¹ Jesus alouge azu aentaibol, inan meglaumgaz mai tazeng diabig fatu zuanek Kidronnen dile. Aben melak me um ta dangan ge um melon inan meglaumgaz mai didule. ² Tamol Judas me i gazop i agez nimadinlon inauoi, i mai um mewoi ilong, fun me ilong i sansan Jesus meglaumgaz mai um melon diladime. ³ Ngan Judas i opas ingalge waling gaten Farisia mai nadin begabeg mai aben melak dise. ⁴ Ge sain melon, Jesus iget ilong gazop abang me ilon itasawoi, i itoz dingiadinge tamol wozou me zidinen ileg sodoz pinidin, "Ang itmok abazaniame?" ⁵ Ge auan diabig depai, ''Jesus Nasaret Wain.'' Ge Jesus pidin. ''Me nga sibeg mon.'' Judas Jesus ibalanip agez namadinlak inaunenme i mai opas mai demade. ⁶ Sain Jesus i ipidin, ''Me nga sibeg mon,''Idangan dasaziz demul dileg dangan dibal tanlak didu. ⁷ Ge faun sodoz pinidin, ''Ang it mok abazaniame ?''Auan diabig faun depai, ''Jesus Nasaret Wain." ⁸ Jesus pidin, ''Nga get ngapajang me nga sibeg mon. Ge ang nga bazanagtap, segauz tamol aenta me abinpa dila.'' ⁹ Abang itaselak me azu get ijenlakme ningon inauoi, mewoi i siben ibol, nga ta so ngibini o nga panaglakme." ¹⁰ Ge Simon Petrus badiz pasig waling gaten inan begabeg to tingilan ipasi wanglon. Begabeg me nean Malkus. ¹¹ Jesus Petrus ipai, ''Ina badiz faun abenlon nau. Naz gab me Mam panaglak, gazop so ngimiliwoi tat ne? ¹² Rom nadin opas gaten mai, meg Juda nadin uzat gatengaz mai i Jesus diabig wazlon dapau. ¹³ Ge dengaleg Hanas izinen dile, fun me i kaifas inan nanaten. Kaifas me i waling gaten sain me inan. ¹⁴ Ge kaifas i Judagaz ladin ngaleg kankan pinidinge segauz tamol taimon i tamol dangan abedin ngalep imatpasiwoi tamolpain alan so denauoi. ¹⁵ Simon Petrus imeglaumta Jesus uzimelak.Meglaum me Jesus uzig waling gatengaz nadin abedinlon dile, aitawoi Waling gaten iget iwoi dilong. ¹⁶ Petrus i dalauan dabin bengten itiuz meg meglaum waling gaten iwoi ilonglakme, imul ileg pain ta dalauan tizinimelak me ipai, pain me Petrus ipaig az ilonen idule. ¹⁷ Pain me az inan dalauan tizinimelak me Petrus ipai,"Ne, o i inan meglaum tea tat?" Ge ibol, "Nga tamol me tea." ¹⁸ Sain me jizun idu waling gatengaz nadin begabeg meg opas ya piziadinmeg demade.Petrus mai langadinlon ya pazemeg made. ¹⁹ Waling gaten i Jesus sodoz pani inan meglaumgaz azu abang patanganag pidinlak. ²⁰ Ge Jesus auan yabig ipai, " Nga azu bengten tanelak ngabol. Nga sain danganlon ubou ablon tempelon Judagaz detemanidime nga ngalemeg azu ngipidin ngame. Nga azuta kukumlon so ngabol." ²¹ Abangte funoi o nga sodoz panag? Tamolpain me sodoz pinidin it i ngainag azu ilong. Nasi, tamolpain me idilong abang nga ngikibiangamelak." ²² Sain Jesus i azu me auan jabig ibol,opas ta i Jesus sunuzig itiuz lakme nimanlon funimeg ibol,"Funaitawoi o waling gaten megin mok auan wabi?" ²³ Jesus auan jabig megin ibol, " Ge ngainag azu e ngutuzugusitap, aria ang ngainag saladin mewoi abol. Ge, nga azu gauai ngabol tap, abangte funoi ang nga se afunag?" ²⁴ Ge Anas i Jesus inaug waling gaten Kaifas izinen ile. I Kaifas izinen ilelak me wazlon dapaug mademeg itoz ge ile. ²⁵ Sain melon Simon Petrus i melak ituizge ye ipazemeg imade. Ge tamol ta i azu ipai,"O mai inan meglaum tea tat?" I kakez ge ibol"Nga tea." ²⁶ Waling gaten inan begabeg, i tamol daz uzek Petrus itilingan ipasilak me ibol,"Nga umlon i mai so ngenaso tat?" ²⁷ Petrus ikakez meg pasak mok kakazek ibob. ²⁸ Jesus i Kaifas inan batanaek ab ilonen depasig dengaleg dile. Pilatus inan batanaek ablon. Me kin bomon mon egin ge batanaek ablon so didule,funme i fualakoi pasa deaniwoi inan nal mewoi. ²⁹ Mewoi Pilatus i bengten idug megin pidin,"Abangte ta me inau salan lak mewoi azu dodin ijenime?" ³⁰ Ge auan diabig depai,"Tamol e i aupasek bibian teape, am gazop o nimalak so anaupe." ³¹ Ge Pilatus ipidin,"Ang segauz sebami uduzip alap nami kibeing melon i kotlon anau."Judagaz i auan diabig depai,"Am tamol ta funip imatnen me geg ujan mok." ³² Azu dibol lak me Jesus inan azu me ningon inauoi, azu ibolge dilonglak me i gazop matenglon dodin idunen me petengana. ³³ Pilatus faun imul batanaek ablon ileg Jesus wagig ipai, "O malik Juda nadin King ?" ³⁴ Jesus auan jabi ipai, " Azu o nga sodoz panaglak me oina kankan ubol o tamol wozouta i o dapaug o nga sodoz panag ?" ³⁵ Pilatus auan jabig ipai, "Ne nza Juda wain tat ? O sibe ina tamolpain meg waling gatengaz mai duduzog useg nimaglon dunuwo. O abangte unaulak ?" ³⁶ Jesus auan jabig ipai, "Inag Kingdon me tan e inan tea. Ge inag Kingdom me tan e inan tap, inag uzat tamol i ngamai ju anauoi ge agezgaz i nga Juda nemadinlon so donoag pe. Ge, inag Kingdom me, i tan e inan tea. ³⁷ Pilatus i faun ipai, " O King ta ?" Jesus auan jabig ipai, " O sibe ubol nga King . Uzat e woi ge nen i nga noaglak, mewoi nga tan elak ngadu, uzat taimon nganauoi, me azu malik ngabol oi. Tamolpain dangan i azu malik me dilong duzi depanidime i sansan ngainag azu me duzidime." ³⁸ Pilatus i ipai, " Azu malik me abangte ?" Sain i azu me ibolge, faun imul bengten idug Judagaz pidin, "Nga aupasekta tamol elon fun ngabazanig so nganasilak. ³⁹ Ge ang nami kibeng mazoz kagin me nga nguzingapani ngame pasa inan nal ujanlon me i tamol ta i fanatek abenlon madoime me segauz pasip ilawoi. Mewoi ge ang lami ibol Juda nadin King e ngapasip nganaup se ilawoi ?" ⁴⁰ Ge auadin ujanlon diwog dibol, "Tamol me tea, ge o Banabas pasip bengten idu. "Banabas i tamol abang panau ngaleimelak tamol.