¹ Yenyi lugano vuli lwe uTata atupiye iswe, ukuti teitwaje ukuva swe vana va Mulungu, nishi shetuli. Pashifukwa shinishi, insi yitatumanyile iswe, mulandu yitamumanyile. ² Vankundwa, ishi swe vana va Mulungu, ishi she shili shitavumbusile she ziliva. Tumanyile ukuti inga u Chilisiti avoneshela, tuliva inza wuyo, she tuli mwenya uwene inza she ali. ³ Uno wonti we ali nulusuvilo lunulu mumwakwe akuyizelufya weka inza she wope muzelu. ⁴ Uno wonti we akutala amalandu akushizania inkomelezyo, she uvutala malandu vushizyania nkomelezyo. ⁵ Mumanyile ukuti u Chilisiti ahavumbuha ukuti ayefyaje imbivi, numumwakwe mutali imbivi. Nawumo we akusyelematila mumwakwe akujendelela ukutala amalandu. ⁶ Nawumo we akujendelela kutala amalandu amuvwenyi uwene pamu ukumumanya uwene. ⁷ Vana, mutahaleshe wumo avasovezye. Uno wonti we akuvomba uvugolosu, inza she u Chilisiti mugolosu. ⁸ Uno we akutala amalandu akufuma kwa satana, she u satana ahatala amalandu kufuma kwe kuvwandilo. Pashifukwa shinishi umwana wa Mulungu ahavumbuha, ukuti ananganie imbombo zya setano. ⁹ Uno we apafilwe kufuma kwa Mulungu atakupitilila kutala amalandu, mulandu imbeyu ya Mulungu yisyelematiye muwuyi. Atangajendelela kutala amalandu , mulandu apafilwe mwa Mulungu. ¹⁰ Mwizi avana va Mulungun na vana va setano vakuvumbuha: uno we atakuvomba uvugolosu atafumile kwa Mulungu, nawunuyo we atamuganile nuwamwavo. ¹¹ Pe ili lye lizyi lye twivuye kufuma kwe kuvwandilo: tuganane uno nuwamwavo. ¹² Tutahave inza u Kayini, we afumile kumuvivi ahamugoga nu wamwavo. Shoni she amugozile uwene? Mulandu imbombo zyakwe zyamile mbivi nu wamwavo zyamile ngolosu. ¹³ Mutahasukumile, vamwitu, inga insi yivapasite imwe. ¹⁴ Tumanyile ukuti tushilinginie kufuma kuvala ku vulanzi, mulandu tuvaganile avamwitu. ¹⁵ Wonti we atali nishikunzi asyaye kwe kuvufwe. Wonti we inga apasite avamwavo mugozi. Mumanyile ukuti nawumo umugozi we ali nuvulanzi vwashima vutakwajikwa muwuyo. ¹⁶ Pishi tutamanyile ulugano, mulandu u Chilisiti ahayipa uvulanzi vwakwe kwiswe. Niswe vulo tuyipanje uvulanzi pazya vamwitu. ¹⁷ Pelelo inga wumo alinavya vimo ivintu ivya munsi umu, akwenya uwamwavo akusovelwa, loli akwigalila umwoyo wakwe uwavutuli kufuma kukwakwe, pe ishikunzi sha Mulungu shingasyala vuli vuli mumwakwe? ¹⁸ Vana vane, tutahime nishikunzi isha mazwi pamu isha ndimi, loli mumbombo nu vwanalyoli. ¹⁹ Mulandu wazinizi tumanyile ukuti iswe tufumile ku vwanalyoli, na tukusimishizya amoyo gitu pilongolela lyakwe. ²⁰ She inga amoyo gitu gakutulonga iswe, uMulungu mupiti kulusya amoyo gitu na azimanyile zyonti. ²¹ Vankundwa, inga amoyo gitu gatakutulonga iswe, pe tuli nuvujimvu pantanzi pa Mulungu. ²² Shonti she tukulava tuliposhela kufuma kukwakwe, mulandu tukulandata inkomelezyo zyakwe nu kuvomba zizyo zye zikumushela uwene. ²³ Izi zye nkomelezyo zyakwe: zikuti tusuvile mwe mwizina lya mwana u Yesu Chilisiti nu kuganama uno nuwamwavo, inza she atupiye iswe uluhomelezyo lunulu. ²⁴ Uno we akulandata inkomelezyo zya Mulungu akusyelematila mumwakwe, nu Mulungu akusyelematila, nu Mulungu akuva mumwakwe. Pishi tumanyile ukuti akuva muliswe, mu mupepo we atupiye iswe.