¹ Bajara pa matakabi jawabelia Abías, Jeroboam pejjünato, bitso romaebatsi. ² Jeroboam pijiwa jawabelia jumaitsi: "Pejjania kuene ne itsimüre nonotapunare itsakuenia najjatare, tajawamü kuenia peka yapütaeyenewa, Silo jawabelia liamüre, Ahías Dioso jume pe kaponaponaenü bajara jotalia nuka; bajara ponü raja tane jumaitsi jjamú raja reinü tsane, pa tomarataje. ³ Pire diez (10) pa paünbü beje, tortajawaja, jabu wajji yajawa, liamüre Ahías jawabelia. Bajara ponü kajumaitsi tsane pe wajji nakueto yabara." ⁴ Jeroboam pijiwa ajara pakuenia itsi; pitsapa Silo jawabelia patajopa Ahías piji bo jota. Ahías baja apo tae, itajjuto tsüküna penaweretsinü yabara. ⁵ Diosonü jumaitsi Ahías jawabelia, "Jeroboam pijiwa kajaitojo paerena pe kayanijobi nejja pejjunato yabara, baitsi to romaebatsi. Jumaitsimüre powa kuenia, tsipaji pakujinae najetarukaerena, na itsa waya biena. ⁶ Pakujinae Ahías jumetane bajara powa pe tajju bursi pe jone jawa baupa jawarena, bara ponü jumaitsi: "Jonemena Jeroboam pijiwa. ¿De jjuitsi saya na itsawayabame? Ne itoroba pe bisia liwaisi taka jumaitsi nejja. ⁷ Liamüre, jumaitsimüre Jeroboam jawabelia tsipaji Diosonü, Israel piji Dioso, jumaitsije: 'JJanü ka itapetatsi tomara pijiwita ne matakaponaenü nejja taja tomara Israel. ⁸ David piji monae wekua titinajü reino jjamü karajutatsi, baitsi jane jjamü apo be Davimü, pe jjaniawaetsinü pa liwaisi jumaitsinü ne jumekowünüta bitso tane asiwajjae, pe itsi nejja pejjania kuene tae itajjuto itabünejewa. ⁹ Pe bisia kuene itsimü, dajjita matatojjenetsiyo jjamü newajünaya pamonae nubena. Itsimü itsa diosowi, pekobeta petajuitsijawa pe itsi jumepienü, tane anaepanae ejjanae nejjamü, ne naita jjuto jematame. ¹⁰ Bajara jjua yabara, pe bisiakuene nija monae tsijopaenatsi; werebiabanajü dajjita pewajjinakuetonü Israel wekua, pe kütsinütsi ata o apo pe kütsinütsi, tijjitsianajü dajjita jiwi yobeje nija monaejiwi, pakuenia itsa jiwiyo tajuita tasi pe werewerekae jawabelia. ¹¹ Itajju tejema nijamonae jiwiyo patomarataje tüpaenaje awirianü jjaenatsi, pajiwiyo tüpaena petusatota jjaenatsi baratsui atjubüyo piji nüanü, jjanü baitsi nija Diosonünü, jjua jumaitsinü: ¹² Saya nonatapunare, Jeroboam pijiwa, kaewualia nawiaremelia nija boyabelia; pa kujinae joneremelia tomarabelia, penakueto Abías tüpaena. ¹³ Dajjita Israel wünuenatsi yajawa mütjütsianatsi. Kaenü rabaja Jeroboam piji monaejota mütjütsianatsi, Kaenü baitsi bajara ponüta, kajjitaraba Diosonü pe tsita jjanepanae jawatsi, Israel piji Dioso, Jeroboam piji monae jota. ¹⁴ Pijinia, Diosonü itapetsiana Israel jota reinü, pe weretajjubi nejja Jeroboam piji monae pa matakabita. Ajena raja bajara pa matakabi. ¹⁵ Tsipaji Diosonü, jübabena Israel pakuenia Basuebo najübabia meneta, Bajara ponü ya tabu topa jonotsiana Israel jawabelia pa pejjania ira wekuaje bajara ponü pe rajutsi jawa piji