2 ¹ " Pas i go long ensel bilong sios long Efeses rait olsem; 'Dispela ol toktok i kam long man husait i holim 7pela sta long han sut bilong em na em dispela man husait i save wokabaut namel long ol 7pela stik lam ol i mekim long gol, ² "Mi save long ol samting yupela i bin mekim na ol hatwok bilong yupela na pasin bilong yupela long stap isi na karim hevi. Mi save olsem yupela i no save stap bung wantaim ol manmeri husait i save mekim pasin nogut. Mi save yupela i bin traim pinis ol lain husait i tok olsem ol yet ol i aposel, tasol nogat em ino tru, na yupela i bin painim aut pinis olsem ol i giaman. ³ Mi save olsem yupela i save stap isi na karim hevi, na long nem bilong mi yupela i bin karim planti hevi, na strong bilong yupela ino go daun. ⁴ Tasol mi gat tok long yupela, long wanem, yupela i bin lusim pinis dispela nambawan laikim bilong yupela long mi. ⁵ Olsem na tingim i go bek long wanem hap yupela i bin lusim bilip bilong yupela. Tanim bel na bihainim ol pasin yupela i bin mekim bipo. Sapos yupela ino tanim bel, orait mi bai kam na rausim stik bilong lam bilong yupela long hap ples wei em i save stap. ⁶ Tasol wanpela samting yupela holim pas, em i olsem: Yupela ino save laikim ol pasin ol lain Nikolait i bin mekim, em ol dispela pasin wei mi tu ino save laikim. ⁷ Man igat iau i ken harim wanem tok Spirit bilong Bikpela i wok long tok long ol sios. Man husait i winim pait bai mi givim em tok orait long em bai kaikai long diwai bilong laip wei i stap long gaden bilong God."' ⁸ "Pas i go long ensel bilong sios long Smina; Dispela em ol toktok bilong man husait em i stap long stat na pinis, em dispela man husait i bin dai na i bin kirap bek gen. ⁹ "Mi save long ol hevi bilong pen yupela i karim na mi save tu olsem yupela i stap rabis, tasol yupela i gat planti samting. Mi save long giaman bilong ol lain husait i tok, ol yet i lain manmeri bilong Juda, tasol nogat ol i no bilong Juda. Dispela ol lain i save kamap haus lotu bilong Satan. ¹⁰  Noken pret long ol hevi bai yupela karim. Lukim! Man nogut i laik tromoi sampela bilong yupela i go insait long kalabus long bai ol traim bilip bilong yupela, na yupela bai karim hevi inap long 10-pela dei. Yupela i mas stap strong long bihainim tok bilong mi inap long taim dai i painim yupela na bai mi givim yupela hat king bilong i stap laip. ¹¹  Man i gat iau i ken harim ol toktok Spirit bilong Bikpela i wok long tok long ol sios. Man husait i winim pait bai ino inap tru long kisim bagarap long namba 2 dai.'' ¹²  " Pas i go long ensel bilong sios long Pegamam; 'Dispela em ol toktok bilong man husait i gat bainat wei igat tupela sait bilong em i sap: ¹³  "Mi save long hap yupela i save stap long em, em dispela hap sia king bilong Satan i save stap. Tasol yupela i holim strong yet nem bilong mi. Mi save olsem yupela i no bin haitim bilip bilong yupela long mi, wankain olsem yupela i bin mekim long taim bilong Entipas. Em witnes bilong mi, na wokman bilong mi husait ol i bin kilim em namel long yupela, long dispela hap wei Satan i save stap. ¹⁴  Tasol mi gat sampela liklik tok long yupela: I gat sampela lain bilong yupela long hap husait i holim strong skul tok bilong Balam. Ol dispela lain i bin skulim Balak long paulim ol pikinini manmeri bilong Israel long kaikai dispela kaikai wei ol i bin givim ofa long ol god giaman na bai ol i mekim ol pasin pamuk. ¹⁵  Wankain tasol, yupela i gat sampela lain bilong yupela i holim strong skul tok bilong ol lain Nikolait. ¹⁶  Olsem na yupela tanim bel ! Sapos yupela i no tanim bel, bai mi kam kwiktaim long yupela na kirapim pait wantaim long ol. Bai mi mekim olsem wantaim bainat i stap insait long maus bilong mi. ¹⁷  Man igat iau i ken harim toktok Spirit bilong Bikpela i wok long tok long ol sios. Bai mi givim sampela hait mana bilong heven long man i winim pait, na mi bai givim em wanpela waitpela ston i gat nupela nem ol i bin raitim antap long em. Nogat man bai save long dispela nem tasol man husait i kisim dispela ston em tasol bai save.''' ¹⁸ ' Pas i go long ensel bilong sios long Taiatira; Dispela em ol tok bilong Pikinini Man bilong God husait ai bilong em i olsem paia i lait na lek bilong em i olsem bras ol i bin polisim. ¹⁹  "Mi save pinis long ol samting yupela i bin mekim: em ol pasin bilong yupela long givim bel, na bilip bilong yupela, na wok bilong yupela, na pasin bilong stap isi na karim hevi. Mi save ol samting yupela i bin mekim nau tasol em i moa gutpela long ol samting yupela i bin mekim bipo. ²⁰  Tasol mi gat dispela tok long yupela; Yupela i save laik stap wantaim dispela meri Jesabel husait i kolim em yet profet meri. Na ol skul toktok bilong dispela meri i save paulim ol wokman bilong mi long mekim pasin pamuk na kaikai ol samting ol i bin givim olsem ofa long ol god giaman. ²¹  Mi givim taim long em bai em i tanim bel, tasol em i no laik tanim bel long ol pasin nogut bilong em. ²²  Lukim! Mi bai tromoi dispela meri igo antap long wanpela bet bilong ol sikman, na ol lain husait i mekim ol pasin pamuk wantaim em bai karim bikpela hevi tru, sapos ol i givim baksait long ol pasin bilong dispela meri. ²³  Mi bai kilim idai ol pikinini bilong dispela meri, na olgeta sios bai save olsem mi man i save sekim gut tingting na bel bilong ol man. Na mi bai givim yupela wan wan man pei inap long wanem pasin yupela i bin mekim. ²⁴  Tasol long yupela olgeta manmeri i stap long Taiatira. Yupela olgeta lain husait ino holim pas dispela skul tok, na yupela ino save long ol kain pasin bilong Satan. Mi laik tok olsem long yupela, 'Mi no putim wanpela hevi antap long yupela.' ²⁵  Yupela i mas stap strong yet inap long taim mi kam bek. ²⁶  Man husait i winim pait na i mekim ol samting olsem mi bin mekim na i strong ikam inap long arare, mi bai givim em namba bilong stap hetman bilong ol lain manmeri bilong graun. ²⁷  'Em bai bosim ol lain manmeri wantaim ain stik, na em bai brukim ol olsem em brukim sospen graun i go liklik. ²⁸  Wankain olsem mi bin kisim long Papa bilong mi. Mi bai givim dispela man dispela sta bilong moning ²⁹  Man i gat iau i ken harim wanem Spirit bilong Bikpela i toktok long ol sios.'''