¹ Kaenü Dioso pija jiwitonü Judá jawelia pitsaba Betel jawabelia Diosonü pe jume kowünütsijjae. Jeroboam, nuka altar jawata pe tajuitsi nejja petujju dere ekae naejawa. ² Dioso pija jiwitonü aü aüjai pejumaitsijawata altar jawabelia Diosonü pe najume itorobijawarena: " ¡Altar, altar! Diosonü raja jjua jumaitsije: Taema, David pija monaeta naetajütsiana penakueto pewünü Josias, jjamüta beyejebiaba sacerdotewi jawabelia atjübüta tsina, aekonojjae tsajota tajuita pe tujjudere ekae naenü. Tajuitsina jiwisitonü." ³ Nejjata, Dioso pija jiwitonü peneta tsita itsi aja pamatakabita, jumaitsi: JJua raja penetaje Diosonü kuikuijaije: Taema, altar anija tupabeje wokowomokaena, ipumana kayajajaikaena irajawa. ⁴ Pakujinae reinü jumetane Dioso pija jiwitonü pe jumaitsijawa, pe aü aüjai jawa altar jawabelia Betel Jota. Jeroboam na kobeyotaba pe itaropitsinejja altar jawelia kujinae, pakuenia jumaitsije, 'pa waetabare'. Bajara jjua kujinae pa kobeta itaropita Dioso pija jiwitonü jawabelia, kobe tsewa, kaewuarena apo nakobe kanawiatsirena. ⁵ Pijinia altar tojjotojjoka anija mujjupabeje, ipumana kayajajaika altar wekua, pe jumaitsi kuenia Dioso pija jiwitonü pe jumaitsi nejja pa liwaisi rajutatsi Diosonü ⁶ Rey Jeroboam jume kanawiata Dioso piji jiwitonü jawabelia, jumaitsije: "jumaitsimüre pejjania kuene ne itsijitsia Diosonü, nija Dioso jawabelia ne to jumaitsimüre, kaewüalia kobe jjanepanajetsianü." Nejjata Dioso piji jiwitonü barükuikuijai Diosonü jawabelia, reinü pekobe kaewüalia kobejjanepana, pe kowü kuenia. ⁷ Reinü jumaitsi Dioso piji jiwitonü jawabelia: "Ponatsibeje boyabelia na nabanianame, karajutsinatsi tane yawenonae jjaemü. ⁸ Dioso piji jiwitonü reinü jawabelia jumaitsi: "Ne tó tsatijitsia atamü tsipae ne jjainae jawa, jjamüta apo ponaenü, pejjaejawa apo jjaenü , mera ata apo apaenü jotaje, ⁹ tsipaji Diosonü pe jumeliwaisita ne itoroba: 'Jjamü pütsa pe jjaejawa jjaneme, mera ata apame, apo nawiatsimü tsane pa namutua renamü.'" ¹⁰ Ajara jjuitsi, Dioso pija jiwitonü itsa namutua pona, apo nawiatsilia piji boyabelia pa namutuarena pata jopa Betel jawaberena. ¹¹ Peruju profetanü pe ponaponaenü Betel jota, pejjünato yajawününü rena jumaitsi-tsi dajjita jjuanü Dioso piji jiwitonü itsi ajara pamatakabi Betel jota. Pijinia pejji jumaitsi-tsi pa liwaisi Dioso piji jiwitonü jumaitsi reinü jawabelia. ¹² Pajja jumaitsi-tsi: "¿De pa namutualia pona?" pejji nejjata tsitajütatsi namuto tsajjuayo Dioso piji jiwitonü pijinia Judá nawialia. ¹³ Nejjata, jumaitsi pejji jawabelia: "Panetó jumaküre Burro jjaü nejja." Nejjata bajara pamonae, to jumaküta burro, yapona bajara ponüta. ¹⁴ Peruju profetanü pe kowüwelia pona Dioso piji jiwitonü jawabelia kajjitajara beta roble nae büjjüpanata; jumaitsi: "¿JJamü tsaja Dioso piji jiwitonümü Judá jawerena ne najetarukaenü?" jume pita: "Jjanü rabaja". ¹⁵ Nejjata, protanü jumatsi ajaraponü jawabelia: "Tapüta boyaberena renamüre na jjaename pejjaejawa." ¹⁶ Dioso piji jiwitonü jume pita: Akuenebi tanawiete kaejawa pijinia ta jonejawa nepüta, akuenebi tajjaejawa, ta apaejawa mera ata jotaje, ¹⁷ tsipaji nejumaitsi aja pakuenia Diosonü: 'Jjamü apo jjaemü tsane kae pejjaejawa ata, apo apaemü tsane mera ata ajara jota, kae namutuarena apo nawiatsimü tsame." ¹⁸ Nejjata, perujunü, Dioso