¹ Abang e wadan lon, Jesus i Galilia naz tinin aintanen ile, nian ta Tiberias Mas. ² Tamolpain malan uyan duzig dile, fun me i kubel mangau inau, mayai gaz ikibiniag gauai. ³ Ge Jesus i bubun latnen iduseg matal inan megalaum gaz mai. ⁴ (Sain nal uyan Pasa inan meg Juda gaz nadin langalang diabinen iseg siziz.) ⁵ Sain Jesus i tamolpain malan uyan izinen dise meg i nasag ge i Filipus ipai, "Gazop id sapalang ta domten tadad pa tamol e dianiwoi?" ⁶ (Jesus i Filipus ibatanai oi sodoz ipani, ge i siben get ilong abangte inaunen oi.) ⁷ Ge Filipus i egin auan yabi,"Ge id pound 7 lon sapalang tadad tap me gazop tamolpain detamanilak e taitai dengalenenoi so idusawoi." ⁸ Megalaum gaz langadin lon ai ta, Andreas, Saimon Petrus tein, i Jesus egin ipai, ⁹ ai tamol ta elak, i sapalang boi 5, wit lon dinou, meg ie azugen. Tamolpain gauz mok demadodime ge anang e dodin pa dangan oi idusawoi?" ¹⁰ Jesus ibol, "Tamolpain pidin pa dimatal." (Aben me kebasik uyan dangan) mewoi tamolpain dimatal, sutek lon 5000 egin. ¹¹ Jesus i sapalang ingaleg Anut godowanig, tamolpain dimatal lak me ipinidin. Alouge ei mai ingaleg megin mon inau, ge i anang gauz mok dianinen. ¹² Sain i dianig luadin didig, Jesus inan megalaum gaz ipidin,"Sapalang wadan wadan temana, naup se dienoi." ¹³ Megalaum gaz sapalang 5 inan wadan wadan ditangeg sazeg 12 egin. Tamol dianig iduse ge wadan uyan ien. ¹⁴ Tamolpain i kubel mangau me denasig dibol, "Malik, malik, profet ngan e tan e lak iduwoi." ¹⁵ Sain Jesus ilong, tamolpain i diabip gegaunpa dibol oi nadin King madowoi, mewoi ge i ibin ge siben bubunlak iduse. ¹⁶ Sain yuza lon megalaum gaz naz lon didu. ¹⁷ I didug wag ta latnen dimatal ge Kapernam nen aintenen dile. (Fatu mafuz ge Jesus zidinen so itase meg.) ¹⁸ Sain me lon tim gegaun ge mas imais. ¹⁹ Sain megalaum gaz kin diplinig 5 kilomita o 6 kilomita egin, meg i Jesus mas fonlak itoz ge nadin wag izinen ise meg i denasi, ge i dizez. ²⁰ Ge Jesus i pidin, "Ang so azez mon, me nga mon." ²¹ Ge pasak mok megalaum gaz i dengaleg wag ilonen idule, mewoi pasak mok aben dilanen me lak ditase. ²² Nal alounen lon, tamolpain i naz tinin aintanen dimademeg, i wag taimon mon megalaum gaz dile meg deil, Jesus imai so dile, megalaum gaz sebadin mon dile. ²³ Ge wag ainta i aben Tiberias megin ge dise, aben Uyanzen i sapalang godowanig diyanilak. ²⁴ Sain tamolpain dilong Jesus inan megalaum gaz mai melak, i wag lak disusug Kapernam nen dile Jesus debazaniwoi. ²⁵ Aloge dileg naz tinin aintanen debazani, ge dipai,"Gazek Mangau sangepteelak use?" ²⁶ Ge Jesus i egin awadin yabi,"Malik mok ang bezanag so kubel nga ngenaulak mewoi , ge ang sapalang anig luami didilak mewoi. ²⁷ Ang anang salan nen mewoi uzat so anou mon, ge ang anang bas dedenganeknen panang nen mewoi uzat anau. Ananag menen me Tamol Nanun i ang panangoi, abangte funoi Anut mam i bagoz get ipani. ²⁸ Ge i Jesus egin dipai,"Am dodin anaup Anut inan uzat anou oi?" ²⁹ Jesus i awadin yabi," Anut inan uzat me egin, ang lamilon malik oi tamol it Anut inaug iselak." ³⁰ Ge i dipai,"Abangte kubel o naulalek o naup am anasip owoi lamalon malikoi?"O abangte nou oi? ³¹ Am tubuma tamama gaz mana fatu kazak lon diani, Anut azu gazek lon ibol,'Mam i didlon sapalang ipinidin dianiwoi."' ³² Ge Jesus egin awadin yabi,"Malik mok, sapalang didnen iselak Moses i ang so ipanang, ge nga inag Mam i ang sapalang mok didnen ipanang. ³³ Anut inan sapalang i didnen binig idu, basnen tanen tamolpain dangan pinidin oi. ³⁴ Ge i egin dipai,"Tamol Uya, O am sapalang me dedenganip penama." ³⁵ Mewoi Jesus i pidin,"Nga sibeg basnen inan sapalang, it nga izignen isoime i pitol so funiwoi, meg itei i nga oi ilonlon malik i faun so kalagun kaza naz miliwoi. ³⁶ Mewoi nga ang egin ngapaiang, ang nga anasag ge ang ngawoi lamilon so malikime. ³⁷ Tamolpain dangan