¹ Jumaitsi petú jjanenü Jehú jawabelia Hananí pejjünato Baasa itsa jjua jitsia: ² "Jjanü kanutsi atatsi nena jjuabi nüyo nito robinü kae ejjanatsi nito robinejja Israel jiwi, jjamü jume kowü nüta najeta rukame Jeroboam pebisia kuya rubame taja jiwi Israel, neanaya ejjaname nija pebi sia kuiji ruta. ³ Jjanü irajueta penetsia najü dajjita Baasa dajjita pejji yajawa pakuenia Jeroboam pijamonae yajawa were wereka baja ra itsinü tsane, Nabat pejjünato. ⁴ Awiri jjaena dajjita jiwiyó beje Baasa piaja moane núyobeje petü paewi toma rá jawata, atjübü piaja baratsui jjaena waya fua belia pe were werekaewi". ⁵ Itsa jawanü jjüa pekoyene jota ¿apo yakinae libro jawata jjüanü yakina pona biaba kae rey kana kuijitsia Israel pijiwi? ⁶ Baasa tüpa mütü jota bobena piaja monaemi Tirsa jawata, juya pejjunato rey pekowüta pajja pewünü Ela. ⁷ Baja rá pakuenia jume paeba piaja tujjanenü tsipaeba profetanü Jehú, Hanani pejjünato jjüa ejjana Baasa piajawa pejji yajawa, dajjita pebisia kuene pejjanae jawa, pitaba rata piaja tujjanenü nejjata jamatabü bijina penatsi kobe nakuenebi jjae pakuenia Jeroboam, pijinenia pena majjü wanitsi jjae werebiaba Jeroboam piajawa pejji piajamonae yajawa. ⁸ Veintiséis (26) waita rey Asa Judá pijinü, Ela Baasa pejjünato ikatsia pito robinü naejjana Israel pijiwi Tirsa jawata, ito roba najua waiyobeje. ⁹ Peto nakueneba bibinütsi Zinri, capitán piajiwi pito robabia biwi kae bitsaütomi natsata itsa bitsaüto baja rá pibitsaüto atiabatsi. Ikatsia Ela Tirsa jawata ponapona, apae ponapona aitajibi tsapona ponae Arsa piajabota. ¹⁰ Zinri joneya, bia pe be kuijinae beyajjüaba, veintisiete (27) waita Asa pito robi rey Judá pijinü peya bará beyajjuabi kuijinae rey tsapona ponanae pekowüta. ¹¹ Pkuijinae Zinri tajjü jjuaba pitorobi jawa pekowüta ito robeka, baja rá ponü wereta dajjita Baasa piaja monae nüyobeje. Kaenü ata apo kopatanütsi Baasa pijiwi piajamonae, peyapü taewitsi. ¹² Baja rá pakuenia Zimri mamajjü wanita wereta Baasa monae, pakuenia piaja petujjanenü jumetane pakuijinae kuaki kuakijai Baasa jawabelia profeta Jehú. ¹³ Dajjita piaja pesia kuene pejjanaetawa Ela, pejjünato, baja rá ponü beje Israel pejjanae jawa, pejamabü kuenia baja ra ponü beje Israel monae pebisia kuene na itsi, baja rá jjüajitsia pamonae anae ejjana piaja tujjanenü, Israel piaja Diosonü. ¹⁴ Itsajawa pena kobe tajewa pekapane paejawa Elanü, tajjita jjüa ejjana, ¿apo yakinae ejjanae librota jjüanü ejjana wanapa biaba Israel piaja reyewi? ¹⁵ Veintisiete (27) baja rá pawaita Asa rey Judá pijinü, Zimri ito roba saya siete (7) pawaiyo beje Tirsa jawata. Baja rá ikatsia pata waja bitsaü nübena Gibetón yabara, tsipaji baja rá ponü filisteo nümi. ¹⁶ Waja bitsaü baja pato baja rajota jumetane jumatsiji "Zimri atiaba rey beya jjüaba". Nejjata baja rá pamatabita itsa jota nubena, nejjata Israel moane jumaitsi Omri raja wajanaka namata kaitorobinü tsane, waja bitsaü pito robinü Israel jawata. ¹⁷ Omri pona Gibetón welia dajjita Israel piajiwi yajawa, baja rá pamonae joneya yakürta Tirsa. ¹⁸ Baja pakuijina Zimri tane jiwi peya wünü kaejawa toma ra, nejjata baja rá ponü pona itsa