19 ¹ Na long taim King Hesekia i harim stori bilong ol, em i brukim klos bilong em na em i pasim klos bilong sori na i go insait long haus bilong God Yawe. ² Em i salim Eliakim, em man bilong lukautim haus na Sebna em kuskus na ol hetman bilong ol pris olgeta i pasim klos bilong sori na ol i go long profet Aisaia, pikinini bilong Amos. ³ Ol i tokim em olsem, "Hesekia i tok, ' Dispela dei em i dei bilong pilim nogut, mekim strongpela tok bilong stretim man na pilim sem na i olsem taim mama i laik karim pikinini tasol em i nogat strong bilong karim pikinini. ⁴ Ating God Yawe, God bilong yupela bai i harim olgeta tok bilong nambawan kepten bilong ami, em king bilong Asiria na masta bilong en i salim em i kam long tok bilas long God i stap laip oltaim na God Yawe, God bilong yupela bai mekim save long ol long wanem ol tok ol i mekim. Olsem na yupela beten long ol lain i stap yet."' ⁵ Olsem na ol wokman bilong King Hesekaia i kam long Aisaia, ⁶ na Aisaia i tokim ol olsem, "tokim masta bilong yupela, 'God Yawe i tok, "yupela i no ken pret long ol toktok yupela i harim, em ol wokman bilong king bilong Asiria i mekim long mi. ⁷ Harim, bai mi putim wanpela spirit long em, na em bai harim sampela tok na i go bek long graun bilong em. Bai mi mekim em i pundaun long bainat long graun bilong em yet.'"" ⁸ Bihain nambawan kepten bilong ami i kam bek na lukim olsem king bilong Asiria i pait wantaim Libna, em i harim pinis olsem king i lusim ples Lakis. ⁹ Bihain Senekerib i harim olsem Tiraka king bilong Kus na Isip i bung long pait wantaim em, olsem na em i salim ol man bilong givim toksave i go bek gen long Hesekaia, ¹⁰ "Tokim Hesekaia king bilong Juda olsem, 'noken larim God yu bilip long em i giamanim yu na tok, "Jerusalem bai i no inap go long han bilong king bilong Asiria." ¹¹ Lukim, yu harim pinis wanem ol king bilong Asiria i bin mekim long olgeta graun na bagarapim ol olgeta. Yu bai inap helpim yu yet? ¹² Ating ol god bilong ol dispela ples i helpim ol, em ol ples ol papa bilong mi i bin bagarapim, Gosan, Haran, Resef na ol manmeri bilong Iden long Tel Asa? ¹³ Ol king bilong Hamat, king bilong Apad na king bilong ol biktaun bilong Sefavaim, na bilong Hena na Iva i stap we?"" ¹⁴ Hesekaia i kisim dispela pas long ol man bilong givim toksave na ritim. Bihain em i kisim i go long haus bilong God Yawe na putim long pes bilong em. ¹⁵ Na Hesekaia i beten long God Yawe na i tok, "God Yawe i save stap oltaim, God bilong ol Israel, yu sindaun antap long ol ensel, yu tasol yu God bilong olgeta kingdom long dispela graun. Yu wokim heven na graun i kamap. ¹⁶ God Yawe putim yau bilong yu na harim. God Yawe opim ai bilong yu na lukim na harim ol tok bilong Senakerib, wanem ol tok bilas em i mekim long God i stap laip oltaim. ¹⁷ Tru tumas, God Yawe, ol king bilong Asiria i bagarapim ol ples na graun bilong ol. ¹⁸ Ol i kukim ol god giaman bilong ol long paia, long wanem ol i god giaman ol man i wokim long diwai na ston long han bilong ol yet. Olsem na ol lain bilong Asiria i bagarapim ol. ¹⁹ Olsem na God Yaweh, God bilong mipela, mi askim yu long helpim mipela, long pawa bilong em, olsem na olgeta kingdom bilong graun bai save olsem yu God Yawe, wanpela God