¹ Hua'qui quëran a'na ya'huërë, Pirsia parti copirno ya'coantarin. Inasó, Artaquisi itopi. Ina copirno nisaso' a'nara quëmapi canquirin Papironia quëran canquirin. Inaso', Istrasë itopi. Pa'pinso Siraisë itopi, ina pa'pin Azariasë itopi, ina pa'pionta Hilsiasë, ² ina pa'pin Saromo itopi, ina pa'pionta Satoco, ina pa'pin Aito' itopi, ina pa'pionta, ³ Amaris itopi, ina pa'pionta Azaira itopi, ina pa'pionta Mirai itopi, ina pa'pinso, ⁴ Zëraisë itopi, ina pa'pin Uzi itopi, ina pa'pionta poqui itopi, ina pa'pin, ⁵ Apisoa itopi, ina pa'pionta Huinisë itopi, ina pa'pin Iriasë itopi, ina hui'ninso corto hua'an Aarón itopiso. ⁶ Istrasëso, iraca pënëntërinso nanan noya' nitotaton, a'chinapi ya'conin. ⁷ Ina quiricaquë Sinioro nohuatón Moisësë noshitërin. ⁸ Naporahuatón Siniori noya catahuarin, napoaton Artaquisi copirno ya'ipi na'taninsopita catahuacaso marë quëtërin. Inapoaton inaso papironiaquëran Quirosarinquë huëntarin. ⁹ Artaquisi nani canchisë pi'i copirno ya'coninso nisaso', Quirosarinquë canquipi. Ya'natiirinso yoquiquë ya'natiirinso tahuëri chachin pi'ipi. Siniorori catahuarin ni'ton noya iratopi. ¹⁰ Istrasëso ya'ipi cancanënquëran Sinioro pënëntërinso ya nitotërin. Ina nitotahuatón, no'tëquën natëcaso yonquirin. ¹¹ Artoquisi copirno quirica nishitahuatón, quëtërin. Istrasëso' Corto hua'an. Naporahuaton Sinioro Camaiterinsopita, pënëntërinsopita, inapita noya nitotatón, Israiro'sa a'chintërin. ¹² "Ca Artaquisico copirnoco Istrasënquën nontaranquën, quëmaso corto hua'anquën. Naporahuatón Yosë pëntërinso' noya nitotëran. ¹³ Ca hua'anëtërahuëquë Israiro'sa ya'huëapi, nohuantohuachina corto hua'an Nihuiro'santa, canpitarë' pa'ina. ¹⁴ Ca, capirnoco, inapiquëran canchisë piyapi'sa ca'taninacosopita, canpita ya'huëramaquë, cota huënton Quirosarinquë Yosë tëhuatatuma noya nanán acorinso natëamaranquëma', ¹⁵ Yosë chinotërëhuaso' Quirosarinquë ya'huarin. Ina marë' quëpapi, oro, prata, Israiro Yosënëna natëtona'. ¹⁶ Ya'ipi quëpaco prata oro, Yosë marë, papironiaro'santa ya'ipi quëtopiso' ya'huëpisopitari corto hua'ano'sa inaso' Quirosarin marë Yosë pëimën marë'. ¹⁷ Ina coriquiquëran pa'anaran toroa'huaro'sa, carniro'ahuaro'sa, ohuica'huaro'sa, tricoro'sa huinonta, pa'satëquë Artaro' nisahuatón ahuiquitëquë Yosë pëinën notëtënanquë Quirosarinquë. ¹⁸ Oro prata inapita yasohuachin, a'napitarëquën ma'sona Sinioro costarinso nicatoma' tiquiquë'. ¹⁹ Nisha Nisha ma'sharo'sa Yosë pëinënquë camaicaiso nininso quëmari chachin quëtonquë'. ²⁰ Yosë chinotamaso' marë aquëtë ma'sha pahuanpachin, ma'sha ta'papiquë ma'patëquë'. ²¹ Ca, copirnoco Artoquisisó, nanán acorahuë' coriqui ma'patona'piro'sa, aquë iro'saquë ya'huëpiso, ma'sona tëranta Istrasë natantohuachin quëtamaso' ya'huërin, ²² Coriqui natanpachinquëma pasa huaranca trico nanirinso quëtamaso' ya'huerin, pasa huaranca pino nanirinso quëtocó, pasa huaranca toma pa'tërinso quëtoco', yamoraso' na'conquëhuarë' quëtoco'. ²³ Yosë ina'paquë ya'huatón ma'sona tëranta, natantohuachin quëtacaso' ya'huerin Yosë pëinëmarë', ¿Onpoatonta nanitërin no'huiinpoaso'? ²⁴ Quiyarinma sháhuitarainquëma isonta nitotocó, corto hua'ano'sa nihuiro'sa, cantana'piro'sa, ya'coana to'shitona'piro'sa, inapitaso a'napita pahuërëtopiso pochin co inahuaso pahuërëtapihuë'. ²⁵ Istrasë, quëmaso' Yosë yonquinahuan acorinquën, napoaton chirinchiro'sa acoquë' Yosë nanamën noya nitotopiso acoquë, i'sha aquëtëhuarë ninanoro'sa nininquë acoquë' Yosë nanamën noya nitotopiso'. Naporahuaton co' nitotopisohuë achintëquë Yosë nanamën. ²⁶ Insosona Yosë pënëntërinso ca pënëntërahuëso co'natëhuachinhuë ana'intëquë, atëpatëquë ni'pón, ocoirahuatona a'na ro'tëpa a'painahuë nipón, tahinan pëiquë apo'motë quë' nipon." ²⁷ Istrasë tapon: "Yospariquën Sinioro, quëmaso' yosënquën. Shimashonëhuëpitonta chinotërinënquën. Manoyacha quëmaso' corto hua'an ayonquiran paya, Yosë pëinën noya'piachin nitacaso' marë Quirosarinquë, ²⁸ quëma nohuantón copirno nosororinco. Ina yonquirinsopitanta catahuarinco, a'napita hua'ano'santa napotërinaco, inamarë noya cancatërahuë, chiniquën nanantopiso' ayontonahuë', Sinioro Yosë catahuarinco ni'ton, inapitaro'coi paca'huaiso' marë'.