1 Ari taromo diq mataw tamaz emayta gio aseseqta na teq Juda gigo mataw marorta na teq mataw Moses ago gunun hurit kemiyta na yeq Juda gigo kansel ayahta na amatawun bunmo in humab wolim an amugan tuwaziy. An amugan wazim in Yesus irqurim wazim ad lehim Rom gigo maror saw Judiya wamuzim osayta anan Pailet haqay na tuqugiy. 2 Ugan Pailet Yesus tisusumun ug . Ni Juda on mataw gigo king e? ham. Haqan Yesus bilam, nawaqmo ni tibilam ham. 3 Haqanmop mataw tamaz emayta gigo aseseqta na in Yesus amalib nan kabemmo tiqem yaqay. 4 Emsa Pailet in Yesus ta susumun ug, ni gamuk araq amenin a hi emdaq e? ham. Ni hurit ham. Mataw ko nimalib nan kabemmo tiqemay ham. 5 Haqan Yesus gamuk amenin araq diq a ta hi bilam. Nazaq iyan Pailet anad kabemmo emyaq. 6 Ari uliq bunmo Juda gigo lotu akaman ayahta nab Pailet in mat araq irquran ossa hasid gwahtiq yaqta. Juda on mataw nog anan bilaqid Pailet naqmo hasid in gigo hib leh yaqta. 7 Teq kam nab mat araq anan Barabas na irquran os. Mat na in Rom gimuznan haqad ago dauh nenaq lehim Rom ginolad in mataw asor ginol amta amatin. Nazaq iyan Rom in mat na wazim a le mataw giqirquran osayta na nenaq eman osta. 8 Ari Juda mataw kabemmo Pailet agerab lehim tisusumun ugiy, Pailet ago daq muzeq muzeq mat araq bit giqirquran osaytab hasid gwahtidaq haqad. 9 Susumun ugan Pailet in ago gamuk amenin emim bilam, Ne ginad ya Juda gigo king na hasid ne gigo hib leh daq e? ham. 10 Na ezaqgo Pailet anad tiqam, Yesus mataw tamaz emayta gigo aseseqta ka gibayan woqiyta na na ago in gigem meqniysa amalib nan emay ham. 11 Teq haiq. Mataw tamaz emayta gigo aseseqta na in mataw biyahta na gigem wazan iraqsa in Pailet bulony, ni Barabas hasid i gigerab bolan haqiy. 12 Haqan Pailet gibilan, nazaq na teq mat anan bilaqay. Juda gigo king haqayta ka ya ezaq tondaiq? ham. 13 Haqan in lileyim bilaqiy, ayib dom wolid moqan haqiy. 14 Haqan Pailot bilam, Nagaqgo? ham. Mat ka naga daqin meqinta am? ham. Haqsa teq haiq. Mataw na dedibmo lileyim ta bilaq toniy, Ayib dom woliy haqiy. 15 Haqan Pailet in Juda mataw ginad emid dimniynan haqad in Barabas hasan in gigo hib tilah. Lehsa in gigo mataw gibilenan in warig waqim hik laquwim amalib Yesus tuwoltitayiy. Woltitayim hulosam Pailet in Yesus ayib dom wolgo haqad ago mataw bab emayta na gibenab tiqam. 16 Ari mataw bab emayta na in Yesus waqim ad Pailet ago bitab lehim in bit na ago gel aduganib ad tugawahtiqiy. Gwahtiqim in giyogniz bunmo gibilenan bo humab tuwoliy . 17 Humab wolim in tubusan araq sisata kakaqta amalib Yesus ahol isihim teq in am araq in asasuqin inaqta ta tonim King ago balaw nogta afaqin-ib emiy. 18 Emim teq in eraqim Yesus buloneq bilaq yaqay, mat ayah haq yaqay, in Juda gigo King-mo diq haq yaqay . 19 Haqadmo in tuqir araq waqim afaqin wolad tukusluw ug yaqay. Kusluw ugad in gibakbakan ulum laquwim turad bilaq yaqay, maror haq yaqay i ni nibin tisorauq haq yaqay. 20 Ari in Yesus bilawunim hulosadmo in tubusan kakaqta na hasim waqad inmo ago tubusan na aholib ta em ugiy. Em ugim teq in ayib dom wolnan haqad waqim ad tilehiy. 21 Ari in Yesus waqim a lehsa Aleksanda ayow Rufus inaq gimam Saimon uliq Sairin-ibta na in uliqab luwsa bab mataw in abe iyahad bulonan in Yesus ulum sihim ayon ay tisor ug. Yesus ago zaway in tihiq iyan. 22 Sa bab mataw na in Yesus waqim ad garah akululqan araqab anan Golgota haqay tab tilehiy. Gamuk Golgota na in alulin in Gifaqin Agolgolan haqayta. 23 A lehim in wain ayun teq masil anan mir haqayta na inaq buliyim Yesus ugiy. Ugan teq haiq. 24 Anmo in Yesus ayib dom tuwoliy. Dom wolim hulosad teq in nog Yesus ago tubusan waqdaqta na ahol waqna haqad in gig amikmikta hunegad tubusan nagan iberim giholyon tuwaqiy. 