¹ Ol man husait i laikim tumas long kisim gutpela save i larim narapela long stretim ol, tasol man i les long ol i stretim em i olsem longlong man. ² God Yawe i save laikim ol gutpela man, tasol em i larim bagarap i kamap long man i save pasim tok long mekim pasin nogut. ³ Wanpela man i no inap long kisim helpim na kamap strong long bikhet pasin, tasol stretpela manmeri i olsem wanpela diwai rop bilong en i go daun tru long graun na i no inap long kamautim. ⁴ Sapos meri bilong wanpela man i gat gutpela pasin i olsem naispela bilas long het bilong man bilong em, tasol meri i save mekim sem pasin i olsem wanpela sik nogut i stap insait long bun bilong man bilong em. ⁵ Ol tingting bilong gutpela man i stret olgeta, tasol skul tok bilong ol bikhet man i giaman planti. ⁶ Ol toktok bilong bikhet manmeri i olsem birua i weitim rot bilong kilim i dai, tasol ol toktok bilong stretpela man i lukautim ol gut. ⁷ Bikhet manmeri i save kisim bagarap na i pinis olgeta, tasol ol lain bilong stretpela man bai sanap strong oltaim. ⁸ Gutpela man i save kisim biknem long planti gutpela tingting em i gat, tasol man husait i kisim kranki tingting na i tanim toktok nambaut bai ol man i les long em. ⁹ Em i gutpela long mekim wok ol man i no save laikim, olsem wokboi nating o long apim nem bilong em i go antap long wok em i mekim na bihain em i sot long kaikai. ¹⁰ Ol stretpela man i save tingting planti long wanem kaikai bilong animol bilong ol, tasol gutpela pasin bilong bikhet man i olsem pasin nogut tru. ¹¹ Na man i gat gutpela tingting na i wok strong long graun bai i gat planti kaikai, tasol man i nogat gutpela tingting i hatwok nating na dispela i no helpim em. ¹² Ol bikhet man i save laikim tumas pasin bilong ol man nogut ol i kisim long narapela lain, tasol kaikai bilong gutpela pasin bilong stretpela manmeri i kam long ol yet. ¹³ Na man nogut i save hangamap long ol hambak tok bilong em tasol stretpela man i save abrusim ol hevi. ¹⁴ Long kaikai bilong toktok wanpela man i mekim i pulap long ol gutpela samting, wankain olsem wok em i mekim long han bilong em yet i helpim em i stap gut. ¹⁵ Pasin bilong longlong man i stret long ai bilong em yet, tasol man i gat gutpela tingting i harim na bihainim ol skul tok. ¹⁶ Na pasin bilong longlong man i save soim belhat bilong em kwiktaim, tasol man husait i les long pasin bilong tok nogut i save tingting gut pastaim na bekim stret. ¹⁷ Man i toktok long pasin bilong tok tru i save mekim tok long wanem em i stret, tasol man i giamanim man i save mekim tok giaman. ¹⁸ Tok bilong man husait i save tok hariap hariap i olsem man i supim bainat strong, tasol tang bilong man i gat gutpela tingting i olsem marasin i givim bel isi. ¹⁹ Maus bilong man i mekim trupela toktok i save stap oltaim, tasol giaman tok i save stap sotpela taim. ²⁰ Ol lain i pulap long giaman insait long bel bilong ol i olsem ol man i pasim tok long mekim pasin nogut, tasol amamas i kam long ol lain i skulim ol man long stap bel isi. ²¹ Nogat sik i kamap long stretpela man, tasol bikhet manmeri i pulap tru long planti hevi. ²² God Yawe i les long ol man i save tok giaman long maus, tasol ol man i stap stret i mekim em i amamas. ²³ Na man bilong tingting gut i no save tokaut hariap long save bilong en, tasol bel bilong ol longlong man i tok bikmaus nambaut. ²⁴ Ol pasin bilong man i sanap strong bai stret oltaim tasol ol bai hariapim les manmeri long mekim wok. ²⁵ Man i tingting planti long bel bilong em i hevi tumas na dispela i daunim em, tasol wanpela gutpela tok i mekim em i amamas moa. ²⁶ Na stretpela man i kamap olsem gutpela pren long soim rot, tasol rot bilong bikhet man kisim ol i go long rot bilong lus. ²⁷ Ol les manmeri i go long sutim abus bai ol i no inap long kisim, tasol ol man bilong wok hat tru bai i gat planti ol gutpela samting. ²⁸ Man i bihainim stretpela pasin bai kisim laip na long dispela rot yumi no inap painim dai.