1 ¹ Dispela emi i tokhait bilong Jisas Krais we i kamap ples klia, God i bin givim em long soim ol wokman bilong em long ol samting we bai i mas kamap klostu taim. Em i mekim dispela i kamap ples klia taim em i salim ensel bilong em igo long wok man bilong em Jon. ² Jon i tokaut long olgeta samting we em i bin lukim, long tok bilong God na long trupela stori bilong Jisas Krais, olgeta samting em bin lukim. ³ Man husait i ritim aut bikpela tru, na husait i save harim dispela tok profet i kam long God, na husat i save bihainim ol dispela tok we ol i bin raitim insait long dispela tok profet, ol i ken amamas, bilong wanem taim I kam klostu nau. ⁴ Dispela i kam long Jon na i go long ol 7-pela sios long Esia: Larim marimari na bel isi i ken stap wantaim yupela, i kam long man husait i stap nau, na husait i bin stap bipo, na husait bai kam bek, na i kam tu long ol 7-pela spirit husait i sanap arere long sia king bilong em, ⁵ na i kam long Jisas Krais, husait i trupela witnes na husait i nambawan pikinini we i bin kam bek long ples bilong ol dai man. Na man husait i go pas long olgeta king bilong dispela graun. Na Em man husait i laikim yumi tumas na i bin mekim yumi kamap ol fri man na meri long blut bilong Em. ⁶ Em i wokim pinis wanpela kingdom bilong yumi, long kamap pris bilong God na Papa bilong em- glori na pawa em i go long Em oltaim, oltaim. I tru. ⁷ Lukim, em i kam wantaim ol klaut; Olgeta manmeri bai lukim em, wantaim ol lain husait i bin sutim sait bilong em taim em i bin hangamap antap long diwai kros. Olgeta lain man meri bilong dispela graun bai i krai long em. Yes, i tru. ⁸ "Mi yet mi stat na mi yet mi arere bilong olgeta samting," Bikpela i tok, mi husait i stap nau, na husait i bin stap bipo, na husait bai i kam long taim bihain, Mi strongpela," Bikpela God." ⁹ Mi, Jon mi brata bilong yupela husait i save skelim wantaim yupela ol hevi bilong kingdom bilong God, na pasin bilong stap isi na karim hevi we i stap insait long Jisas, mi bin i stap long ailan Patmos, long tok bilong God na tu long trupela stori bilong Jisas. ¹⁰  Mi stap insait long spirit long de bilong Bikpela na mi harim wanpela bikpela nek i krai olsem bigul long beksait bilong mi. ¹¹  Na em i tok, "Raitim olgeta samting yu lukim i go long wanpela buk na salim i go long ol dispela 7-pela sios- i go lo Efesas, i go long Smina, i go long Pegamum, i go long Taiatira, i go long Sadis, i go long Filadelfia na igo long Laodisia." ¹²  Mi tanim i go beksait long lukim nek bilong husait stret i wok long toktok long mi, na taim mi tanim, mi lukim 7-pela stik lam we ol i mekim long ston gol. ¹³  Namel long dispela ol stik lam mi lukim wanpela husait i luk olsem pikinini bilong Man. Em i werim longpela klos i go daun long lek bilong em, na raunim bros bilong em, wantaim wanpela klos we i gat kala bilong ston gol. ¹⁴  Het na gras bilong em i wait olsem skin gras bilong sipsip na i wait tru olsem ais i pundaun. Na ai bilong em i olsem paia i lait. ¹⁵  Lek bilong em i olsem bras ol i polisim- olsem bras we ol i mekim kamap gutpela tru long strongpela paia. Na nek bilong em i olsem krai bilong planti wara i ran hariap tru. ¹⁶  Dispela man i gat 7-pela sta lo han sut bilong em na wanpela bainat we i sap long tupela sait i wok long kam aut long maus bilong em. Na peis bilong em i sain olsem san i sain strong tru. ¹⁷  Taim mi lukim em, mi pundaun long lek bilong em olsem wanpela dai man. Em i putim han sut bilong em long mi na em i tok, "Noken poret. Mi yet mi stat na mi yet mi las, ¹⁸  na mi yet mi man husait i stap laip, Mi bin dai, tasol nau mi stap laip Mi holim ol ki bilong dai na bilong ples bilong ol man i dai pinis. ¹⁹  Olsem na raitim olgeta samting u bin lukim, samting i kamap nau na wanem samting bai i kamap bihain long ol dispela. ²⁰  Na long hait tingting i stap bihain long ol 7-pela sta yu bin lukim i stap long han sut bilong mi na long ol 7-pela stiklam: Ol 7-pela sta i soim ol ensel bilong ol 7-pela sios na ol 7-pela stiklam i soim ol 7-pela sios."