12 ¹ Aron na Miriam tupela i no wan bel long Moses na krosim em, long wanem em i maritim narapela meri Kushite ² Ol i tok, ''God Yawe i save toktok wantaim Moses tasol, a? Em no save toktok wantaim mipela tu, a? God Yawe i harim ol toktok bilong tupela Aron na Miriam. ³ Nau dispela man Moses i gat daun pasin,dispela daun pasin bilong em i winim tru ol daun pasin bilong ol narapela manmeri bilong dispela graun ⁴ Hariap tasol God Yawe toktok long Moses, Aron, na Miriam, "Yupela 3-pela kam autsait, go long dua bilong haus sel bilong miting". Ol 3-pela i go kamap long hap. ⁵ Na God Yawe kam daun insait long klaut. Em kam sanap long dua bilong haus sel na singautim Aron na Miriam na tupela wokabaut i kam long em. ⁶ God Yawe i tok,''Yutupela harim tok bilong mi.Taim profet bilong mi stap wantaim yupela, Mi save soim mi yet long em na toktok long em long ol driman ⁷ Wok man bilong mi Moses em i no dispela kain man. Em gutpela wokman tru, em no save les long wok long ol haus bilong mi ⁸ Mi save go stret long Moses na toktok wantaim em, i no long driman o tok bokis. Em i save lukim pes bilong mi. Bilong wanem na yutupela i no pret long toktok long wokman bilong mi Moses? ⁹ Bel hat bilong God Yawe long tupela i winim tru ol narapela bel hat bilong em na em lusim ol na i go. ¹⁰ Klaut kirap antap long haus sel na i go na wan tu Miriam kisim sik lepa-skin bilong em kamap wait olsem sno. Taim Aron tanim pes na lukluk i go long Miriam em lukim sik lepa karamapim bodi bilong em ¹¹ Aron tokim Moses,"O, bikpela bilong mi, plis yu noken holim ol sin bilong mitupela.Mitupela i asua na mekim ol kranki tok na mekim sin pinis. ¹² Plis yu noken larim em stap olsem nupela pikinini i dai pinis long bel bilong mama na mama karim em ¹³ Olsem na Moses singaut long God Yawe, "Plis oraitim em, Bikpela,God Yawe plis ¹⁴ God Yawe tokim Moses, "Sapos papa bilong em bin spetim long pes bilong em, em bai sem na stap long 7-pela dei. Salim em go stap autsait long kem 7-pela dei pastaim. Bihain kisim em kam bek long kem." ¹⁵ Olsem na ol kisim Miriam go stap autsait long kem inap long 7-pela dei. Ol manmeri i no lusim kem na i go, ol i wetim Miriam long kam bek long kem pastaim. ¹⁶ Taim Miriam kam bek long kem bihain long 7-pela dei, ol manmeri lusim ples Haserot na wokabaut i go na kem long ples Paran we nogat man stap long em.