¹ Ishi lwe vadumunsania mu twaya utwa Amphipolisi naha Apoloniya, vahinza kuhaya ha Tesalonika, kwe kwamie isinagogi yava Yuda. ² U Pavuli, inza she amiho gali, ahavala kuvavo, ukuyana kwa masabata gatatu vahayanjizyania navo ukufuma mumasimbo. ³ Ahigulaga amasimbo nukulingania ukuti shamile shinza kwa Chilisiti ukuyimba nukuzyuha ukufuma kuvafwe. Ahati, ''U Yesu uno we nkulumbililakukwinyu we wu Chilisiti.'' ⁴ Vamo ava Yuda vahalambiziwa ukuti vope vayisanzye nu Pavuli nu Sayilasi, nukuvasanzya poka nimbazyo impiti iya va Giliki ve vayipiye, patamile nanti vansi avantanda ve vahalongozyaga. ⁵ Loli ava Yuda vevatahasuvilaga, vahatutiliziwa nuvuzuva, vahasenda vamo avantu avaviviukufuma kuvuzilo vwakukazizya, vahavunganiha ipuga poka, pe vahayipela inkaya yihavuluma.Ukuyihalipila inyumba ya Jasoni, vahalondolaga ukuti vamulete u Pavuli nu Sayilasi kunzi ku vantu. ⁶ Loli lwe vatavazile venevo, vahamukwesa u Jasoni na vamo avamwavo pantanzi pave vahalongozyaga inkaya, vakuholela, ''Iva ve vantu ve vaying'anamula insi pansi ve vinza uku kope. ⁷ Avantu ava ve u Jasoni avaposheleye vakuvomba izya kususania nindajilo zya Kalisali, vakuti kuli uMwene uwunji we wu-Yesu.'' ⁸ Vakutamia ivumba na valongozi vankaya ve va nivwa ivintu ivi. ⁹ Loli lwe vasenda avazinjilili kufuma kwa Jasoni na vanji, pe vahavaleha vajenda. ¹⁰ Uvusiku vula avamwavo vahavatuma u Pavulin nu Sayilasi ku Bereya. Lwe vafisile kula, vahavala ku sinagogilya Yuda. ¹¹ Ishi avantu iva vashevile ukulusya ava Tesolonika, vahaposhelaga izwi nu kulivazya ninjele zyavo, kupima amasimbo shima ukwenya nanti izi mweziveleye. ¹² Pisho avinji vavo vahasuvila, ukusanzya navamo ava Giliki avantanda ve vahasonjelezyaga navanavuli avinji. ¹³ Lwe ava Yuda mu Tesalonike vamanya ukuti u pavuli wope akulumbilila izwi ku Benya, vahavala kulanye ukubvasonjelezya valitamyaje ivumba. ¹⁴ Pe umwaluvilo, avamwavo vahamutuma u Pavuli ukuvala kwa sumbi, loli u Sayilasi nu Timoti vahihala kulanye. ¹⁵ Vala ve vahamulongozyaga u Pavuli vahamusenda nukumutwala kuvutali kunkaya ya Ateni. Lwe vamuleha u Pavuli kula, vahaposhela kufuma kuwuyo ukuvalingania u Sayilasi nu Timoti ukuti vavale ku wuyo luvilo luvilo. ¹⁶ Ishi pe u Pavuli ashili akuvalindilila ku Ateni, umupepo wakwe wuhamutamia mukasi yakwe lye akwenya inkaya yizuye niviholanio. ¹⁷ Pe ahayanjizania isiku lynti musinagogi poka nava Yuda navasnji ve vahaputaga uMulungu, nave vali mwevakukazizya na vonti vala ve vahajikwaga vali kulanye. ¹⁸ Navamo ava Epikuleyani na Sitoyikiavamanyi ve vahamwenyelezyaga uwene. Vamo vahati, ''Shoni she we akulavaya akuyezya ukuyanga?'' Avanji vahati, ''akuva inza we wula we akwitizya avantu ukuti valandataje amalungu amajeni,'' shifukwa ahalumbililaga ivangeli ukuyana nu Yesu nukuzyuha. ¹⁹ Vahamusenda u Pavuli nukumuleta ku Alewopagasi, vahati, ''Tungamanya insambilizyo ipya zye wayangaga? ²⁰ Pakuti ukuleta ivintu ivijeni ku makutwi gitu. Pisho, tukwanza tumanye ka ivintu ivi vikusula shoni.'' ²¹ ( Pishi vonti ava Ateni na vajeni ve vakwihala kulanye vakusumba ahavalilo havo pavulo pamo inga vamuvuzyaga pamo vakumutejelezyaga ukuyana nashimo ishipya.) ²² Pe u Pavuli ahimilila pakasi pava Alewopagasi nahati, ''Mwe vantu vamu Ateni, nkwenya mwe vakuputa amalungu munzila zyonti. ²³ Pakuti lwe kushilingania nukwenya ivintu vye mukuviputa, kwaga pavifinjile vyinyu pavye vitali mumasimbo, ''Kwa Mulungu vatakumanyikwa,'' pe pisho mukuputa muvusita kumanya, ishi she kukumusya ku kwinyu. ²⁴ Umulungu wahapela insi na vyonti vye vili mumo, pakuva wu Mwene wa kumwanya na pansi, atakwihala mutempeli ye yizenjilweninyove zyinyu. ²⁵ Kope nakwe kupokwa atakupokwa ninyove zya vantu nape ahanzaga shili shonti, pe wuyo umwenesho akupa uvulanzi nukufuta na vyonti. ²⁶ Ukufumila kumutundu woka ahapela inkolo zya vantu ukwihala pamwanya pansi, nukuvavishila utuvalilo namampaha aga muvuyo vwe vakwihala mumo, ²⁷ pakuti vahondeye ukumulondola uMulungu nukuti pamo vangayivwa munzila zyavo kuvala kwa wuyo nu kumwaga wuyo. Lye atali kuvutali kufuma ku woka wiswe. ²⁸ Muwuyo mwe tukwihala nu kujenda nukuva vwihalo vwitu, ngati she woka uwa vakwimba witu ayanzile, 'Ukuva niswe swembeyu yakwe.' ²⁹ ''Pisho, ukuva swe mbeyu ya Mulungu, tutahondeye ukusiva ukuti utuvelo tuholine ngati wu golide, pamo usiliva, pamo ivwe- niviholanio vye vyapeliwe na vahavinza nukusivilila kwa muntu. ³⁰ Pisho uMulungu ahasala utuvalilo utwa kusita kumanya, loli ishi akuhomeshezya avantu vonti ukuti vapindushe. ³¹ Ishi she shifukwas she avavisile isiku lye alilonga insi muvugolosu ukujendela mu muntu we ahamuseva. Umulungu ahapa ishisimishizyo isha muntu uno kuli vonti pakumuzusya ukufuma kuvafwe.'' ³² Ishi lwe avantu va Ateni vivwa izya kuzyuha kuvafwe, vamo vahamovela u Pavuli; loli avanji vahati, ''Tuli tejelezya havili ku kwaho kuyana nishi.'' ³³ Ukufuma pisho, u Pavuli ahavaleha venevo. ³⁴ Loli vamo avantu vahayisanzya nukusuvila, poka nu Diwonyisiwusi uwaku Alewopagati, nu mwantanda we vahamwitizyaga Damalizi, pe navanji vahavala navo.