¹ Han bilong God Yawe i stap antap long mi na Spirit bilong God Yawe i kisim mi na go putim mi long ples daun namel long ol bun bilong ol man i dai pinis i pulap long en. ² Bihain em i mekim mi abrusim ol na raunim olgeta hap ol dispela bun i stap long en. Lukim! Gutpela namba bilong ol i stap long olgeta hap. Lukim! Olgeta i drai nogut tru. ³ Em i tokim mi olsem, "Pikinini bilong man, ol dispela drai bun inap kisim laip gen a?" Olsem na mi tok, "Bikpela God Yawe, yu tasol i save pinis long dispela samting bai i kamap." ⁴ Na em i tokim mi, "yu autim tok long ol dispela bun i drai pinis na tokim ol, 'Ol drai bun. Harim tok bilong God Yawe. ⁵ Na Bikpela God Yawe i tokim ol dispela drai bun olsem. Harim! Mi yet bai putim win insait long yupela na yupela bai i stap laip. ⁶ Mi bai mekim olgeta rop na mit i kamap antap long yupela. Mi bai karamapim yupela wantaim skin na putim win insait long yupela na bai yupela i stap laip. Orait bai yupela i save olsem, Mi yet mi God Yawe.'" ⁷ Olsem na mi tokim yupela long olgeta samting Bikpela i tokim mi, taim mi autim tok yet, lukim, wanpela singaut i kam wantaim bikpela guria. Orait olgeta bun i kam bung wantaim ⁸ Taim mi lukluk na harim, wantu ol rop na mit i kamap long bun bilong ol na bihain skin i karamapim ol. Tasol ol i nogat laip. ⁹ Orait God Yawe i tokim mi olsem, "tokim olgeta drai bun long kisim win, tok profet long Pikinini bilong man na tokim ol long kisim win. 'Bikpela God Yawe i tok olsem, tok bilong mi long kisim laip i mas kam long 4pela hap na i givim laip long ol dai man long kisim laip.'" ¹⁰ Orait mi tok profet long wanem em bin tokim mi, win i kam insait long ol na ol i stap laip. Orait ol i sanap long lek bilong ol, olsem ol bikpela ami. ¹¹ Orait God Yawe i tokim mi, "Pikinini bilong man, olgeta dispela drai bun i makim olgeta manmeri bilong ol Israel. Lukim! Olgeta i tok olsem, 'Olgeta bun bilong mipela i drai pinis na mipela i wetim dispela taim long kamap na em i kamap pinis.' ¹² Olsem na tok profet na tok olsem, 'Bikpela God Yawe i tok, Harim! Ol manmeri bilong mi, bai mi opim olgeta matmat na rausim yupela long hap. Bai mi kisim yupela i go bek long Israel. ¹³ Ol manmeri bilong mi, taim mi opim olgeta matmat na kisim yupela i kam autsait, yupela bai save olsem mi yet Mi God Yawe. ¹⁴ Mi tokaut na bai mi mekim olsem wanem mi bin tok. Bai mi putim Spirit bilong mi insait long yupela na yupela bai stap laip na bai mi mekim yupela i malolo long ples bilong yupela taim yupela i save olsem mi yet Mi God Yawe. Dispela em i tok bilong God Yawe.'" ¹⁵ Orait tok bilong God Yawe i kam long mi na i tok olsem, ¹⁶ "Olsem na yu, Pikinini bilong man, kisim wanpela stik bilong yu yet na rait antap long en, 'Dispela em i makim ol Juda na ol manmeri bilong Israel i kamap pren.' Orait kisim narapela stik na rait antap long en, 'Dispela em i makim Josep na ol hap lain bilong Efram na ol manmeri bilong Israel, ol i kamap pren.' ¹⁷ Kisim tupela stik i kam putim wantaim na tupela bai kamap wanpela tasol long han bilong yu. ¹⁸ Taim ol manmeri i toktok long yu, Dispela stik i makim wanem samting na yu no tokim mipela?' ¹⁹ orait tokim ol, 'Bikpela God Yawe i tok olsem, Lukim! Mi kisim liklik hap lain bilong Josep em i bin stap long han bilong ol Efram na lain bilong ol Israel olsem ol i kamap pren na putim wantaim ol lain bilong Juda, olsem bai ol i kamap wanpela lain tasol na ol bai i kamap wanpela long han bilong mi.' ²⁰ Long taim yu bin raitim long ol hap diwai, yu mas holim long ai bilong ol bai ol i lukim. ²¹ Tokaut klia long ol, 'Bikpela God Yawe i tok olsem, Lukim! Mi yet inap long kisim ol manmeri bilong Israel insait long olgeta kantri we ol i go long en. Mi bai bungim olgeta i stap long olgeta hap graun na mi bai kisim ol i go long graun bilong ol yet. ²² Mi bai mekim ol i kamap wanpela lain manmeri long dispela ples maunten bilong ol lain Israel na bai ol i gat wanpela king tasol i lukautim ol na ol bai i no moa i stap tupela lain manmeri. Ol bai i no moa skel i go long tupela lain manmeri. ²³ Orait ol bai i no inap bagarapim ol yet wantaim ol god giaman bilong ol na olgeta pasin nogut ol i bin mekim. Mi bai lukautim yupela long olgeta bilip bilong yupela i no strong wantaim olgeta pasin nogut bilong yupela na mi bai rausim olgeta pasin nogut bilong yupela na mekim yupela i kamap klin, olsem yupela bai i kamap ol lain manmeri bilong mi na mi bai i stap God bilong yupela. ²⁴ Devit, wokman bilong mi bai i kamap king bilong yupela. Olsem dispela bai i kamap wanpela gutpela wasman i lukautim olgeta lain manmeri na ol bai i wokabaut long ol lo bilong mi na yupela bai i lukautim lo bilong mi na bihainim. ²⁵ Ol bai i stap long graun mi bin givim long wokman bilong mi Jekop, we ol papa bilong yupela i bin i stap bipo. Ol bai stap long en oltaim, olgeta pikinini na olgeta tumbuna pikinini bilong Devit wokman bilong mi bai i kamap lida oltaim. ²⁶ Bai mi kamapim pasin bilong mekim kontrak wantaim wanbel pasin long ol. Em bai i stap oltaim wantaim ol. Na bai mi mekim ol i kamap planti na mekim ol i kamap haus holi bilong mi namel long ol. ²⁷ Ples bilong mi long malolo bai i stap wantaim ol na mi bai i stap God bilong ol na ol bai i stap ol lain manmeri bilong mi. ²⁸ Mi yet mi God Yawe i bin kisim ol manmeri bilong Israel long pasin nogut bilong ol na haus holi bilong mi bai i stap namel long ol oltaim.'"