¹ Elías tisba jawata pe ponaponaenü patomara Galaad jawata eka, jumaitsi Acab jawabelia: "Asaükajena bajaraponü Jehová, ponü Israel pija Dioso nejjata jjanü ata bajara ponü pe itabüjenejewa nukajü, Ajibi tsane dono Ema ata ajibi tsané mapawainüjawaliaje , sayabaja matapania jjanü itsa jumaitsinü." ² Dioso peliwaisi Elias jawaberena pona jumaitsije: ³ "Natüjjire ma jotawekuaje este kanakujjitsi jawábelia; namatayábare penajatoyenepanata, Querit jawata, este itsajota Jordán eka. ⁴ Apaename penajato pijira jjanürabaja itorobajü cuervo peka abatsinejja bajarájota." ⁵ Nejjata Elias pona pakuenia Dioso peliwai Itórabatsi. Bajaráponü pona bajarápanajato jawábelia Querit imojjoto jawata peekuera, Jordán mene itsapanawetsina. ⁶ Nejata cuervo monae to kaponabiaba pan yajawa pewi bajáyakunua pan yajawa pewi kaniwiyo epatota, Nejjata bajaráponü apayabiba tsikirinajatoyo pijira. ⁷ Baitsijane jjuakujinae bajarápawaita, bajarápanajato pijirabaja tsewa tsipaji ema ajibi irábetsika. ⁸ Dioso peliwaisi Rena bajaráponünejja, jumaitsije: ⁹ "Nanatapunare Sarepta jawábelia ponare, Sidón nakuata pe Ekaetomara, Abbajjü ponaponare bajarajota. ITórobajü rabaja powá pamonapetotüpaewatsi pekarajutsinejja pejjaijawa." ¹⁰ Nejjata, bajarapoü nanatapüna Sarepta jawabelia pona, pakujinaebaja pata tomara pija baupa jawa, petiriwa iso kuetuata ponapona bajaraota powá pamona to tüpatsi. Nejjata bajaraponü junata pakuenia jumaitsije: "Pejjania kuene nejjanare, netokarenamüre meráyo basoyota ¹¹ Itsa abajjü bajarapowá méra pitajopareka, bajaraponü Ikatsia junata jumaisije: "Pejania kuene nejjanare, netó karenamüre pan mujjupayo nekobeta." ¹² Nejjata bajarapowa jumekanawaita: "Nija tujjanenü Dioso Asaü, jjanü apojjainainü Itsakuene pan jawata ata, sayabaja jjainajü tsiquiri harina beneyo boteyabüta bajarapakuenia bepeyajarayo aceite eka jarabota. jjaniajanü, kaetuataponaponajü na jua Isotoyobeje boo ünualiatakaponaenejja jumatejema tacetsinejja harina beneyo jjanünejja tajjunato atanejja, patajjainejjabeje jjuakujinae patüpaenajübeje." ¹³ Elias nejjata jumaitsi bajarapowá: "pütsa junawame, ponare pakuenia jumaitsimü ejjanare, baitsijane pan jawaya kopiata netó ejjanajjuare Nejjata netookarenamüre. Jjuakujinae ejjanainame Itsajawanü nejjünatonejja jjamünejja ata. ¹⁴ Kajena petujanenü, ponü Israel pija Dioso, jumaitsi: pabuta harinabeno eka apo ajibitsane, aceitera ata pawajjita eka opotsewitsane, Ema petujjanenü ata pe Itorobijawábelia ira matatsunüwereka." ¹⁵ Nejjata bajarapowá ejjana pakuenia Elias jümaitsitsi, bajayajebi nejjata jjaiwanapa tres (3) pajiwibeje. ¹⁶ Pabüyo harinabene yanukeka apotosajinaitsi, Apotótsewitsi ata pabüyota aceiteráyo ekeka, Dioso baja peliwaisi pakuenia jumaitsi, pakuenia bajaraponü Elias jawaa kuikuijai. ¹⁷ Bajarájjuakujinai Ikatasia, petiriwa pejjünato, ponü bajarapabó pejjainainü, jópa domaita. Pijadomaibaja bitso bajaraponü ayaijawa beliabaja ajumalijibi. ¹⁸ Nejjata, bajarapowa jumaitsi Elias jawabelia: "¿Dioso pijajiwitonü, depitsikuene nesiwa Itsimü? ¿Berenaponame tanenajamatabünapotsi ejjanaenejjamü taja pabisia kueneyabara tajjunatonua netóbeya jjuabitsiamü?" ¹⁹ Nejjata Elias jumekanawiata: "Nerajure najjunato." isapita pejewajjinü bajarapowa pe Isiwekua atjübüyojawabetsia Isajuna, pacuartoyo jawata bajaraponü naponapona, nejjata bajaraponübuata pijacamajawata pejewajjinüyo. ²⁰ Nejjata Dioso jawabelia nawajüta pakueniaje: "Tajatujjanenü Dioso, ¿Pabijiakuene ejjanajitsiamü pamona apopejjainaiwata ata, pejjünato peto tüpaenehatsi, itsajotaneponaponae ejjaname? ²¹ Nejjata Elias pe jewajjinüjawawereka bok abiaba akueyabi jjuabeje; Nejjata ayaijumeta bajaraponü Dioso junata pa kueniajumaitsije: "Tajatujjanenü Dioso, jjanü kawajütatsi, pejjaniakuene, jumalikanawiare pejewajjinü jawabélia piasaüjawa," ²² Dioso nejjata jumetane Elias pejume; pejewajjinübaja nejjata jumalinawiata, nejjata pejanakuenia asaü. ²³ Nejjata Elias Isapita pejewajjinü penajawábelia rajüta pebarürunae kujinaetsika jumaitsu: "Naünkore, nejjünato rabaja asaü." ²⁴ Bajarapowa Elias jawabelia jumaitsi: "Matapania rajanebaja yapütanijji Dioso pijajiwitonumükuene, Dioso tsipaji.