tasol." ²⁰ Na Aisaia, pikinini bilong Amos i salim tok i go long Hesekaia na i tok, "God Yawe, God bilong ol Israel i tok, ' Yu bin beten long me na askim long Senakerib king bilong Asiria na mi harim beten bilong yu. ²¹ Dispela em tok bilong God Yawe, "Pikinini meri bilong Saion em i no marit yet i lap long yu na daunim yu. Pikinini meri bilong Jerusalem i tanim het bilong em long yu. ²² Yu tok bilas long husait? Yu singaut long husait na litimapim nem bilong yet? Yu mekim long Bikpela bilong Israel em i stap holi! ²³ Ol man bilong givim toksave i bin tok baksait long Bikpela olsem, ' Mi bin i go antap long ol bikpela maunten na long het bilong ol maunten bilong Lebanon wantaim ol karis bilong mi. Bai mi katim ol longpela diwai sida na gutpela diwai saipres long hap. Bai mi go insait tru long bikbus i gat olgeta samting i stap long en. ²⁴ Mi bin wokim hul wara na mi bin dring wara bilong ol narapela lain. Mi mekim drai olgeta wara bilong Isip aninit long lek bilong mi.' ²⁵ Yupela i no bin harim na luksave long tingting bilong mi long bipo taim? Olsem na nau mi mekim em i kamap pinis. Yupela i kam hia long brukim ol biktaun i gat strongpela banis i go bagarap olgeta. ²⁶ Ol manmeri i bagarap na i nogat strong. Ol i olsem ol gras i kamap nabaut long graun na i olsem gras i stap antap long het bilong haus o long graun na i drai pinis na i no kamap. ²⁷ Tasol mi save long taim yu sindaun na long taim yu raun nabaut na taim yu belhat moa long mi. ²⁸ Long wanem yu bin belhat long me, olsem na kros bilong yu i kamap long yau bilong mi, bai mi putim huk long nus bilong yu na bai mi putim ain long maus bilong yu na bai mi salim yu i go bek long rot yu bin kam long em." ²⁹ Dispela bai kamap olsem mak. Long dispela yia na yia bihain bai yupela i kisim kaikai nating long wanem ol samting i kamap long gaden. Tasol long namba tri yia yupela i mas planim na kaikai, planim diwai wain na kisim frut bilong en. ³⁰ Ol manmeri bilong Juda ol i no dai na i stap yet bai stap gut na kamap planti. ³¹ Long Jerusalem ol lilik lain manmeri bai i stap, long Maunten Sion ol manmeri i stap yet bai i kam. God Yawe i gat olgeta strong bai mekim olsem. ³² Olsem na God Yawe i tok olsem long king bilong Asiria, "Em bai i no inap kam insait long biktaun na sutim spia long hia. Na tu em bai i no inap kam wantaim hap plang na kam wantaim ami na banisim ples. ³³ Dispela rot em i bin kam long en, olsem tasol em bai i go bek gen long dispela rot, em bai i no inap go insait long dispela biktaun. God Yawe i tok olsem." ³⁴ Bai mi banisim na lukautim dispela biktaun, long biknem bilong mi yet na wokman bilong mi, Davit."" ³⁵ Long wanpela nait ensel bilong God Yawe i go raun na pait wantaim ol lain bilong Asiria na kilim 185,000 soldia. Taim ol man i kirap long moning, ol i lukim ol man i dai na slip nabaut long olgeta hap. ³⁶ Olsem na Senakerib king bilong Asiria i lusim Israel na i go bek long ples bilong em na stap long Ninive. ³⁷ Bihain, em i lotu insait long haus bilong Nisrok god giaman bilong em, ol pikinini man bilong em Adramelek na Sareja i kilim em wantaim bainat na ranawe go hait long graun bilong Ararat. Bihain pikinini man bilong em Esadon i kamap king na kisim ples bilong em.