¹ Kuhinza kwava ahavalilo lye u Apolo ali ku Kolinti, u Pavuli ahashilingania munsi ya pamwanya nukwinza munkaya ya Efeso, kwe ahavaga vamo avasundikwa kwekula. ² Upavuli ahati kuvavo, ''Muposhele umupepo umufinjile pe muhasuvilaga?'' Vahati kukwakwe, ''Awe, tutivuye nalumo nizya mupepo umufinjile.'' ³ Upavuli ahati, ''Pe muhozelwa kushoni?'' Vahati, "Mu lozyo lwa Yohani.'' ⁴ Pe u Pavuli ahamula, ''yohani ahozyaga ulozyo lwa lupinduho. Ahavavuzyaga avantu ukuti vasuvile muwoka we inti ayinzaje pisinda pakwe, she mwe mwa Yesu.'' ⁵ Lwe avantu vivwa zinizi, vahozelwa mwizina lya Mwene u Yesu. ⁶ Ilelo lwe u Pavuli avisile inyove zyakwe pavavo, umupepo umufinjile wuhinza mumwavo pe vahayanga na munjango izinji nu kukuvwa. ⁷ Vonti poka vamile avanavuli 12. ⁸ Upavuli ahavala musinagogi nu kuyanga umwakujimba ku mezi gatatu, kuvalingania nu kuvalambilizya izya shinamwene sha Mulungu. ⁹ Lwe vamo ava Yuda ve vagomizye nu kusita kuvwila, vahandas ukuyanga imbivi izya idala pilongolela pa mpuga. Pe u Pvuliu ahavaleha avene ahamusenda umusundikwa, vahalinganiaga navo isiku lyonti mwiyumba lya kumanyisizya ilya Tilana. ¹⁰ Ishi shapitiliye kumaha gavili, ukuti wonti we ahihalaga mu asiya vahivwa izwi lya Mwene, vonti ava Yuda nava Giliki. ¹¹ U Mulungu ahavombaga amafindangon amapiti munyove zya Pavuli, ¹² pe nutwenda twa kusyumulila amatwinsi ni apuloni twe apalamansizye vahatutwalaga kuvavinu nimbina zyavo zihavepa nimpepo imbivi zihepaga mumwavo. ¹³ Loli kwamile umu Yuda wumo umuvinga-mpepo ahazyungula mutwaya. Vahamwita izina lya Mwene uYesu ukuti bvavanje namaha pa mpepo imbivi pe vahati, ''Mwa Yesu we uPavuli akulumbilila, nkulajila ukuti ufumaje kunzi.'' ¹⁴ Umuputi umupiti uwa va Yuda, we izina Sikava, ali navalumendo 7 ve vahavombaga zinizi. ¹⁵ Impepo imivi zihamwamula, ''Yesu mumanyile, wu Pavuli nkumanya; ilelo mwe vawenu?'' ¹⁶ Impepo imbivi mumuntu zihadomoshela pa muvinga-mpepo zihavapota amaha nukuvahoma. Pe zihafuma munyumba ishitali zya vulaye. ¹⁷ Izi zyamanyikilwe ku wonti, vonti ava Yuda nava Giliki, ve vahihalaga ku Efeso. Vinzile vogopa nkani, nizina lya Mwene lihashindikwa. ¹⁸ Vope, avinji avitisi vahinzaga nu kulapa nu kuleta uvwanaloli vwontiu uvwa mbombo imbivi zye zyavomba. ¹⁹ Avinji ve vahavombaga izya mayele vahaleta amabuku gavo poka vahagosha paminso ga wontyi. lye vavelenga uvwinji kwavo, wali utuvuga twa siliva 50,000. ²⁰ Pe nizwi lya Mwene lihasata apapiti munzila zya maha. ²¹ Ilelo lye u Pavuli amazile imbombo yakwe mu Efeso, ahasiva mumupepo ukushilingania mu Makedoniya naku Akiya lwe akuvala ku Yerusalemu; ahati, ''Lwe nafuma kula, nkwanza imbe nenye namu