakujitsia pekuenejjaina Israel pijatribu Jacob pejji tsipaji Jacob ponü DIOSO barükuikuijaitsi pakueniaje "Newünü rabaja jjamü Israel". ³² Bajara pa ibotonüta bajaraponü altar nakueneba DIOSO pewünüta jjuakujinae kua pinijifotojawa altar mujjunenia, ayaijawa jjaniwaitsiakuenia pekaüjüpaenejja pejju. ³³ Nejjata bajaraponü iso jjaneba jjuakujinai, nejjata kajjiuka toro pe epatojjikuenia, jjuakujinae isoto matatsünüwereka buata. Nejjata jumaitsi: "Pawünübare cuatro (4) pakanalitobeje mera, jjuakujinae tsimata epanarebeje ofrenda jjuakujinae tsimata epanarebeje ofrenda jjuakujinae isoto". ³⁴ Nejjata jumaitsi: itsimüre ikatsia; ikatsiabaja nejjata itsi. Abajjü jumaitsi: pa itsimüre akueyabijjuabeje; nejjata akueyabijjuabeje itsi, ³⁵ bajara pakuenia mera kujinaerüka altar mujjunenia, nejjata bajara pakuenia mera wünüta fotojawa. ³⁶ Pakuijinaebaja pata pija hora ofrenda perajutsinejja, profeta Elías jumaitsi pe imojjoyotsijawata: "DIOSO, Abraham pija Dioso, Isaac janebaja bajarapakuenia Israel, nejjata ajena pakuenia tsaneje nenaitajütsinejja jjamü tsipaji Israel jawata Dioso nünü, jjanüjanebaja nijajiwitonünü, nejjata jjamü tane itorobikueniamü majjua itsinüje. ³⁷ Nejume kanawiare, DIOSO, nejume kanawiare, peyapütaeneya ma pabitsaütoje tsipaji jjamü, ayainümü DIOSO, Dioso nümü, nejjata nejamata bükuene nawiabi ejjanainejja jjamüjawaberena bajarapamonae. ³⁸ Nejjata jopaika DIOSO pija isoto kotia, nejjata tajuitaba ofrenda, isitonai, ibojjutonü janebaja pepajuto, nejjata kajena abajjü raena bajarapamera fotojawa penajetarükaira. ³⁹ Taenübena dajjitabitsaüto, pematabakabüta otjopa nejjata jumaitsi: ¡DIOSO tsaenarabaja Dioso, Jehová tsaenarabaja DIOSO! ⁴⁰ Nejjata Elías jumaitsi: "Pataikare Baal pijaproetanüanü, itsanü ata pepanepaeyaniwa. Nejjata bajarapamonae, taika; nejjata bajarapamonae Elías kapona Cisón pija najatojawabelia, nejjata bajarajota beyejebi ejjana. ⁴¹ Nejjata Elías jumaitsi Acab jawabelia: "Junaima, jjaima yabaja apaema; tsipajirabaja jumepitsapa piniji ema penajetarükaejawa. ⁴² Acab junaya pejjaenejja piapaenejja ata. Nejjata Elías junaya Carmelo tsüto kopiayabetsia, nejjata pematabakabüta irabelianukajunua, bajara pakuenia pitabara pematabakabüjawatabeje naitabararuta. ⁴³ Nejjata jumaitsi pewitsatsinü: junaimina aekonojjae, taimanua manuamene jawabelia belia. Nejjata bajaraponü junaya, nejjata tane, nejjata jumaitsi: "Ajibi itsakuenejaba". Nejjata bajaraponü tsipaiba ikatsia siete jjuabeje. ⁴⁴ Nejjata sietewaja jumaitsi: "Tanijjijjanü tsikiripajuboyo bejiwitonükobejapato, pejunaijawa manuamene jawawetsina. Nejjata bajaraponü jumaitsi: "Jumaitsimüre tsajopailia Acab jawabelia: 'Jjaniawaire nijacarro neponaenejja baja, ema pekato ayapübeje ejjanaeyaniwa'". ⁴⁵ Nejjata baja, bajarajjüajawata ponapona, itabojjo nejjata kirijai itarürübota jowiboyajawa, nejjata piniji ema jjaneto. Acab baja nejjata junaya, Jizreel jawaberenapona. ⁴⁶ Baitsijane SEÑOR pekobe Elías pematatsünüwereka nakoberüta. Nejjata bajaraponü naya epasiküta pijapiapia eseta nejjata kujinajina Acab pekuwüwelia Jezreel jawata patijitsia.