jotalia rey eka bia palacio jawabelia nejjata tajui teta pena mata ropobibo, baja ra pakuenia ponü tüpa isotota. ¹⁹ Ma jjüaje penatsi ejjanaejjae pebisia kuene penatsi itsi jjae piabeje jawa pita bünejeba petujjanenü, pena puna ponaejjae Jeroboam pejjüba rutsi namuto pebisia panatsi juma jjuabi jjae pemataka ponae jjae Israel jiwi pemata kaponae jjae pebisia kuene pejjanae nejja. ²⁰ Jjüanü itsa jawanü pejjanaejawa pia saünüta Zimri, ya mujjü jjaniabatsi itaja ra bepe jamatabü jüpaetsi, ¿ma jota apo jumai tsarabenae libro tüje itsa jota nepebetsia ejjana biaba reymonae Israel pijiwi? ²¹ Nejjata Israel monae najua bitsaüto beje najuta. Itsa bitsaüto jamatabü jüpa Tibni Ginat pejjünato, piaja rey nejja, itsa monae pünapona Omri. ²² Omri pepüna ponaewitsi bitsó ajamatabü saü mata tojjenetsia Ginat pejjünato pena püna ponaewi. Baja ra pakuenia tüpa Tibni, Baja ra pakuenia Omri rey nejja patajopa. ²³ Omri tajjü jjüaba pito robijawa Israel monae treinta y uno waita itsanü rey Asa Judá pijinü, ito roba doce (12) pawaibeje. Baja rá ponü ito roba Tirsa werena kuijinae seis (6) pawái beje. ²⁴ Comuata Semer jawabelia pe sasawi momottonü wajüta sesenta y seis (66) pa kilo palata. Baja ra ponü mata koba toma ra nejja momotonü jawata wünü ruba baja rá ponü piaja momotomi. ²⁵ Omri itsi pita bünejewa piaja tujjanenü bitso naita jütsia be anaya ejjana mata tojjenetsia pewajünaya penübe naewi wekua. ²⁶ Baja rá ponü ponapona pebisia namutua Jeroboam pakuenia Nabat pejjünato piaja peya najjuabi jawa kuja ruba Israel monae, anaya ejjana piaja tujjanenü Israel piaja Dioso, piaja dioso nüjji pia matojibimüjji jawabelia. ²⁷ Pakuenia itsamonae nakuijiru itajüta biaba Omri yabaea jjuabeje nakueneba, pesaü baja ra ponü itajüta, ¿apo tó taenü libro jawata apo to yakinaetsi itsa jota yakina pona biaba kae rey kana kujitsia Israel monae? ²⁸ Bajara jjüa kuijinae Omri tüpa mütütatsi itsa pejjünato rey pajja peko wüta. ²⁹ Treinta y tres waita rey Asa Judá pijinü, Acab pejjünato Omri tajjü jjüaba pito robijawa Israel monae. Acab, Omri pejjünato ito roba ponapona Israel pijiwi Samaria jawata veintidos (22) pa waibeje. ³⁰ Acab, Omri pejjünato itsi pebisia kuene kuiji ra tanetsi piaja tujjanenü, bitso penamata jjainaewi wekua. ³¹ Acab nejja apo tsita abejetsi pena ejjanae nejja pakueneta Jeroboam itsi Nadab pejjünato nejjata baja ra ponü barü nakasaba Jezabel pejjünatoyo Etbaal, sidonio piaja rey; baja rá ponü nawajuka Baal jawabia pemata bakabüta na nükeka. ³² Baja rá ponü tona jeba katuteta ibo monae peto na tajuitsi nejja atai Baal nejja, pena jawüka biabi bo, Samaria jawata. ³³ Acab pijia naná kueneba Asera pejumape. Acab rajane bitsoo anaya ejjana piaja petujjanenü DIOSO, Israel piaja Dioso, bitsoo dajjita reyes nüyabeje wekua Israel pijiwi pito robiwi pewajü naya. ³⁴ Pito robi matakabi, Hiel Betel pijinü matakota Jericó. Hiel jeba nuba itsa jota ekajitsia toma rá pematamo Abiram pe beya jjuabi nejjatsi pejjünato matapijinü Segub beje, pejjünato pewüjuato pakuijinae nakueneba baupanü toma ra nejja, pakueni jumaitsi piaja petujjanenü, jjüa tsipaebatsi Josué Nun pejjünato.