Roma.'' ²² Upavuli ahatuma ku Makedoniya vavili muvala ve vamuvombeye uwene, uTimoti nu Elasito loli uwene umwenesho ahihala hansi mu Asiya. ²³ Pepala patali nahamu ahakuyuvania mu Efeso, kuyana ni Dala. ²⁴ Umusyana siliva wumo izina u Demeteli, we ahagomba ishifwani sha siliva isha Atemi. Yamuleteye indalama inyinji uhagomba. ²⁵ Pe ahavunganiha poka avavomba mbombo vapa vuyo vula ahati, ''Vanavuli, mukumanya ukuti mumbombo ino yikutupa inyinji. ²⁶ Mukwenya nukwivwa kuti, tekweku Efeso kweka, loli mwonti namu Asiya u Pavuli uno ahavalambilizya nuku galula avantu avinji. Akuyanga akuti imilungu ya kugombela inyove te milungu. ²⁷ Te kuva apavivi kweka loli nahakazizye hope halisupa, loli nitempeli lya mulungu umwantanda u Atemi vuliva shintu shavulo, nuvupiti vwakwe vuliva vwa vulo, uwene we avamu Asiya vonti ninsi vakumuputa.'' ²⁸ Lwe vivuye zinizi, vizuliwe numulaha vahakuta, vahati, ''Umupiti wu Atemi uwamu Efeso.'' ²⁹ Inkaya yonti yihinza yizula nukuyuvana, navantu vahashimbilila ninsivo yoka ukuvala kunyumba yakwenyelezya utulumbe. Vahavafyula avamwavo vahajendaga navo, uGayonu Alisitaliko, ve vafumile ku Makedoniya. ³⁰ Upavuli ahanzaga ukwinjila mumpuga ya vantu, loli avasundikwa vahamulesya. ³¹ Sona, vamo avasongo vamunkaya ya Asiya ve vali vamwavo vahamutumila ukalata uwakumulambilizya ukuti atahinjilaje munyumba iyakwenyelezya utulumbe. ³² Vamu avantu vahaholelaga kushintu shoka, na vamu ishamwavo, lwe impuga yayuvine. vamu avinji muvavo vatahamanyaga ukuti shoni she valipoka. ³³ Vamu mumpuga vahamusoha u Alekizanda, we ava Yuda vahamusunchilizyaga kuntanzi. Pe u Alekizanda ahayezya ninyove yakwe, ukuti ayanje zimo izya vutuli. ³⁴ Loli lwe vamanya ukutimu Yuda, vonti vahahola mutuvalilo tuvili nizwi lyoka, vahati, ''Umupiti wu Atemi uwamu Efeso.'' ³⁵ Lwe umusimbi wa muhaya ayipumilizya impuga, ahati, mwe vantu vamu Efeso, muntu vuli we aliko we atakumanya ukuti inkaya ya mu Efeso musunga tempeli uwa Atemi umupiti navashifwani she shihagwa kufuma kumwanya? ³⁶ Lye tukwenya ukuti ivintu vinivi tevwakuhanilwa, mungapuma vulo mutahavombe nashimo umwakuhalambana. ³⁷ Pakuti mwavaleta avantu iva kwilonjelwi vete viva vamutempeli pamu ukuvomba zimo imbivi kwa mulungu witu umwantanda. ³⁸ Ilelo, inga u Demeteli na vahasyana ve vali nawo vakwanza ukumulonjelela umuntu, amalonjelwi migule na vasungansi. Valeshe valongane veka. ³⁹ Loli inga ukulondola kuntamyo izyamwavo, pe zyope zililongwa muluhomano lwa vimishilwa. ⁴⁰ She nalyoli tuli apavivi ukulongwa izya vuyuvane vwi siku. Nashimo she shingaleta ukusita kulemelana uku, havili utangashilingania.'' ⁴¹ Lwe ayanga zinizi, uluhomano lwasizile.