3 ¹ Pas i go long ensel bilong sios long Sadis. Dispela em ol toktok bilong man husait i save holim ol 7-pela spirit bilong God na 7-pela ol sta." Mi save long wanem samting yupela i bin mekin. Yupela gat gutpela nem i mekim yupela i stap laip, tasol yupela i dai. ² Kirap na stretim ol pasin bilong yupela, klostu ol dispela pasin i laik dai, long wanem mi lukim pasin bilong yupela i no stret tru long ai bilong God bilong mi. ³ Olsem na tingim i go bek long ol wanem tok yupela i bin kisim na harim.Bihanim dispela ol tok na tanim bel. Tasol sapos yupela i silip yet, bai mi kam olsem stil man, na yupela bai no inap save long wanem taim mi bai kam long yupela. ⁴ Tasol yu gat sampela nem bilong ol Sadis husait i no bin mekim klos bilong ol i doti, ol bai wokabaut wantaim mi,bai mi givim ol waitpela klos, long wanem ol i bin stap stret. ⁵ Man husait i winim pait em bai putim waitpela klos, Mi bai no inap rausim nem bilong em insait long Buk bilong Laip, na bai mi autim nem bilong em long ai bilong Papa bilong mi, na long ai bilong ol ensel bilong em. ⁶ Man i gat iau em i ken harim wanem samting Spirit i toktok long ol sios". ⁷ Pas i go long ensel bilong sios long Filadelfia: Dispela ol tok em bilong man husat i stap holi na stret-em i holim ki bilong Devit, em i opim dua na nogat wanpela i pasim dua na taim em i pasim dua nogat man bai opim. ⁸ Mi save long wanem samting yupela i bin mekim. Lukim, long ai bilong yupela mi opim dua istap. Nogat man bai inap long pasim dispela dua. Mi save yupela i gat liklik strong, yet yupela i bihainim tok bilong mi na yupela ino bin haitim neim bilong mi. ⁹ Lukim! Ol lain bilong haus lotu bilong seten ol i tok ol yet i lain man meri bilong Juda tasol nogat, ol i giaman lain- Bai mi mekim ol i kam na brukim skru long lek bilong yupela na bai ol i kam luksave olsem mi laikim yupela. ¹⁰  Long taim yupela i bin harim tok bilong mi na yupela i stap isi tru na bihainim tok bilong mi, orait mi tu bai lukautim yupela long taim bilong traim we bai i kam long olgeta man meri husait i stap long olgeta hap bilong graun. ¹¹  Mi kam klostu tru.Holim strong wanem samting yupela i gat na no ken larim wanpela man i kam na rausim hat king bilong yupela. ¹²  Bai mi mekim man husait i winim pait long kamap nambawan pos bilong haus bilong God bilong mi. Na em bai i no inap go bek gen autsait na bai Mi raitim nem bilong God bilong mi na nem bilong siti bilong God (Dispela siti em nupela Jerusalem ,em kam daun long heven long ples bilong God ) na tu wantaim nupela nem bilong mi. ¹³  Man i gat iau em i ken harim wanem samting Spirit bilong Bikpela i toktok long olgeta sios. ¹⁴  Pas i go long ensel bilong sios long Laodisia. Dispela em Olgeta tok i kam long Aman, Dispela em i trupela samting na em i save gut tru long em, em i stap het long ol samting God i bin kamapim. ¹⁵  Mi save long ol samting yupela i bin mekim, na yupela ino bin stap kol na hot wantaim. Mi laik bai yupela i ken stap hot o istap kol tasol. ¹⁶  Long wanem, yupela stap olsem kol na hot wantaim- olsem na long dispela as tasol mi redi long trautim yupela kam autsait long maus bilong mi. ¹⁷  Yupela i save tok, 'Mi gat planti kago na mi gat planti ol arapela samting tu,mi no sot long wanpela samting,Tasol yupela yet ino save olsem yupela i stap trangu, nogat amamas, stap rabis tru, stap ai pas na stap as nating. ¹⁸  Harim gutpela tok mi givim long yupela. Yupela baim gol ol i kukim long paia, na yupela bai i gat planti samting, na tu ol waitpela klos i sain bilong karamapim bodi bilong yupela na no ken sem long skin na wok boi nating, baim oil long putim long ai bilong yupela na lukluk gen. ¹⁹  Mi save skulim olgeta man husait mi save laikim ol na mi save lainim ol long rot bilong stap lai long dispela graun. Olsem na yupela i mas tanim bel tru long bel bilong yupela. ²⁰  Lukim, Mi sanap long dua na mi paitim dua istap. Sapos wanpela man i harim singaut bilong mi na i opim dua. Orait bai mi kam insait long haus bilong em na bai mi sidaun na kaikai wantaim em, na em bai kaikai wantaim mi. ²¹  Bai mi givim tok orait long man husait i winim ol pait na sindaun wantaim mi long sia king bilong mi wankain olsem Mi bin winim pait na sidaun wantaim Papa bilong mi long sia king bilong em. ²²  Man i gat iau em i ken harim wanem samting Spirit bilong Bikpela i toktok long ol sios