¹ Jesus gazeng didlak iduse. ² Bomon mon i temple lon imul ise, tamolpain dangan izinen dise, ge imatal ge kagin petengana. ³ Sain melon gazek mangau meg Farisia mai pain ta denasi auipasimelak, ge niman diabig dise Jesus izinen. I langadin lon denaug ituiz. ⁴ Ge Jesus depai," Gazek Mangau, pain e au ipas meg denasilak. ⁵ Mewoi ge, Moses inan kibeing lon egin ibol tamol ta i au ipas tap patlon difuniwoi. O iwoi dodin ubol? ⁶ I azu melon Jesus dabatanai fun me i ladin ibol Jesus i azu ta ibol mok oi me inadin ladin, megin pa i azu me dengalep Jesus azulon denauoi. Ge Jesus i auadin ta so yabi,i takok ge tanlak niman tikun lon igaze. ⁷ Ge faun desadaze meg, imais ituiz ge auadin yabi, " Ite ta i ang langamilon i au so ipasi ime, binip i imug pa pat ingalep pain e funi?" ⁸ Jesus faun mug takok ge tanlak niman tikun lon igaze. ⁹ Sain i azu me dilong meg, taitai mon bengten didug dile, ujan ujan lak fun denau iseg aikamo mai. Dangan dile dibini, Jesus meg pain it i lilung denaulak memon melak demade. ¹⁰ Jeusu gaten ibiseg pain sadaze, "Pain, ge tamol o diduzo diselaknen owoi azu dibol lak me domten? ¹¹ I ibol,"Ujanzen, tea ta elak so imadoime."Jesus i ipai ibol,"Nga mai o so ngemasalanowoi tea, ge ulap faun so au upas mon." ¹² Jesus faun mug tamolpain ipidin, egin ibol,"Nga sibeg mon tan inan lalaman, tamol itei i nga sunuzagime i mafuzlon itoznen tea, i basnen inan lalaman ilonen madowoi. ¹³ Farisisa gaz i Jesus egin depai,"O sibe oi kibiai ume, oina azu me so malik." ¹⁴ Ge Jesus auadin yabig egin ibol,"Ang abol nga sibeg oi azu ngaflale ngame, ge nga inag azu me malik mon. Nga sibeg oi ngalong, nga didnen ngaselak meg dodin faun ngamuloi. Ge ang nga fug so alonglak. ¹⁵ Ang tamolpain dalanganame nadin kaginlon, ge nga so tamolpain nadi nauknauk ngadalanganawoi ngase. ¹⁶ Ge nga tamolpain ngadalanganawoi tap, nga inag dalanganeknen i gazop tidukoi, fun me nga sibeg so ngenauoi. Nga i mam Anut mai ngamadoame i nga noag ge ngaselak. ¹⁷ Au, angnami kibeing, egin degaze, tamol azugen azu taimon dikibiai, mewoi ge nadin azu me malikmok. Nga sibegoi ngikibiai me malik. Nga inag Mam didnen imadoimelak i nga nouag ge ngaselak me imon nga oi azu malik ibol oi. ¹⁹ Ge i egin sodoz denau," Oina mam domten?" Ge Jesus i auadin yabi,"Ang nga oi so along meg ngainag Mam oi mai. Ang ngawoi along pe, ang ngainag mam oi mai along oi?" ²⁰ Jesus i azu megi ikibiailak sain i tamolpain azulon mangau pinidin temple lon kunup gangmalan inan izinen.Tamol ta i niman so ipaulak, fun me inan sain so isoime. ²¹ I faun mug ipidin,"Nga ngalamap ang nga bazanag oi pa ang nami aupasek oi ngamatoi.Nga ngalangame me ang alanen so along." ²² Juda i megin dibol,"I siben funi imat oi? Mewoi ge i megin ibol, aben nga ngalangame me ang asonen so iduse." ²³ Jesus ipidin,"Ang tamolpain tanlak inan, meg nga didnen wain, ang tanlak wain nga so tanlak wain. ²⁴ Mewoi ge ngabol angnami aupasekoi amat oi. Anut i siben ang nami aupasek oi i blanangoi, Me gazop megin itasawoi ngan ang i lami lon so malik tap nami aupasekoi amatoi. ²⁵ Ge i egin sodog denau,"O itei?" Jesus egin ipidin,"Azu abangte nga ang ngepaiang funlon. ²⁶ Nga azu gauzmok ngepaiangnen map nami nauknauk dalangiwoi me ibol i planeknen wain. Ge tamol nga noag ngaselak, azu abangteta ibol lak me malik, memon nga tamolpain tanlak ngipidin. ²⁷ I so dilong, Jesus i azu me ibol lak me taman oi ikibiai. ²⁸ jesus azu gauz ibol,"sain ngainag Ai nian bisa, map ang ngaoi alongoi nga angnami Anut. Ge nga sibeg so inad uzat ngenau. Abangteta Mam i nga petenganaglak, nga abang