25 Ari amisor 3 kilok nazaq in Yesus ayib dom tuwoliy. 26 Teq Yesus naga daqin diq in ayib dom woliyta na agamukin in mar tonim in ulilib ay nabmo tuhot eniy. Gamuk na in kazaq mar toniy. 27 Teq Yesus agerab in mataw rin tonayta gigermo ayib dom giwoliymo. Dom giwolan araq Yesus aben aqabun ban tursa araq aben anasaran ban turyaq. 28 Nazaq iyan daq na in gamuk araq God ago marib usaqta na tuwolnet bug. Gamuk na bilam, in mat na anan mat araq gunun othasaqta haqiy. 29 Sa on mataw bo lehad in Yesus ahol waqad bilawun yaqay. Bilawunad gifaqin lelad teq in bilaq yaqay, Oyeq! haq yaqay. Mat Tempel wol inereq kam ezeqman aduganib wazid a ta eraq daqta na amatin ni haq yaqay. 30 Nazaq iyan ni niwaz meqniyeq ninmo nihol ulum siheq ay na huloseq woq haq yaqay. 31 Sa mataw tamaz emaiqta gigo aseseqta na teq mataw Moses ago gunun hurit kemiyta na in nazaqmo Yesus bilawunad in an bulonim kazaq bilaq yaqay, in mataw asor gilum sihan a hi moqiyta haq yaqay. Ta teq inmo ahol ulum sihgo ago zaway haiqta haq yaqay. 32 Ari in Isrel gigo King anan Krais haqayta na iyeq teq in ay na huloesq gehitiqan haq yaqay. Gehitiqid teq i ahol waqad anan helmo tihaqam haq yaqay. Sa mataw giger Yesus inaq ayib dom giwoliyta na in inaqmo Yesus bilawun yaqaymo 33 Ari zeq gaboim liqabmo tiqiysa saw bunmo romriq iyad le 3 kilok imisor tiqiy. 34 Ad 3 kilok imisor nazaq tiqiyanmo Yesus dedibmo lileyim bilam, Eloy Eloy lama sabaktaniy ham. Gamuk na in kazaq bilam, yaqgo God, yaqgo God nagaqgo ni ya ihulosaq? ham. 35 Haqanmo mataw asor nab turiyta na in Yesus aqez huritim bilaqiy, ko in Elaija lilewunaq haqiy. 36 Anmo mat araq sibim le tubusandek waqim tuqir amotnib am wazim teq in wain ayun agon meqinta na ulum turim ateb tiqam, in sisow daq haqad. Emim teq in bilam, sa i ahol waqad teq ham. Elaija boleq tiq daq o haiq ham. 37 Haqanmo Yesus dedibmo ek tonim tumom. 38 Moqanmo tubusan ayahta Tempel-ib hot enan usta na ulilib liqabmo tirtayim giger iyim bo ogibmo tuwom. 39 Teq bab mataw gigo ayahta saw nab Yesus wamuzim turad in Yesus nazaq moqsa ahol waqad bilam, Helmo diq ham. Mat ko in God atatin ham. 40 Sa on asor pesanmo turad teq in nagah na ahol waqad turiy. In gilikmanib Mariya uliq Magdala-ibta na teq Jems ayow Josep inaq ginen anan Mariya haqayta na teq aw araq anan Salome haqayta na in nab turiy. 41 Kwaziqmo Yesus saw Galiliy-ib ossa on na in muzad ulumsih yaqayta. Teq on kabemmo Yesus inaq Jerusalem-ub boliyta na in nab turiymo. 42 Ari kam Yesus momta na in Juda gigo lotu ayon nagah wastitayayta na akamnib in momta. Bebeq na Juda gigo lotu akaman diq na tugwahtiq daqta. 43 Nazaqiyan Yesus momta kam nab imisor tiqiysa uilq Arimatea-ib mat araq anan Josep haqayta na bolim Pailot ago hibtilah. Mat na in Juda gigo mat marorta araq teq in abin inaqta. In inaqmo God ago maror og kab gwahtiqsa in ahol waqnan haqad amen emayta. In awaz meqniyim lehim Yesus asan waqeq ale yay tongo Pailet tisusumun ug. 44 An Pailet in Yesus momta na huritim anadnad am . Anadnad emim in ago mat bab emaqta araq bulonan bilam in tisusumun ug, Yesus tumom e? ham. Haqan mat na bilam, Yesus tumom ham. 45 Pailet in mat na gamuk bilaqan huritad teq in Josep bulon. Ari in Yesus anan tuwaq daq ham. 46 Haqan Josep le tubusan araq husta tizay. Zayim a lehim in Yesus asan walemim ogib eman ussa teq in tubusan husta amalib tiqil ton. Il tonim a lehim mataw gigo qwayan hodhod iyta na amuganib tiqam. Nab emim teq in gigo araq otbiliyan bo hodhod aqez tiqitum. 47 Sa Mariya uliq Magdala-ibta na ayow Josep ta araq na anen Mariya inaq in giger nab turad mat na Yesus anan hodhodab emsa in ahol tuwaqiy.