¹ Pikinini bilong man, ''nau, tokaut long mi long bikpela hevi mi bai givim long Gog. 'Bikpela God Yawe i tok olsem, Lukim! Mi bai stap birua bilong Gog na bagarapim em husait i bosim Misek na Tubal. ² Mi bai tanim na kisim yu go, mi bai kisim yu i kam antap long narapela hap bilong not na kisim yu i go long ol maunten bilong Israel. ³ Orait mi bai rausim bunara long han kais bilong yu na mekim spia long han sut bilong yu i pundaun. ⁴ Yu bai pundaun long ol maunten bilong Israel, yu wantaim olgeta ami bilong yu husait i stap wantaim yu. Mi bai givim yu i go long ol pisin na ol traipela wel animol long hap graun olsem kaikai. ⁵ Bikpela God Yawe i tokaut, yu bai pundaun long hap graun i nogat wanpela samting, wanem mi tok em bai i kamap. ⁶ Orait mi bai salim paia i kam na bagarapim Magog wantaim ol lain i stap gut long ol nambis na ol bai save olsem mi God Yawe. ⁷ Mi bai mekim nem bilong mi i stap holi namel long ol manmeri bilong Israel na mi bai no inap larim gutpela nem bilong mi bai ol i bagarapim. olgeta kantri bai i save olsem mi God Yawe i Holi, i stap insait long Israel. ⁸ Lukim! God Yawe i tok, Dispela de i kam na em bai kamap nau. ⁹ Ol lain i stap long biktaun bilong Israel bai i go autsait long kisim ol samting bilong pait na mekim paia na kukim ol. Ol i kisim ol liklik na bikpela hap kapa, ol bunara na spia, ol han klap na ain spia, ol bai mekim paia long ol long 7pela yia. ¹⁰ Bikpela God Yawe i tok, ol bai i no inap go long hap graun long kisim ol diwai bilong mekim paia o ol i no inap katim ol diwai long bikbus, bilong wanem ol bai mekim paia bilong kukim kaikai long ol samting bilong pait. Ol bai kisim samting bilong husait ol i laik kisim long ol, ol bai i kisim moni na ol samting bilong husait ol i laik kisim long ol. ¹¹ Orait em bai kamap long dispela dei we mi bai mekim matmat ples bilong Gog long Israel long hap graun i no gat maunten long en, em i rot bilong go long solwara long hap san i kamap. em bai pasim rot bilong ol lain husait i laik i go long narapela sait. Long dispela hap ol bai planim Gog wantaim olgeta samting bilong em. Ol bai kolim dispela ples em Ples Daun bilong Hamon Gog. ¹² Long 7pela mun, ol manmeri bilong Israel bai planim ol na weit liklik long graun i mas kamap gutpela gen. ¹³ Olgeta manmeri bilong dispela ples bai i planim ol na em bai stap olsem wanpela dei bilong ol Israel long tingim wanem i bin kamap taim mi kisim biknem, Bikpela God Yawe i tok klia. ¹⁴ Orait ol bai makim ol man bilong go long olgeta hap graun long painim ol lain husait i raun tasol i dai na ol bodi bilong ol i stap antap long graun, bai ol i kisim na planim long mekim graun i stap gut. Long pinis bilong namba 7mun bai ol i mekim dispela wok long painim aut. ¹⁵ Taim ol dispela man i go long ol dispela hap graun na taim ol i lukim ol bun bilong ol man i dai pinis, ol bai putim mak long em inap ol man bilong digim graun bilong planim man i kam na plainim ol long ples daun bilong Hamon Gog. ¹⁶ Bai i gat wanpela biktaun long dispela hap ol i kolim nem bilong en Amona. Long dispela as bai ol i mekim graun i kamap gutpela. ¹⁷ Bikpela God Yawe i tok olsem, nau long yu, pikinini bilong man, tokim ol pisin i gat wing na ol traipela wel animol i stap long hap graun long kam na bung wantaim. Bung klostu raunim ofa mi yet mi mekim bilong yu, bikpela ofa long ol maunten bilong Israel long yu bai kaikai bodi bilong man na dring blut bilong ol. ¹⁸ Yu bai kaikai bodi bilong ol man bilong pait na dring blut bilong ol pikinini man bilong king bilong dispela graun, ol bai i kamap olsem ol sipsip man, yangpela sipsip, meme na bulmakau i gat gutpela gris, ol i bin lukautim long Basan. ¹⁹ Orait yu bai kaikai gris inap yu pilim pulap, yu bai dring blut inap yu spak, dispela bai i olsem ofa mi bai kilim na mekim long yu. ²⁰ Yu bai pilim pulap tru long kaikai long tebol bilong mi wantaim hos, karis, ol strongpela man bilong pait na ol man i stap long pait. God Yawe i tok olsem. ²¹ Mi bai i gat biknem tru namel long ol kantri na olgeta kantri bai lukim bikpela kot bilong mi, mi bai mekim pasin mi bin mekim long bagarapim ol wantaim han bilong mi. ²² Ol manmeri bilong Israel bai save olsem mi God Yawe bilong ol long nau na bihain tu. ²³ Olgeta kantri bai save olsem ol manmeri bilong Israel i bin go kalabus long hait pasin nogut bilong ol we ol i bin mekim na ol i no harim tok bilong mi, mi haitim pes bilong mi long ol na givim ol i go long han bilong birua bilong ol long ol bai kilim ol wantaim bainat. ²⁴ Mi haitim pes bilong mi, taim mi mekim dispela samting long ol long wankain mak bilong pasin doti na sin bilong ol, ²⁵ Olsem na God Yawe i tok, mi bai kamapim na putim gen olgeta gutpela samting bilong Jekop na mi bai gat bikpela sori long olgeta manmeri bilong Israel, mi mekim dispela long mekim holi nem bilong mi i mas i stap antap. ²⁶ Orait ol bai karim sem bilong ol na pasin nogut bilong ol we ol i bin mekim long en. Ol bai lus tingting long ol dispela samting taim ol i malolo gut long graun bilong ol, i nogat wanpela man bai i mekim ol i pret. ²⁷ Taim mi kisim ol i kam bek long ol manmeri na bungim ol i kam bek long graun bilong ol birua bilong ol, mi bai soim mi yet long ai bilong ol arapela kantri olsem mi holi. ²⁸ Nau ol bai save olsem Mi God Yawe bilong ol, long wanem mi salim ol i go stap kalabus long ol narapela kantri, tasol nau mi bai kisim ol i kam bek long graun bilong ol na mi no inap lusim wanpela bilong ol i stap namel long ol narapela kantri. ²⁹ Mi bai i no inap moa long haitim pes bilong mi long ol taim mi kapsaitim spirit bilong mi long ol manmeri bilong Israel, dispela em wanem God Yawe i tok.