¹ Bikpela God i tok olsem: Dua bilong insait banis long hap san kamap i mas pas long 6-pela dei bilong wok, tasol long dei Sabat na long bikpela dei bilong nupela mun em i mas op. ² Pikinini man bilong king mas i kam long autsait banis olsem long dua bilong varenda, em i mas sanap klostu long pos bilong insait dua taim ol pris i mekim ol ofa bilong em, ofa bilong paia i kukim olgeta na ofa bilong kamap wanbel wantaim mi. Na em i mas lotu long haus bilong dua na i go, tasol dua i no inap pas inap apinun. ³ Ol manmeri long dispela ples tu i mas lotuim God long dispela dua long ol Sabat na long ol nupela mun. ⁴ Ofa bilong paia i kukim olgeta pikinini man bilong king i mas givim long God long de sabat em 6-pela pikinini sipsip na man sipsip i nogat sua samting. ⁵ Em i mas kisim plaua bilong mekim ofa hevi bilong em inap long wanpela kilo bilong man sipsip na plaua bilong mekim ofa wantaim ol pikinini sipsip inap long laik bilong em yet na hap wel inap long plaua em i kisim. ⁶ Long bikpela dei bilong nupela mun em i mas mekim ofa long wanpela bilong ol man bulmakau na 6-pela pikinini sipsip na man sipsip i nogat sua samting. ⁷ Em i mas kisim plaua bilong mekim ofa hevi bilong em inap long wanpela kilo bilong man bulmakau na wanpela kilo bilong man sipsip na bilong piknini sipsip inap long laik bilong em yet na hap wel inap long kilo bilong plaua em i kisim. ⁸ Taim pikinini man bilong king i kam insait olsem long varenda bilong dua, em i mas i go bek long dispela rot. ⁹ Tasol taim ol manmeri bilong dispela ples i kam long God long ol bikpela dei bilong lotu, ol i kam insait long dua i stap long not sait i mas go autsait long dua i stap long saut na ol manmeri i kam insait long dua i stap long saut sait i mas go autsait long dua i stap long not. Wanpela man i noken go bek gen long dua em i kam long en, long wanem em i mas i go autsait stret. ¹⁰ Pikinini man bilong king mas i go insait wantaim ol manmeri na taim ol i kam autsait em tu i mas i kam autsait. ¹¹ Long ol bikpela dei bilong lotu, plaua bilong mekim ofa mas inap olsem wanpela kilo bilong man bulmakau na wanpela kilo bilong man sipsip na bilong pikinini sipsip inap long laik bilong em yet na hap wel inap long olgeta kilo plaua em i kisim. ¹² Taim pikinini man bilong king i laik mekim ofa bilong paia i kukim olgeta o ofa bilong kamap wanbel wantaim mi, dispela dua i stap long hap san kamap i op i stap. Em i mas mekim ofa bilong paia i kukim olgeta na ofa bilong kamap wanbel wantaim mi olsem em i save mekim long dei Sabat na em i mas i go. Taim em i go pinis orait ol pris i ken pasim dispela dua. ¹³ Wantaim dispela, yu mas givim pikinini sipsip em i wanpela krismas tasol na i no gat sua samting olsem ofa i go long God long olgeta moning. ¹⁴ Yu mas givim plaua bilong mekim ofa hevi bilong em inap long 6-pela kilo na 3-pela lita hap wel bilong wetim plaua olsem ofa i go long God long olgeta moning olsem lo i tok. ¹⁵ Ol i mas redim ol pikinini sipsip na plaua na wel bilong mekim ofa bilong paia i kukim olgeta olsem ofa long olgeta moning. ¹⁶ Bikpela God Yawe i tok olsem: Sapos pikinini man bilong king i givim ol graun samting olsem presen long wanpela pikinini bilong em, orait ol dispela i kamap olsem ol samting bilong pikinini. ¹⁷ Tasol sapos em i givim graun samting olsem presen i go long wokman bilong em, orait dispela ol samting bai stap olsem ol samting bilong wokman inap taim bilong givim bek ol samting bilong king i kamap na ol dispela samting i bilong ol pikinini bilong king. ¹⁸ Pikinini man bilong king i noken stilim ol graun samting bilong ol manmeri; em i mas givim ol samting bilong em yet long ol pikinini bilong em na larim ol manmeri i stap long graun bilong ol yet.'" ¹⁹ Dispela man i kisim mi i go insait yet long dua bilong rum tambu bilong ol pris i lukluk i go olsem long not! I gat wanpela ples i stap olsem long hap san igo daun. ²⁰ Na em i tokim mi olsem, "Dispela em i ples bilong ol pris i boilim ol ofa na kukim ol wit bilong rausim ol sin. Ol i noken kisim ol samting bilong mekim ofa i go long autsait banis long wanem ol manmeri i mas i stap holi. ²¹ Na em i kisim mi i go long autsait banis olsem long 4-pela kona bilong banis na mi lukim olgeta kona i gat narapela banis tu i stap. ²² Long ol dispela kona bilong banis i gat 4-pela liklik banis i stap na longpela bilong em inap olsem 40 mita na sotpela bilong em inap olsem 30 mita na olgeta banis i wankain tasol. ²³ Ol pos ol i bin mekim long ston i raunim dispela 4-pela banis na ol ples bilong kukim samting i stap aninit long dispela ol ston pos. ²⁴ Dispela man i tokim mi, "Dispela em ol ples bilong ol wokman bilong tempel bai boilim ofa bilong ol manmeri."