¹ Pavuli wope ahinza ku Delebe naku Lisitala, pe yenya, ahamwaga umu positili we ali wu Timoti izina, umwana wamwantanda umu Yuda we ali mwitisi, loli u yise ali mu Giliki. ² Ahayangwaga inyinza ku vamwavo we vali pa Lisitala navamu Ikoniya. ³ U Pavuli ahanzaga ajendaje nawo, pe ahamusenda nukumuvola ukuvolwa mulandu wava Yuda vevali mu vuzilo vula, pakuti vonti vamanyile ukuti uyise mu Giliki. ⁴ Ilelo lwe vakujenda mu nkaya, vahashilaga muvuzilo mwe avapositili na vasongo we vali mu Yerusalemu vatili vivwilaje. ⁵ Pe ivivanza vihagoma namaha mulwitiho nukuvala mumbazyo shima. ⁶ Pauli na vamwavo vahadumunsania muvigavo vya mu Filigiya nivya mu Galatiya, mulandu umupepo umufinjile ahavahanizya ukuti vayanje inongwa mu shigavo sha Asiya. ⁷ Lwe vapalamila mu Misiya, vahelezya ukuvala mu Bitiniya, loli umupepo wa Yesu ahavagalusya. ⁸ Pe vahajenda mu Misiya vahiha ukuvala mu nkaya ya Tiloya. ⁹ Pe injozi zihamuloleshela u Pavuli uvusiku: umuntu wamu Makedoniya ayimiliye papo, ahamulava ukuti, ''Nzaga lamba ku Makedoniya ututule.'' ¹⁰ Lwe u Pavuli avwenyi injozi, mwaluvilo tuhadumula ukuvala ku Makedoniya, tuhadumula ukuti uMulungu akutwanza tuve tulumbilile inongwa inyinza kulivavo. ¹¹ Pe tuhalamba usumbi ukufuma mu Tiloya, tuhagoloha ukuvala mu Samatilake, havili Shadavi tuhafiha mu Ndeyapoli. ¹² Ukufuma uko tuhavala mu Filipi, ye nkaya impiti mu Makedoniya ahaya ahakumanyikwa munkaya yila naye ava Roma vaposile. ¹³ Pisiku lya Sabata tuhafuma munkaya nu kuvala kwijenje, kwe tuhatinji kwe vakuputila, pe tuhihala nukuyanga navantanda vevavungine. ¹⁴ Umwantanda wumo we izina lyakwe ali wu Lidiya, we ahakazya amendas amashemamu ukufuma mu Tiyatila, we ahamusugamililaga uMulungu, ahatwivwa. Umwene ahamwigula umoyo nu kwivwa zye ahayangaga u Pavuli. ¹⁵ Ilelo lwe ayozelwa poka nava munyumba yakwe, pe ahatulambilizya ahati, ''Nanti muvwenyi ukuti mwitisile uMwene, pe mwinze mwihalaje mu nyumba yane.'' pe ahatulambilizya. ¹⁶ Isiku limo lwe tukuvala pevakuputila, pe tuhahomana nu mulindu wumo we ali nimpepo ya vulaguzi, we avaloncheye ishuma ishinjiava avapiti vakwe nu vulaguzi vwakwe. ¹⁷ Umwantanda uno ahamulandata u Pavuli niswe nukuhola jukuti, ''Avantu ava vavomvi va Mulungu umulusyi. Ve vakukumusya kuliwe idala lya vuposhi.'' ¹⁸ Ahavombaga uvu amasiku ge minji loli u Pavuli, lwe avisitwe nkani nawuy, ahagalunkana nu kuyanga kumpepo, ''Nkukulamula iwe mwizina lya Yesu Chilisiti fuma muli wuyo.'' Yihafuma pa havalilo hehala. ¹⁹ Ilelo avasongo vakwe lwe vazile hafumile he vahalonchelaga mumo, pe vahamulema u Pavuli nu Sila nukuvakwesela kuvuzilo uvwakukazizya ku vavulamulili. ²⁰ Lwe vavalesite kuvalonzi, vahati, ''Avantu ava vakutamya munkaya ino. Veva Yuda. ²¹ Vakukumusya amiho ge iswe swe Varoma mwiho ukugaposhela nukugalandata. ²² Pe impuga yonti yihavavushila u Pavuli nu Sila; avalonzi vahazepula namenda gavo nukuvalamula ukuti vahomwaje nindisa. ²³ Lwe vavahomile ningumi inyinji, nukuvigalila mu jele nukuhomeshezya umusunga jele ukuti avenyelezye nkani. ²⁴ Lwe vivuye uluhomelezyio lunulu, pe umusunga jele ahavigalila mukasi nu kuvapinya ivinama vyavo mumapampa. ²⁵ Pakasi pavusiku u Pavuli nu Sila vahayiputaga nukwimba inyimbo zya Mulungu, navakungwa avamwavo vahavatejelezyaga. ²⁶ Naluvilo kuhinza ishizumanji ishipiti nkani, nulwalo lwa jele luhayingana; mwaluvilo ivilyango vihiguha, namanyololo gavonti gahazuliha. ²⁷ Umusunga jele lwe adamusile nukwaga amalyango gigusile, pe ahakula upanga wakwe ahatinji ayilase, mulandu asivile ukuti avakungwa vonti vashimbiye. ²⁸ Pe u Pavuli ahapunda izwi ipiti nkani ahati, ''Utahayivulazye weka, mulasndu swenti tulipo.'' ²⁹ Umusunga jele ahahozya nu kwinjila, lwa akutetema ilyoga, ahagwa muvinama vya Pavuli nu Sila, ³⁰ pe ahavafumya kunzi ahati, ''Mwe va mwene imbombe shoni ukuti impokwe?'' ³¹ Vahati, ''Umwitishe uMwene uYesu, pe ukupokwa, iwe ninyumba yaho yonti.'' ³² Pe vahamuvuzya inongwa, poka na vonti ava munyumba yakwe. ³³ Pe umusunga jele ahavasenda pahavalilo hehala ahavusiku, nukuvozya ivilonda vyavo, pe wuyo nava munyumba yakwe vonti vahozelwa mwaluvilo. ³⁴ Lwe amulesite u Pavuli nu Sila munyumba yakwe nukuvapa ishakulya, ahaseshela nkani poka nava munyumba yakwe, ukuti amwitiha uMulungu. ³⁵ Ilelo lwe kushiye, pe avalonzi vahatuma amazwi kuvasunzi, ukuti, ''Leha vajendaje.'' ³⁶ Pe umusunga jele ahayanga kwa Pavuli, ukuti, ''Avalonzi bvatuma amazwi kukwane vakuti mufumaje, vwelaji mumjutende.'' ³⁷ Loli u Pavuli ahayanga kuvavo, ''Vatuhomile apazelu lwe vatatulonzile nape swe Varoma- havili vahatwigalila mu jele. Havili ishi pe vakwanza ukutufumya kuluvazu? Awe! Valeshe vinze vatufumye vavo.'' ³⁸ Pe avasikali vahavavuzya avahata nkaya amazwi aga, lwe vivuye ukuti u Pavuli nu Sila vali Varoma, vali nilyoga. ³⁹ Avalonzi vahinza nukulambilizya kuli vavo nu kuvafumya, nu kuvavuzya ukuti vepe munkaya yila. ⁴⁰ Pe u Pavuli nu Sila vahafuma mu jele nukwinza kunyumba ya Lidiya. Lwe u Pavuli nu Sila vavwenyi avamwavo, vahavajimva nukwepa munkaya yila.