¹ Lwe zyajenda zinizi u Pavuli ahepa mwa Ateni nukuvala mu Kolinti. ² Kula ahahomana numu Yuda we vahatinji wu Akwila, apafilwe mu Ponti, we shinishi ahinza kufuma ku Itali numushi wakwe u Pulisila, she u Kilavudi ahomeleshezizye vonti ava Yuda kwepa mu Roma. Pavuli ahavala kuvavo, ³ pe she vahavomba imbombo yoka, ahihala poka navo nukuvomba, she vali vatava mahema mumbombo. ⁴ Pe u Pavuli ahasivililaga musinagogi usabata wonti, ahayezyaga kuvalambilizya vonti ava Yuda nava Giliki. ⁵ Pe ilelo u Sila nu Timoteyo vahinza muntende kufuma ku Makedoniya, Pavuli ahayipa paweka kwizyi, kuvasimishizya ava Yuda kuti uYesu ahava mu Chilisiti. ⁶ Lole lwe ava Yuda vahasusya nukumuliga uwene, u Pavuli ahakunyunta amenda gakwe ku vavo nukuyanga kuvavo, ''Amavanda ginyu gavanje pamatwe ginyu; ne muzelu . Ukufuma ishi ndivala kuvakunzi.'' ⁷ Pe ahepa papo njukuvala kunyumba ya Titi umuntu we ahamunyilaga uMulungu. We inyumba yakwe yali kupipi nisinagogi. ⁸ Ukilisipi, umuputi wa sinagogi, ahamwitiha uMwene, poka na vonti ava nyumba yakwe; vope avinji nava Kolinti ve viuvuye pa zinizi vahitiha pe vahozelwa. ⁹ Umwene ahayanga kwa Pavuli muvusiku munjozi, ''Utahogope, lole yanga utapumaje. ¹⁰ Shendi nawe, nawumo we alikuvulazya, ine ndi navantu avinji munkaya ino.'' ¹¹ U Pavuli ahadila kula umwaha namezi 6, ahamanyisyaga inongwa zya Mulungu muvavo ¹² . Ilelo lwe u Galiyoni ali musinagogi wa Akaya, pe ava Yuda vimiliye nukuva ninsivo zyoka kumuvushila u Pavuli nukuvala nawo pilonjelwi; ¹³ vahati, ''Umuntu uno akulambilizya avantu ukuputa uMulungu amiho ge gatali mundajilo.'' ¹⁴ Lwe u Pavuli akwanza kuyanga, u Galiyoni ahati kuva Yuda, ''Mwe va Yuda, inga nalyoli amananzile zimo inga atazile umulandu umupiti,pe zingava zya njele pe khondeye ukukulonga iwe. ¹⁵ Nkandi inga mavuzyo aga mazwi namazina nindajilo zyinyu, pe muzimalizye mwemwe. she ntavajiye kuva ne mulonzi wa zinizi.'' ¹⁶ Ugaliyo pe ahavashimbizya pilonjelwi. ¹⁷ Pe vonti vahamulema u Sositeni, umupiti wa sinagogi, nukumuhoma wuyo pantanzi pa pilonjelwi. Lole u Galiyo atasajiye pazye vahavomba. ¹⁸ U Pavuli, vwe ayihala kwekula amasiku ge minji, ahafuma kuvamwavo ukuvala ku Siliya poka nu Pilisila nu Akwila. Vwe ashili atalovosile usumbi, mu-Kecheleya, mwe ahadumulila ninsisi zyakwe she alafile ishilapo. ¹⁹ Lwe vinzile mu Efeso, u Pavuli ahamuleha u Pilisila nu Akwila kula, uwene nyene ahavala musinagogi nukuyanga nava Yuda. ²⁰ Lwe vakumuvuzilizya u Pavuli ukutiu adile nkani, uwene ahahana. ²¹ Ahalagana navo, ahati, ''Ndiyinza havili kwimwe pala uMulungu akwanza.'' Ahepa nukuvala ku Efeso. ²² Lwe u Pavuli afisile mu-Kesaleya, ahazuva nukulamuha ishivanza mu-Yerusalemu pe ukufuma apo ahishila mwa Antiyokiya. ²³ Lwe adiliye amasiku gamo kula, u Pavuli ahepa nukujenda munsi ya Galatiya namu Filijiya nu kuvajimva vonti avasundikwa. ²⁴ Ilelo umu Yuda we vahamwitaga Apolo, umu Alekizandeliya mumpapwa, ahinza mu Efeso. Ahayangaga shete nukumanya nkani avakalata. ²⁵ U Apolo vahamulingania muvimanyisyo vya Mwene. Kupembiwa mukasi numupepo, ayanzile nu kuvamanyisya shete ivintu kuyana nu Yesu, nashe amanyile lweka ulozyo lwa Yohani. ²⁶ U Apolo ahanda kuyanga nuvujimvu musinagogi. Lole u Pilisila nu Akwila vahamwivwa, pe vahamusendela paluvazu nu kumulingania ahinza idala lya Mulungu. ²⁷ Lwe akunyonywa ukuvala mu Akaya, avamwavo vahamugomya wuyo nukuvasimbila avasundikwa vamu Akaya kuti vamuposhele. Vwe afiha, ahavatula nkani vovitisile pa vwila. ²⁸ U Apolo ahavahana nkani ava Yuda pe vahadalinkana pavwinji, ahavalanjizya mwa kalata ukuti uYesu we wu Chilisiti.