it Mam i nga ipanaglak, i disowoi nga izignen, meg tamol it nga izignen, nga ngepasinen tea. ³⁸ Ge nga didnen ge ngadu, so nga sibeg iloglon, ge nga Mam ilon mon nguziwoi, i nga inuag ge ngase. ³⁹ Me mam ilon ibol lak lon, it i nga nuag inan tamolpain dangan ngitizinawoi i nga panaglak, mewoi nga tamolpain taimon ta so ngibiniwoi, ge faun ngufungunawoi nal wadan lon pa. ⁴⁰ E me Mam inan ilonibol, mewoi tamolpain dangan it i Nanun inasig iwoi ilonlon malik, i bas dedenganeknen gawai dengalewoi sansan pe, meg nga i ngufungunua oi nal wadan lon pa. ⁴¹ Alouge Juda inan gaten tamol gaz i Jesus inan azu oi dekumukom, i egin dibol,"Nga sibeg sapalang me, didnen ge idu." ⁴² Gaten gaz i dibol,"Me Jesus me i Josef nanun, id i taman meg tinan oi talong. Dodin ge i ibol nga didnen ngibinig ngadu?" ⁴³ Jesus nadin azu awan yabi,"Ang sabami langamilon so kumukom mon." ⁴⁴ Ai ta nga izignen isonen so iduse, ge Mam it i nga nuag ge ngase, i gazop iduzip nga izignen isowoi, mewoi nal wadan lonpa nga i mateng aben lon ngufunguniwoi. ⁴⁵ Profet gaz i egin degaze, Anut i tamolpain dangan mangau ipinidinoi. Tamolpain dangan i Mam inan azu dilong lak me i nga izignen disowoi. ⁴⁶ Tamol ta Mam so inasi, tea mok. Ge tamol it i Anut izinen ge idu i mon i Mam inasi. ⁴⁷ Malik mok, tamol it ilon lon malik i bas dedenganeknen gawai sansan. ⁴⁸ Nga sibeg basnen inan sapalang. ⁴⁹ Ge ang tubumi tamami gaz gaz mana fatu kazak lon dianig get dimat dile. ⁵⁰ Nga sibeg mon sapalang e bas dedenganeknen, didnen ge ngadu, mewoi tamol i ta yaniwoi ge so imat oi. ⁵¹ Nga sibeg sapalang e dedenganeknen didnen ge ngadu. Ge tamol ta i sapalang e kin yani tap, i dedenganip madowoi. Sapalang e ngipinidinoi me nga inag tinig, tamolpain tanlak i basnen dengalewoi. ⁵² Juda gaz i buzudin isag langadin lon mon dekumukom ge dibol,"Dodin ge tamol e inan tinin panad pa taniwoi?" ⁵³ Ge Jesus i egin pidin,"Malik mok ge ang Tamol Nanun tinin so ani map inan daz so milip tap, ang bas dedenganeknen so angalewoi. ⁵⁴ I te i nga tinig yanig inag daz militap i bas dedenganeknen ngalewoi, nga i ngufunguniwoi nal wadam lon pa. ⁵⁵ Nga tinig me anang mok, meg inag daz me i naz mok milek inan. ⁵⁶ Tamol it ei i nga tinig yanig inag daz mililak, i nga ilonen madowoi meg nga i ilonen ngamadowoi. ⁵⁷ Mam i bas madoime i nga nuag ge nga bas ngemadongame i tiwon lon, mewoi tamol i nga tinig yani ime imai bas madowoi nga inag gegaun lon. ⁵⁸ Sapalang e didnen ge idu, so sapalang me ses gaz dianig get dimat dile. Tamol it sapalang e iyani i sansan bas demadowoi. ⁵⁹ Jesus i abang ewoi ibol sain tamolpain petengana Kapernam fatu inan ubou ab lon. ⁶⁰ Ge megalaum gaz i dilong ge dibol,"Azu e id petenganad, i muzuan mok, it ilongnen iduse?" ⁶¹ Abangtewoi Jesus ilong inan megalaum gaz i dikumukom azu ewoi, ge ipidin," Naup azu e ang lami pitingini tat?" ⁶² Ge dodin oi, ang Tamol Nanun anasiwoi faun imulpapanu get imadelak lon? ⁶³ Awan Uz Gun i bas panadoi. Ge tinin i bas so paniwoi. Azu nga ngapaiang me Uz mewoi i bas ang panang oi. ⁶⁴ Ge ang ainta lamilon so malik."' Abangtewoi Jesus i get ilong tamol it i iwoi ilonlon malik oi meg it i agez niman lak inau nen me. ⁶⁵ Mewoi ge ibol,"Mewoi nga ang ngapaiang, tamol ta i nga izignen so isowoi, ge Mam mon i gauai nen paniwoi nga izignen isowoi. ⁶⁶ Me muzinen, inan megalaum gaz gauz dimulge dile, i mai so ditoz. ⁶⁷ Megin ge Jesus inan megalaum 12 me sodoz ipinidin,"Ang mai alawoi?" ⁶⁸ Saimon Petrus i egin awan yabi,"Uyagen, am gazop it izin alawoi? O azu bas dedenganeknen inan me o dangan. ⁶⁹ Ge am lamalon malik ge along O tamol malik Uyanzen i bagoz nuo inan. ⁷⁰ Jesus i megalaum gaz ipidin,"Nga sibeg ang ngeplanang ge amadoame, ge taimon me i Uz salan." ⁷¹ Jesus i Judas ipai, Saimon Iskariot nanun, i taimon 12 me ilonen, it ei Jesus agez nimadin lak inaunen.