¹ God Yawe i save les tru long ol skel i no stret tasol em i save amamas tru long skelim samting long mak stret. ² Ol man i save hapim nem bilong ol bai kisim sem na ol man i daunim ol yet bai i kisim gutpela tingting. ³ Stretpela man bai bihainim stretpela pasin tasol ol giaman man bai bagarap long pasin bilong ol yet. ⁴ Planti mani samting bai i kamap samting nating long taim bilong kot tasol pasin bilong mekim gutpela wok bai kisim bek yu long ples bilong dai. ⁵ Stretpela pasin bilong man i no gat asua bai helpim em long wokabaut long stretpela rot tasol man nogut bai lus long pasin nogut bilong em. ⁶ Stretpela pasin bilong ol man God i save amamas na ol i stap gut tasol ol samting nogut bai banisim yu olsem umben. ⁷ Taim man nogut i dai, tingting bilong em i save bagarap na strong bilong dispela tingitng tu i save kamap samting nating. ⁸ Hevi bai abrusim stretpela man na bagarapim ol man nogut. ⁹ Long tok man nogut bai bagarapim wantok bilong em tasol long gutpela save ol stretpela manmeri bai i stap gut. ¹⁰ Taim ol stretpela manmeri i stap gut, wanpela biktaun i save amamas tasol taim ol man nogut i dai, ol manmeri i save bikmaus na amamas. ¹¹ God i amamas long ol gutpela presen bilong ol manmeri olsem na biktaun bilong ol i kamap bikpela, tasol long maus bilong ol man nogut i save bagarapim biktaun. ¹² Man nogut i save mekim kranki tok long ol wantok bilong ol, tasol man i gat gutpela save i pasim maus tasol na i no save mekim wanpela tok. ¹³ Man husait i save toktok planti bai i tokaut long hait toktok bilong wantok bilong em, tasol man bilong tok tru i no save toktok long hait tok bilong wantok bilong em. ¹⁴ Sapos i nogat gutpela tingtng bilong givim stia long wokabaut, ol manmeri bai i pudaun, sapos i gat planti man long givim gutpela tingting long gavman, orait kauntri bai stap gut. ¹⁵ Wanpela man i kisim dinau na i no inap long bekim dispela dinau, bihain bai yu i gat bikpela hevi, sapos yu laik i stap gut, yu noken mekim dispela kain promis. ¹⁶ Wanpela meri bilong mekim gutpela pasin ol manmeri save hapim nem bilong em, tasol ol manmeri nogut i laik bungim planti samting tasol. ¹⁷ Gutpela pasin bilong wanpela man inap helpim em yet, tasol man bilong mekim pasin nogut bai bagarapim em yet. ¹⁸ Ol man nogut i mekim giaman tok long kisim pei bilong ol, tasol man husait i mekim stretpela pasin bai i kisim pei tru. ¹⁹ Man husait i save mekim tok tru na stretpela pasin bai i stap laip, tasol man husait i save mekim pasin nogut, bai i dai. ²⁰ God Yawe i save les long ol lain husait i save hambak tasol em save laikim ol lain i nogat asua. ²¹ Yumi mas save long dispela samting, ol man nogut bai i no inap long abrusim bagarap, tasol ol tumbuna lain bilong ol stretpela manmeri bai stap gut. ²² Gutpela meri i nogat gutpela tingting i olsem wanpela gol ring i stap long nus bilong pik. ²³ Bel kirap bilong ol stretpela man bai kamapim ol gutpela samting tasol ol man nogut bai kamapim belhat tasol. ²⁴ Man husait ol i save givim ol samting i go long ol narapela man, ol bai i gat planti samting moa, narapela man i no laik givim samting long ol narapela man em bai kamap tarangu man. ²⁵ Man bilong givim ol samting long ol narapela man bai i gat planti samting na sapos yu givim wara long narapela man, wara long haus bilong yu bai satp yet. ²⁶ Ol manmeri i mekim toktok bilong bagarapim man husait i les long salim kaikai bilong em tasol man em i larim ol i baim kaikai bilong em bai ol bel gut long em. ²⁷ Man i wok strong long painim gutpela pasin bai gutpela samting i kamap long em, tasol man i wok long mekim pasin nogut, em bai painim taim nogut. ²⁸ Man i putim bilip bilong em long ol mani samting bilong em, laip bilong em bai i lus tasol ol stretpela man bai stap gut olsem ol nupela lip bilong diwai. ²⁹ Man husait i kamapim hevi long haus bilong em, bai olgeta samting bilong em bai i lus. Bai ol i larim em i kamap wokman bilong man husait i gat gutpela bel. ³⁰ Stretpela man bai stap olsem diwai bilong givim laip tasol man bilong kamapim kros bai bagarapim laip bilong em. ³¹ Harim! stretpela man bai kisim pei em i wokim long en tasol hamas bai ol man nogut na ol sin manmeri i kisim!