mewoi mon ngikibiai ngame. ²⁹ Tamol ite nga nouaglak, i nga mai madoime, i nga so binag ge nga sibeg uzat ngenau. ³⁰ Jesus abang mewoi ikibiai, tamolpain dangan diseg ladinlon malik abang abang me lon. ³¹ Jesus Judia tamolpain ipidin fun i me ladin lon malik," Ge ang ngainag azu ilonen madetap, ang sedenganip madetap ang ngainag meglaumgaz. ³² Pa ang azu malik mon alongoi, map azu malik i ang noangpa ang bas amodo gauai." ³³ I auadin diabig egin dipidin,"Am Abram inan tibung gaz, mewoi ge am tamol ta inan uzat so anou, o dodinge megin kibiai,'azu malik i am pisiamawoi?" ³⁴ Jesus auadin jabig egin ibol,"Malik mok nga egin ngapaiang, tamolpain audipaslak, i aupasek inan bagabeg imadowoi. ³⁵ Bagabeg tamol i mam inan abgun lon so imadowoi, ge Nanun Ai i mon sansan madowoi. ³⁶ Ge inan Ai i ang pisiangpa amadowoi. ³⁷ Nga ngalong ang Abram inan tibun gaz, ge ang dal bazaniame nga funagoi. Ang ngainag azuta so lamilon malik nga ang ngepaianglak. ³⁸ Nga ang ngapaiang abangte gauainen meg kankan gauai Mam Anut i nga patanganag. Ge mai nami mam inan azu along me abang anau ame. ³⁹ I mai auan yabek dipani,"Am nama mam me Abram." Jesus egin ipidin,"Ang Abram nanun gaz tap, ang Abram uzat inaulak ang mai anauoi. ⁴⁰ Ge gazo ang dal abazaniame nga funag ngamatoi, abangtefunoi nga azu maliknen me mam izinen ngangale ngame. Abram i megin so inoulak. ⁴¹ Ang nami mam inan uzat anouame." I Jesus megin depai,"Am nama nen i daldal aupasek so inou ge i am nouamalak tea, Anut i mon am nama mam. I mon i nama Anut. ⁴² Jesus ibol, ge Anut i ang nami mam tap ang iduse ngaoi amatoi. Abangte funoi nga Anut izinen ngase, ge imon nga inuag ge tanlak ngase. ⁴³ Abangte funoi ang ngainag azuoi po so abol? Funme ang ngainag azu angalenen so iduse. ⁴⁴ Satan i ang nami mam ang inan azu along ge uzilakoi ang inan nanun gaz atase, mewoi ge ang kankan gegaun mok anau ang abang nga malaglak kukum lon anauoi. I tamol ifudimat meg i sekauk inouime, azu malik ta so ibolime. I sekauk, i siben binganoi kibiai ime, meg i sekauk taman. ⁴⁵ Azu malik ngikibiai ge ang ngawoi lamilon so malik. ⁴⁶ Itei i nga paiagoi nga aupasek wain. Ge nga azu malik ngabol, abangte funoi ang nga lamilon so malik. ⁴⁷ Ite i Anut nanun tap i Anut auan uzipaniwoi ge ite i auan sunuzi tap i Anut nanun tea. ⁴⁸ Judawain egin auan yabi,"O Samaria wain am along mewoi uzsalan i o lon." ⁴⁹ Jesus egin auadin yabi,"Nga uzsalan tea, nga Anut bingan ngibisawoi meg ang nga niag abi idu. ⁵⁰ Nga ngaselak me ang nga niag gauai apanag, ge tamol itei nga nouge ngaselak i ngainag sigianek inouwoi. ⁵¹ Azu malik ngabol ngame, tamol ite i nga auag uzipanitap, i matenglon so iduwoi. ⁵² Judagaz egin depai,"Gazo e am along o uzsalan dangan, Abram meg profet aenta get dimat, ge o ubol, ge tamol ta nga auag uzipanitap iso imatoi. ⁵³ O so ibol e Abram egin, i am nama mam taimon i get imatile, ge o sibe inuog tamol dodin utasawoi?" ⁵⁴ Jesus ibol,"Ge nga sibeg niag ngibisatap, me i abang se oi.Ngainag mam didnen mon i nga niag ibisawoi. Ge ang abol, i am nama Anut. ⁵⁵ Ang anaulak me ibol e ang i woi po so abol, ge nga iwoi po ngabol. Ge nga ngabol, nga iwoi so ngalong tap, nga mai funtaimon nganouoi, nga sekauk tamol. ⁵⁶ Ang nami mam Abram i ngainag nal nasiwoi jaun isameg jaeng funilak i nasilag i buben gauai. ⁵⁷ Judgaz egin depai,"Oina umaz me so fifty inanazig iduse meg o ubol o Abram malalon nasi?" ⁵⁸ Jesus ibol,"Malik mok nga ngapaiangngame, Abram so itaselak meg nga get ngamade." ⁵⁹ Sain melon i pat dengaleg i Jesus difuniwoi denau ge i melabublon temple lon ge bengten idu.