salinaewi. Bajara ponü Eufrates mene kujinalia paka kayajatsiana, pa itsimü baitsi Asera pejumapekataejawa bajara jjuata pa naepanae ejjaname Diosonü. ¹⁶ Bajara ponü rajutsiana Israel tomara, Jeroboam pebisiakuene pe itsi jawa yabara, pe itsijjae pebisiakuene, Israel tomara pijinia pebisiakuene ejjana. ¹⁷ Nejjata Jeroboam piji wa nonatapuna nawiarena Tirsa jawaberena. Pakujinae bajarapowa patajopa piji bo jota pejonenejjalia, pewajjinüyo tüpa. ¹⁸ Dajjita Israel pijiwi taenubena pe mütjütsijawa wü nuenubena yajawa, pakuenia bajara pamonae jumaitsitsi Diosonü pe jumeta, bajara ponü pakuenia jumaitsi piji pianinüta Ahías Dioso jume pekaponaponaenü. ¹⁹ Itsa jawa Jeroboam yabara, pe barü nabejawa itsa monae jawabelia, pakuenia yajawa pe itorobijawa, pa bajjutonü pikani yakinejeba Israel piji reyewi yabara. ²⁰ Jeroboam itoroba veintidos (22) pa wai beje bajara jjua kujinae tüpa, mütjütatsi piji salinawi mujjuneneta, juya pijjunato Nadab reinü pe kowüta. ²¹ Aekonojjaeta Roboam, Pejjunato Salomón, itorobanüka Judá tomarata. Roboam pe jjainaenüta cuarenta y uno (41) pa wai beje pakujinae bajara ponü nejjana pe itorobinü (reinü) itoroba diecisiete (17) pa weibeje Jerusalén jota. Pa tomara Diosonü itapeta dajjita Israel wiriawita tsajota Diosonü wünüjonetsia. Pe wünümi piji ena Naama amonitawa. ²² Judá pijiwi itsi jjua tsita pe bisiakuenetsi Diosonü itajjutua; anaepanaya ejjana pebisiakuene pe itsijawata, pajjajiwi matatojjenetsiyo pebisiakuene ejjana. ²³ Pijinia nejjata na to itsi petsuto jumata, ibo bürüanü, jumepe jawanü Asera, kae pinija jumatsuto kanakujitsia, piasaü naejawa büjjüpana kanakujitsia. ²⁴ Pijinia pebijiwi pekana barüyatae nejjatsi bajara jjuajawa nubena. Pamonae itsitsabiabi pe aita jitsibijawanü pe pitsijawanü itsi ma-pamonaeje Diosonü juka Israel tomara jawelia. ²⁵ Cinco (5) pa wei beje Roboam pe itorobi kujinae Sisac Egipto pija reinü, tsimajjü junaina Jerusalén. ²⁶ Bajara ponü kareka penamatamatsi jawanü pebobenae jawa Diosonü pija bojota, yajawa reinü pija bota pepobenae jawa. Dajjita kareka; pijinia kareka Oro jawanü penayajiwi karanatsijawa pe ejjanae jawanü Salomón. ²⁷ Reinü Roboam pija jiwi ejjana penayajiwi karanatsinejja broncejawa to kanawiaba pekobeta capitanü pewetsiwi rajuta, pe wetsiwi nejja reinü pija bo baupa. ²⁸ Pakujinae reinü joneyojopa biaba Diosonü pija bota, pe ewetanubenaewi kaponabiaba; ma jjua kujinaeje kanawiabiabarena pe ewetanübenaewi pija boyaberena. ²⁹ Itsa kuene jawanü yabara pe itsi jawa Roboam, dajjita jjuanü bajara ponü itsi, ¿Apo yakinarubi pe bajjutota kapona pe itsijawanü Judá pija reyewi? ³⁰ Roboam pija wajabitsaü Jeroboam pija wajabitsaü yajawa kae matakabi kanakujitsia natsekona. ³¹ Nejjata Roboam tüpa mütjütatsi pija silinaewita David pija tomarata. Pija ena pewünü Naama amonitawa. pejjünato Abiam reinü naejjana pajja pekowüta.