piji jiwitonü jumatsi: "Jjanü ata jara Dioso piji jiwitonünü, pakuenia jjamü, Dioso atjubütatsia pijipianinü ne jumaitsi Diosonü pe liwaisi pakueniaje: 'kanawieremena nija boyaberena, pe na jjaenejja pejjaejawa mera ata pe na apaenejja." Bajara ponü baitsijane yamajjü itojoroba Dioso piji jiwitonü jawabelia. ¹⁹ Nejjata Dioso piji jiwitonü pepüta nawiarena, purujunü Dioso piji jiwitonü piji bo jawaberena, jjane pejjaejawa, mera ata naapa. ²⁰ Pe jjaeyenae jota mesata, pe liwaisi Diosonü tsi patajopatsi kaewüarena pe kanawiatsinü jawabelia, ²¹ ayai jumeta pitabünejewa Dioso piji jiwitonü Judá jawerena pe ponaenü jawabelia jumaitsi: " Diosonü jumaitsi 'De jjuitsia apo jume kowünütsimü Diosonü pe jume, apo jjaniawaetsimü Diosonü peka itorobi jawa, ²² renamü tsajinae baja saya, jjaneme pejjaejawa, mera apame pa tajjunaebota Diosonü ka jumaitsi ne jjae yenewa ata pejjaejawa, mera ata ne apaejawa, apo kamütjütsi tsane ajja jiwi pemujjuneneta.'" ²³ Pe jjae weretsi kujinae, pe apae kujinae ata, profetanü pe kanawianürena, burro to juma küta, Dioso piji jiwitonü nejja, ²⁴ pe lia wajata Dioso piji jiwitonü, namutota kajjitabatsi enianali, beyajjubatsi, jjubabuatatsi namutota. Nejjata nuka burro, enianali ata ajara ponü mujjuneta. Pakujinae jiwi pe najetaru benaiwi ajara jjuayo tayabuatatsi namutota, boka enianali pe tüpaenü mujjuneneta. ²⁵ pakujinae pe najetarubenaewi ajara jjuayo tayabuaba namutota, pe mujjuneneta enianali, ajara pamonae pe taewi paebapalia pe ruju profetanü pe ponapona jawatalia. ²⁶ Pakujinae Dioso jume pe kaponaponaenü pe kanawiatsi nürena jumetane, jumaitsi: "Dioso raja piji jiwitonü apo jume kowünütsi Diosonü jawabelia. Bajara jjuitsia, Diosonü to kanawiata enianali jawabelia, pe mataperebekae nejjatsi, pe beyajjubi nejjatsi yajawa. Pakuenia Dioso pejume jumaitsitsi." ²⁷ Nejjata, peruju Dioso jume kaponaponaenü barü kuikuiji pejji jawabelia, jumaitsije: "Taja burro pa neto jumaküre", bajara pamonae to jumakütatsi. ²⁸ Bajara ponü lia, kajjitajaraba buata, burro yajawa enianali pe tüpaenümujjuneneta. Enianali apo jjae ata, itsakuene jawa ata apo itsi burro jawabelia. ²⁹ Dioso jume pe kaponaponaenü pita pe tüpaenü Dioso piji jiwitonü jawabelia, burro tsijuma buatsia, kaewüarea kanawiarena. piji tomara ya berena siwa najamatabü jjainojo parena, mutju tojoparenanua. ³⁰ Piji mütjuta buata petüpaenü, ajara jjua kujinae ayaijumeta kuikuijai, jumaitsi: "¡Taja yapijinü!" ³¹ Nejjata, pe mütjütsi kujinae, perujunü Dioso jume pe kaponponaenü, pejji jawabelia kuikuijai, jumaitsi: "Pa kujinae tüpaenajü, pane buatsianame pa mutjüta Dioso piji jiwitonü boka. Taja sitonü pa buatsianame piji sitonü mujjuneneta. ³² Baitsi, pa liwaisi bajara ponü jumaitsije Diosonü pejume liwaisi, Betel piji altar yabara, dajjita atjübüyo patajjunaenü, pa bonü Diosonü nejja, Samaria piji tomaranü jawata, ajara pakuenia tsane. ³³ JJuanü tae ataje, Jeroboam kaeto ata apo nakuene kopatsi pebisiakuene pe itsijawa, itajütejemanüanü wünüruba sacerdotewi nejja petsuto jumatatsi, dajjita kuene jiwi. Itajü tejemanü pe to itsinejjatsi, bajara ponü tsata biaba sacerdotenü nejja. ³⁴ JJuaje pe itsijawa pebisiakueneje naejjana Jeroboam piji monae nejja, bajara jjua itsi piji monae pe werewerekae nejja, pe werebiabi nejja pa irawekuaje.