14 ¹ Long namba tu yia bilong Jeoas, pikinini bilong Jeoahas king bilong Israel, Amasia, pikinini bilong Joas, king bilong Juda i kamap king. ² Em i gat 25 krimas long taim em i kamap king, em i stap king long Jerusalem 29 krismas. Nem bilong mama bilong en, em Jehoadan bilong Jerusalem. ³ Em i mekim stretpela pasin long ai bilong God Yawe, tasol i no olsem tumbuna bilong em Devit i mekim, em i mekim olgeta samting olsem papa bilong em Joas i bin mekim. ⁴ Tasol em i no rausim ol dispela ples bilong lotuim god giaman, olsem na ol manmeri i save go yet na mekim ofa na kukim ofa bilong mekim smok i gat gutpela smel. ⁵ Long taim em i bosim strong kantri bilong em, em i kilim ol dispela wokman i bin kilim papa bilong em, King Joas. ⁶ Tasol em i no kilim ol pikinini bilong dispela ol wokman, nogat, em i bihainim lo i stap long buk Moses i givim, olsem God Yawe i tok. "Sapos piknini i mekim rong, yupela i noken kilim i dai papa mama na sapos papa mama i mekim rong, yupela i noken kilim i dai pikiinini. Husait i mekim rong, em tasol yupela i kilim. ⁷ Em i kilim 10 tausen soldia bilong Idom long Ples Daun i gat Sol na em i kisim bek taun Sela na i givim nem Joktel long dispela taun na nau tu ol i save kolim dispela nem. ⁸ Na bihain Amasia i salim ol man bilong toksave i go long Jeoas pikinini bilong Jeoahas, pikinini bilong Jehu, king bilong Israel na i tok "Yu kam na yumi pait." ⁹ Tasol Jehoas king bilong Israel i bekim tok i go long Amasia king bilong Juda na i tok olsem, "Liklik gras i stap long Lebanon i salim tok i go long sida diwai i stap long Lebenon olsem, "Givim piknini meri bilong yu na em bai maritim pikinini man bilong mi, tasol wanpela wel abus bilong Lebanon i wokabaut i kam na i krungutim dispela liklik gras. ¹⁰ Yu bin pait long ol Idom na winim ol, olsem na yu amamas na litimapim nem bilong yu yet. Olsem na yu ken amamas na stap gut long haus, maski long kamapim pait. Bilong wanem na yu kamapim hevi bilong yu na ol Juda wantaim?" ¹¹ Tasol Amasia i no harim tok. Olsem na Jeoas king bilong Israel na Amasia king bilong Juda i pait long Bet Semes bilong Juda. ¹² Ol Israel i winim ol Juda na olgeta man i ranawe i go long ples bilong ol. ¹³ Jehoas king bilong Israel i holimpas Amasia pikinini bilong Jeoas king bilong Juda long Bet Semas. Em i brukim banis long Jerusalem, stat long Dua bilong Efraim i go inap long Dua bilong Kona, inap olsem 200 mita. ¹⁴ Em i kisim olgeta gol na silva na olgeta samting i stap insait long haus bilong God Yawe. Ol i holim pasim ol man na kisim ol samting i dia tumas i stap long haus bilong king na i go bek long Samaria ¹⁵ Olgeta narapela samting Jehoas i bin mekim na ol strongpela wok na ol pait em i bin pait wantaim Amasia king bilong Juda, i stap long buk bilong ol king bilong Israel. ¹⁶ Bihain Jehoas i dai na ol i planim em long matmat bilong ol king bilong Israel. Jeroboam pikinini bilong em i kamap king na kisim ples bilong em. ¹⁷ Jehoas pikinini bilong Jeoahas, king bilong Israel i dai na Amasia pikinini bilong Joas, king bilong Juda i stap 15 pela krismas moa na i dai. ¹⁸ Ol narapela samting Amasia i bin mekim, ol i raitim long stori buk bilong ol king bilong Juda. ¹⁹ Amasia i stap long Jerusalem na sampela man i pasim tok long kilim em i dai na em i ranawe i go long Lakis tasol ol man i bihainim em i go na kilim em long Lakis. ²⁰ Ol i putim bodi bilong em long hos na karim em i kam bek na ol i planim em wantaim ol tumbuna bilong em long biktaun bilong Devit. ²¹ Olgeta manmeri bilong Juda i kisim Asaria, dispela pikinini i gat 16 krismas na makim em i kamap king bilong senisim papa bilong em Amasia. ²² Asaria i go pait na kisim bek Elath na givim i go long Juda, bihain long em i planim King Amasia long matmat bilong ol tumbuna bilong em. ²³ Long 15 yia bilong Amasia, pikinini man bilong Joas king bilong Juda, Jeroboam pikinini man bilong Jeoas king bilong Israel i bosim Samaria, em i bosim inap long 41 yia. ²⁴ Em i mekim pasin nogut long ai bilong God Yawe. Em mekim wankain ol pasin nogut olsem Jeroboam pikinini man bilong Nebat i bin mekim ol Israel i pundaun long sin. ²⁵ Em i pait na i kisim bek mak bilong ol graun bilong Israel long Ples Amat i go inap long solwara bilong Araba, em i mekim olsem God Yawe i tok, dispela God bilong Israel, dispela tok i kam aut long maus bilong wokman bilong God, em profet Jona pikinini man bilong Amita, em i bilong ples Gat Hepa. ²⁶ God Yawe i lukim ol hevi bilong Israel, ol man i stap fri na wokboi nating i pilim nogut tru na i nogat wanpela man bilong sevim ol Israel. ²⁷ Olsem na God Yawe i tok, em bai i no inap rausim nem bilong Israel olgeta tasol em bai i kisim bek ol long han bilong king Jeroboam pikinini bilong Jeoas. ²⁸ Ol narapela samting Jeroboam i bin mekim na ol strongpela wok na ol pait em i pait na kisim bek Damaskas na Amat long han bilong Juda na givim Israel, ol i raitim long stori buk bilong ol king bilong Israel. ²⁹ Jeroboam i dai na ol i planim em wantaim ol tumbuna bilong em na ol king bilong Israel na pikinini bilong em Sekeraia i kisim ples bilong em na i kamap king.