¹ Vana, nkusimba ivintu ivi kuti mutahavombaje imbivi. Nkandi wumo inga akuvomba imbivi, tuli numufusya kwa tata, uYesu Chilisiti, weka we muzelu. ² Zyuwene mwe tukuswila imbivi zyitu, havili te witu sweka vulo, nkandi wansi yonti. ³ Tuzimanyile ukuti tukwinza kumumanya, lwe twazisunga inkomelezyo zyakwe. ⁴ Uno we akuyanga ukuti ''Mumanyile uMulungu'' nkandi atakusunga inkomelezyo zyakwe we wamalenga, nu vanalyoli namumo mumwakwe. ⁵ Wonti we akusunga amazwi gakwe, mumwakwe nalyoli ulugano lwa Mulungu lukwanilisiwe. Muli izi tukumanya ukuti tuli mumwakwe: ⁶ wonti we akuti asyelematiye mwa Mulungu pe wope ahondeye ajendaje ngati she akujendaga. ⁷ Vankundwa, ntakusimba inkomelezyo impya kulimwe, nkandi inkali zye mwali nazyo ukwanda pa vwandilo. Inkomelezyo inkali lye lizyi lye muhivwa. ⁸ Ishi nkuvasimbila uluhomelezyo ulupya, lwe lwa nalyoli mwa Chilisiti na mumwinyu, shifukwa ishi shili kwepa, havili uluhozyo lwa nalyoli lulamile hali. ⁹ Uno we akuti ali muluhozyo havili amupasite uwamwavo we ashili ali mushisi nahavalilo hanaha. ¹⁰ Uno we amuganile uwamwavo pe we asyematiliyemuluhozyo pe nashimo ishakupunula mu mwakwe. ¹¹ Nkandi uno we amupasite uwamwavo pe we ali mushisi havili akujenda mushisi; atakumanya kwe akuvala shifukwa ishisi shitonkoye aminso gakwe. ¹² Nkuvasimbila, vana, mulandu imbivi zyinyu zyatetelwa mwizina lyakwe. ¹³ Nkuvasimbila, vatata, mulandu mu mumanyile uno kwanda pe pavwandilo. Nkuvasimbila, valumendo, mulandu mwa mupota umuvivi. Imbasimbiye, vana, pakuti mumanyile utata. ¹⁴ Imbasimbiye imwe vatata, shifukwa mumumanyile uno we ali pa vwandilo. Imbasimbiye, valumendo mulandu mwe vagomu havili pe mwamupota umuvivi. ¹⁵ Mutahayikunde insi pamo nivintu vye vili munsi. Lwe wumo ayiganile insi, kwe kuti ulugano lwa Tata lutali muli wuyo. ¹⁶ She vyonti vye vili munsi- vya mpapilo zya muvili, nivya mpapilo zya minso havili nivyavulanji vwa shilumba vitakufuma kwa Tata nkandi munsi ya pansi. ¹⁷ Insi nivinyonywa vyakwe vili kujenda. Nkandi uno we akuvomba ukwanza kwa Mulungu we alivako shima nashima. ¹⁸ Vana, havalilo havumalilo. Ngati she mwivuye ukuti umupinga chilisiti akwinza, ishi avinji avapinga chilisiti vinzile. muli zinizi tukumanya ukuti aha hvalilo havumalilo. ¹⁹ Vahepa kufuma kukwitu, she vatamile vitu. Vavanje vitu nge vahasyala niswe. Nkandi lwe vafumile, izi zihalanjizya ukuti vatamile vitu. ²⁰ Nkandi imwe muli nuvupakwa kufuma ku muzelu, havili pe mwevonti muzimanyile. ²¹ Ntasimbiye imwe ukuti mutavumanyile uvwanalyoli, nkandi mulandu muzimanyile havili mutali ilenga lye lingafuma muvwa nalyoli. ²² Wunanu we wamalenga nkandi uno we akuhana ukuti uYesu te u Chilisiti? Umuntu uyo we mupinga chilisiti, she pe akumuhana uTata nu mwana. ²³ Nawumo we akumuhana umwana pe angava nu Tata. We akumwitiha umwana we ali nu Tata. ²⁴ Kulimwe, leha zye muhivwa kwanda kuvwandilo zisyale mumwinyu. Inga zye muhivwa kwands kuvwandilo zisyelematiye mumwinyu pe nimwe mulisyelematila mu mwana nu Tata. ²⁵ Ulu lwe lufingwi ahatupa iswe- ulwa vulanzi vwa shima nashima. ²⁶ Imbasimbiye ivintu vinivi izya ve vangava tezya imwe. ²⁷ Kulimwe, uvupakwa vwe muhaposhela vusyelematiye mumwinyu, havili mutanganza wumo avamanyisye imwe. nkandi she uvupakwa vwakwe vukuvamanyisya shili shonti havili tezyamalenga, she mwe vukuvamanyisya imwe, muvanje mumwakwe. ²⁸ Ishi, vana, musyelematile mumwakwe ukuti lwe alivoneshela tuhave nuvujimvu havili pe tutahinze tupeziwe insoni pantanzi yakwinza kwakwe. ²⁹ Inga mumanyile ukuti umuzelu, mumanyile ukuti wonti we akuvomba uvugolosu we apafilwe kufuma kuliwuyo.