¹ Tok bilong God Yawe i kam long mi, na i tok olsem, ² "Pikinini bilong man, putim pes bilong yu i go olsem long Gok, long graun bilong ol lain Magok long bikman bilong ol manmeri bilong Mesie wantaim ol Tubal na tokaut long wanem samting bai i kamap bihain long em. ³ Na tokim em olsem, 'Bikpela, God Yawe i tok olsem, Harim! Mi gat tok long yu, Gok, bikman bilong ol manmeri bilong Mesie na Tubal. ⁴ Olsem mi bai tainim yu na putim huk long maus bilong yu, mi bai rausim yu i go aut wantaim olgeta ami na ol hos bilong yu na ol man bilong sindaun long hos na pait bai olgeta i werim ol klos pait bilong ol na bikpela lain ami wantaim bikpela hap plang na liklik hap plang na olgeta i holim ol bainat! ⁵ Na ol lain Pesia wantaim Kus na ol Libia i go wantaim ol na olgeta i holim ol hap plang na ol hat kapa bilong ol! ⁶ Goma na olgeta ol ami bilong em na Bet Togarma, ol bilong hap not i stap longwe tru wantaim olgeta ami bilong em! Planti manmeri i stap wantaim yu! ⁷ Redim yupela yet! Yesa, redim yu yet na ol ami bilong yu bai bung wantaim yu na yu kamap bos bilong ol. ⁸ Bihain long sampela dei na yia yu bai singaut long go na pait wantaim ol lain Israel husait ol i bagarap long bikpela pait na ol i kam bung long ol mauntain ples bilong ol Israel.Tasol ol bai kisim ol manmeri i kam ausait long dispela ples na ol bai i stap gut. ⁹ Olsem na yu wantaim olgeta ami na soldia bilong yu i pulap tru olsem klaut i karamapim graun na bai yupela i go antap olsem bikpela ren i go. ¹⁰ Bikpela, God Yawe i tok olsem, em bai kamap long dispela dei, taim yu kamapim hait tingting bilong pait na mekim pasin i nogut tru insait long bel bilong yu. ¹¹ Orait yu bai tok, 'Nau mi bai go antap long ples i bikpela long en, mi bai go long ol manmeri i save stap isi na lukautim ol yet, olgeta i stap long hap i no gat banis i raunim ol na i nogat bikpela dua bilong biktaun. ¹² Na ol i stap namel tru long ol bikpela kantri, em ol dispela manmeri husait i kisim bagarap long pait na ol i kamapim niupela sindaun na ol i gat planti bulmakau na planti ol gutpela samting tu, mi bai go pait long dispela ples na stilim olgeta mani na ol gutpela samting bilong ol.' ¹³ Na ol lain Seba na Ditan na ol bisnis man bilong Tasis wantaim ol yangpela soldia bai i askim yu na tok, "Ating yu kam long ol gutpela samting a? Ating yu na ol ami bilong yu i bung long bagarapim na kisim olgeta silva na gol na ol bulmakau na kisim olgeta gutpela samting i go a?" ¹⁴ Olsem na pikinini bilong man, tokaut long Gok olsem,'Bikpela God Yawe i tok olsem, Long dispela dei taim ol manmeri bilong mi Israel i stap gut, bai yu no inap save long ol a? ¹⁵ Yu bai kam long hap not i stap longwe tru wantaim bikpela lain ami bilong yu na ol ami bilong ol ples i stap klostu long yu wantaim bai olgeta i sindaun long hos na kam olsem bikpela lain ami tru. ¹⁶ Yu bai go pait long ol manmeri bilong mi Israel olsem klaut i karamapim graun. Insait long tupela dei bai mi givim yupela long han bilong ol lain bilong mi, wanem pasin mi mekim long yu Gok, bai soim ol manmeri bilong narapela ples olsem mi bai stap holi long ai bilong ol. ¹⁷ Bikpela God Yawe i tok, Em mas yu no wanpela bilong ol dispela lain mi bin tok long en long maus bilong ol wokman bilong mi sampela yia i go pinis, em ol profet bilong Israel, husait ol i bin tokaut bipo olsem bai mi givim yu long han bilong ol? ¹⁸ Belhat bilong mi bai kapsait, long dispela dei taim Gok i go pait long graun bilong Israel, Bikpela God Yawe i tokaut long dispela. ¹⁹ Insait long belhat na kros, Mi laik tokaut olsem dispela dei bai i gat bikpela graun guria i kamap long graun bilong Israel. ²⁰ Ol bai guria na pret long mi, ol pis bilong sol wara na ol pisin bilong skai na ol wel abus bilong bus na olgeta ol animol i save raun long graun na olgeta manmeri i save stap antap long graun. Ol maunten bai i bruk na ol ples nogut long sait bilong maunten bai i bruk, inap olgeta bikpela banis i pundaun long graun. ²¹ Mi bai mekim em long pait wantaim ol brata bilong em na ol lain ami bilong em bai pait long ol yet na kisim bagarap long olgeta maunten ol i pait long en, dispela em Bikpela God Yawe i tokaut. ²² Orait mi bai kotim em long bikpela pen na kapsaitim blut na bikpela ais ren wantaim paia long ston bai mi kapsaitim antap long em na ol ami bilong em na ol narapela kantri tu i kam wantaim em. ²³ Long mi laik soim bikpela strong na stretpela pasin bilong mi na mi laik mekim mi yet ples klia long ai bilong planti manmeri bilong narapela kantri na ol bai i ken save olsem mi yet mi God Yawe."