¹ Nal 6 mon binip, Nal ujan pasa inan me itasawoi, Jesus betaninen ile panu Lasarus madoime melak ile, tamol me, Jesus i mateng lon ge fungunig basimais. ² Megin ge i Jesus inan anang dikibine, Marta i anang kibine Lasarus i tebollak Jesus maig anang dianani. ³ Maria i Jaling ta gazen dangan ngale ise, Gazeng me inan naun me ujanzen mok, Ngaleg iseg Jesus nien funlon matal, ge melon mon Jesus nien balaipani, alouge gatenzaun lon nien isuas, Gazen inan zungan abilon me dangan i ngale. ⁴ Megelaum ta Jesus inan, nian me Judas Iskariot, tamol me gazop Jesus agez nimadin lon inauwoi, i ibol dodin ge gazen me silva gangmalan ujan 300 lon tadad pa waiz gaz tipinidin oi ? ⁶ Judas azu me ibollak me abangtewoi, i inau kankan me gang malan me ngalep i alan gaz pinidin nen tea, tea isiben ngalewoi mewoi ibol. Judas i gangmalan inan badam tizini ime melon i panau sansan jabi ime. ⁷ Jesus ibol, binip i ngawoi gazeng me idad oi, pa ngainag maten lon aloupa nga ngamatoi mewoi. ⁸ Tamol alan gaz i gazop sansan angmaip amadowoi, ge nga sansan ang maip so temadowoi. ⁹ Juda tamolpain gauz i dilon Jesus i Betaninen madoime mewoi ge dise. I Jesus mon denasiwoi so dise, tea i Lasarus Jesus fungunig bas imais, i memai denasiwoi dise. ¹⁰ Juda Waling gaten gaz i azu dipau, i Lazarus mai dufunip imat oi dibol, ¹¹ abangte woi, Lasarus imais lak me Juda tamolpain gauz dilong sai me, mewoi i waling gaten gaz nadin skul me dibinig Jesus oi ladin lon malik . ¹² Nal ta lon ubou ujan inan saen longe, tamolpain gauz i Jarusalem nen dise, i dilong Jesus melak madoime. ¹³ Mewoi ge i patoz zaun me dingale dile, Jesus pezdepani woi, i diwog ge dibol, "O siana Anut i inau gauai i ujanzen lon iso ime me Israel nadin King. ¹⁴ Jesus i dongki faun ta ngale me fonlak matal ge ise, me Anut inan sai lon gazek lak me uzig ningon inau ¹⁵ tamolpain panu sion inan ang so azez mon, me angnami King Dongki fonlak iduseg isoime." ¹⁶ Inan megelaum gaz so dilong, abangte fun oi abang me ditasaime, tea me Anut inan azu me uzig itase, ge saen Jesus i inan uzat binime , Anut i Jesus nian biseg latnen ile, megin meg inan megelaum gaz ladin po ibol profet nadin azu me ningon inau. ¹⁷ Jesus Lasarus matmat lon ge fungunig bas imaislak me tamolpain gauz denasi, tamolpain me saidianig aenta gauz sai me dilong. ¹⁸ Me fun oi tamolpain Jesus izinen dile, i mangau inaulak mewoi. ¹⁹ Farisia i sebadin langadin lon dikibiai megin dibol, "Nasi, id abang ta tenaunen tea, tamolpain dangan i duzidime." ²⁰ Grik wozou ta mai i tamolpain malan dangan me duz ge, ubou ujan melon dile Anut bingan dibisawoi. ²¹ Grik wuzou me i Filip izinen dile, i Betsaida wain me Galili fatulon dileg i sodoz depai, "Tamolujan am Jesus anasiwoi ase." ²² Filip ileg Andreas ipai Andreas Filip mai dileg Jesus dipai. ²³ Ge Jesus i auadin megin jabi, saen ise nanun ai siben bingan ngalewoi. ²⁴ Malik mok nga ang ngepaiang, Wit patun ta so idup tanlon pa imat tap me siben ijenoi. Ge ta idup imat me gazop gaug imais oi. ²⁵ Ge tamol ta isiben tinin oi gauz imat tap, me i padalnen ngalewoi, ge tamol ta i siben tinin mizipanip tan elak itoz tap me bas dedenganeknen me ngalewoi. ²⁶ Tamol ta i ngainag uzat inau woi tap, me i isop nga uzag oi, pa panu nga ngemadongame melak. Tamol ta i ngainag uzat inau tap, mam i bingan paniwoi. ²⁷ Jesus ibol gazo e nga inag bubeg muzuan mok ime, nga dodin ngaboloi ? Mam saen muzuan e so binip ngalon itasa mon. Tea nga me inan funoi elak ngase." ²⁸ Mam sibe nia me naup itasap ujan. "Auan ta didlon ge iduiseg ibol, niagme get ujan, ge faun ngenaup ujan oi. ²⁹ Tamolpain iziknen ditiuzlak me azu dilong ge dibol, me wail tani. Tamolpain aenta dilong ge dibol, tea me engel mai dikibiai. ³⁰ Jesus azu me auan jabig megin ibol, azu me nga dinagoi so ise, tea azu me ang dingangoi ise. ³¹ Gazo e Anut tamolpain nadin kagin me betenae woi tanfatulon, gazo e gaten tan fatu tizini imelak me ipasiwoi. ³² Saen e gazop tamolpain nga dibisiagpa tan e fonlak latnen dunuagoi, nga tamolpain e dangan nga sibeg izignen nga ngal pa disowoi. ³³ "Jesus i tamolpain azu me pinidinlak me i gazop mateng lon iduwoi mewoi pinidin. ³⁴ Tamolpain i megin dibol, am azu boi ta buk lon ienimelak me anasi, Mesaia i gazop sansan pe bas madowoi. Ge o dodin ge ubol gazop nanun ai dibisap latnen ilawoi ? Me tamol nanun me ite ? ³⁵ Jesus i megin ipidin, lelaman me ang ziminen saen kitek ta mon i ienoi, saen lelaman me ien map, ang lelaman me lon atoz, mafuz i ang stoanangoi tamol ite mafuz lon itozime i dodin ilaime me isiben fun so ilong i domten madoime. ³⁶ Gazo e ang leleman me dangan, ang mai amadoame, lelaman mewoi lami lon malik pa, ang lelaman nanun gaz egin atoz. Jesus azu me ibol binige ileg mitian. ³⁷ Jesus i mangau gauz langadinlon inau, ge tamolpain aenta ladin lon so malik. ³⁸ Mewoi lakoi Profet Asaia inan azu me malik itasawoi, Ujanzen ite i am nama azu woi ilon lon malik ? Ujanzen i tiwon petengenama am ngiliama woi. ³⁹ Me funoi Profet Asaia igaze tamolpain me bubudin gegaunoi Kristus Jesus inan azu me ladin lon so malikoi. ⁴⁰ Anut i siben meladin i fanati, nadin bubudin inaug pat egin itase, ge megin teap pe i meladin fatu nasiwoi, map kankan lon po ibolpa i ladin lon malik oi. Pa i didangsap, nga i ngikibianappe. ⁴¹ Asaia i azu me ibollak inan fun me, i siben Jesus inan tiwon meg lelaman malan lon nasi mewoi azu me igaze. ⁴² Gaten gaz gauz i Jesus oi ladinlon malik lak ge, i Farisia gaten gaz oi dizez mewoi inadin ladin lon maliknen me so dibol ita ase, i gazop ubou ablon dipasoi mewoi dizez. ⁴³ Farisia gaten gaz me i ladin mok ibol, ta i bingadin dibisawoi, i ladin so ibol Anut i bingadin bisanen me. ⁴⁴ Mewoi Jesus i wog ibol, tamol itei i ngawoi ilonlon malik lak me ,inga woi mon so ilonlon malik, tea mam i nga nuag ge ngaselak iwoi mai ilonlon malik, ⁴⁵ ge tamol itei i nga nasagime, i mam nasime i nga nuag ge ngaselak. ⁴⁶ Nga tan elak lelaman egin ngaselak, tamol ta i ngawoi ilonlon malik map i mafuzlon so imadowoi. ⁴⁷ Ta i nga inag azu ilong pa i so uzi pani ime, nga i inan kagin me so ngebetenaewoi. Ngainag uzat me betenek kamang tea, tan elak tea nga tamolpain dipadal lak me nga ngangaloi ngase. ⁴⁸ Tamol i, mizipang ge ngainag azu so ilong ime, me i siben inan tanaek dangan, Azu nga ngefelalelak me aloupa saen wadanglon tamolpain tiniawoi. ⁴⁹ Nga azu ta sibeg inag iloglon so ngabol ngame tea, Mam i nga noag ge ngase, i siben ibol azu me ngabol oi, i siben ibol azu me nga falalewoi. ⁵⁰ Nga ngalong azu me basnen tiwon i sansan pe bas ienoi, mewoi azu dangan ngabollak me, me Mam i paiaglak me mon ngabol. Sibeg inag kankan lon so ngabol.