¹ Sa Yeso ma mara tize tigino vat, ma gun in anu manza ume me. ² "I rusa uguna ade tiye tire unu utanda ukafa adi nya vana unu agankirka me." ³ Ba anu adang akatuma ka Asere nan anu aje anu wa gurna a nikubu unu dang u katuma ka Asere, una niza kayafa. ⁴ Wa tirzi uguna wa meki Yeso wa hu me nihunzi. ⁵ Barki waa zi inu gusa, ''Inzo uganiya utanda ba, kati ace anu aharzina. ⁶ Uganiya sa Yeso maa ra ubatanya akura Saminu ukuturu, ⁷ ure uneh ma eh in niru ni mani mi kirfi in unya urunta, ma wu me mani anice, a me ina re imum yare. ⁸ Sa anu tarsa ume me wa ira anime, wa kunna iriba wa gu "Tige ticare na? ⁹ In guna azizi mani mage me ini kirfi gbardang a nya anu dira." ¹⁰ Ba Yeso, sa ma iri anime, ma gun we, "Nyani ya wunna i zinu bunkoro uneh uge me? Ma wuzam imum ihuma kang. ¹¹ Izi nan anu dira kondi uya uwui, a anime mi idida zo me nan mi. ¹² Ugamirka u mani ma ge sa ma wuza ani pum num, ma wuza ini barki abanga uvati um. ¹³ Kadundere im boo shi, vat adi han tize tige me anyimo unee adi ringizi in nimum be sa uneh uge me ma wuza." ¹⁴ Unu inde anyimo anu kirau in anu ware agino me, una niza Yahuda Iskaryoti, ma ha ahira anu adang akatuma ka Asere. ¹⁵ Ma gu, "Nyanini idi nyani inki ma wito shi me?" wa basa ikirfi ya zumo walwal akuri ataru wa nya me. ¹⁶ Uganiya ugino me uni maa meki mabinga muguna ma witi me. ¹⁷ Rono utuba utanda imum yare uzatu uyisti anu manza ume me wa eh ahira Yeso wa gu, "A bani u nyara ti barka ahira are imum yare utanda ukafa me ni? ¹⁸ Ba ma gu, " Ribe ni a nipin ahira a uye in gun me, unu dungara mani uganiya ume wa aye mamu, in di ri utanda ukafa akura awe me nan anu utarsa um.''''' ¹⁹ Anu tarsa ume me wa wuzi gusi sa ma buka we, wa barka imum yare utanda ukafa. ²⁰ Sa uwunjoro wa wunna, ma cukuno are imum yare nan anu tarsa ume me we ukirau in nanu ware. ²¹ Waa ra anyimo are imum yare ba ma gun we, "kadundere in boo shi uye anyimo ashi me ma di witum" ²² . Wa wuzi tipuru ti bit, wa tubi u igizo ume, wa inde- inde nani mi mani Ugomo Asere?" ²³ Ba ma kabirka, de sa ti re iso i inde nan me, me mani ma di witum. ²⁴ Vana unu ma di dusa, gusi u nyettike sa uzi a nice nume. Udeh u de sa ma cukuno adi witi vana unu usuro ume. Idi teki uni ri daki ayoo unu ugino ba. ²⁵ Ba Yahuda desa ma di witi me ma gu, "Nani mi mani unaje? Yeso ma gun me, wa buka in nice nuwe." ²⁶ Sa waa ra anyimo are imum yare, Yeso ma ziki uborodi me ma wu biringara anyimo aniza ni Asere, ma pusi ma nya anu manza ume ma gu, " Re ni. Nipum num nini.'' ²⁷ Sa ma ziki kuso ku myei ma ringirka ma nya we ma gu, ''Vatt ushi sa ni. ²⁸ Maye mam mani mu inko utize ma gebe sa adi kponko ni barki anu gbardang, barki avete ucara abanga anu gbardang. ²⁹ . In boo shi inda kuri in si mani nan shi ba, senke rono ugino me sa ti di si ma so nigo me nan shi atigomo ti acoo um.'' ³⁰ Sa wa wuza ireh, wa suri uhana anipana nu zaitun. ³¹ Ba Yeso ma gun we vat ushi idi pilzo aniye nige me barki mi, barki amu nyettike, "Indi vavi unu a nibee nigo me nan itam me idi samirka.' ³² Indi agiza shi uhana u Galili. Adumo uhira um. " ³³ Ba Bitrus ma gun me "Vat inki wa pilko barki hu, mi inda pilkom ba." ³⁴ Yeso ma gun me, ''Kadundere kani in boo we, uhana u runo ubigoro udi wu matara mu rusa um kani ka taru". ³⁵ Bitrus ma gu im me, ''Inki adi hum ini nan hu inda wunam matara murusa uwe ba" ane ani ukasu anu tarsa me wa buki. ³⁶ A' anime Yeso ma eh in we ahira sa atisa ani u Getsemani. Ma gu in anu manza ume me, "cukunoni aba me, mi ndi ha abirko inka wuna biringara." ³⁷ Ma ziki Bitrus nan ahana a Zabadi ware wa ginno me ma tubi apuru abit nan nun basa abanga kang. ³⁸ Ba ma gun we, in zini uzito anyimo uvengize um kan in kunna kasi ndi wi. Da tonno ni abanna me, i be ni mi. ³⁹ Sa maa ha cing, ma rizi in muhenu, ma wu biringara ma gu, "Acoo um, inki i wunna ini zikam ijasi ige me. Vat in anime daki unyara um ba, senke uwe". ⁴⁰ Ma kuri ahira anu tarsa ume me, ma iri we im moro, ba ma gu in Bitrus, Aca, ida ke i cukuno me shi inu be nan mi uganiya u inde ba ? ⁴¹ Cukunoni inu rusa i wuzi biringara kati i rizi anyimo ubata. Bibe ba hem, nipum me na siziki me". ⁴² A anime ukuro ukure, ma ha maka wunna biringara ma gu, " Acoo um inki ani me ida aka me ba a wuzi ini, ca a wuzi imum iruba i we". ⁴³ Ma kuri ma ze ma kem we im moro barki sa moro ma raa we aje kang. ⁴⁴ Sa ma kuri ma ceki we, ma dusa maka wunna biringara ukuro taru, inu boo tize ti inde me. ⁴⁵ Ma ha ahira anu tarsa ume me ma gun we, " Ida sisi im moro me nan uvenke? I ye uganiya wa aye mamu a nya vana unu a tari ta anu a madini . ⁴⁶ Hira ni ti dusa, ya ira unu wito um monno ma aye mamu." ⁴⁷ Sa ma raa anyimo atize, Yahuda, a nyimo anu kirau in nanu ware ma eh. Nigo ni anu gbardang nan me usuro ahira anu adang in tivira nan tibina. ⁴⁸ Unu wito mamu bara nan we agi, "De sa indi gbindirko me, me ma mani unu me, i meki me." ⁴⁹ Ma eh debe ahira a Yeso ma gu, "Gajja unu udungara" ma gbindirko me. ⁵⁰ Yeso ma gun me, "Uroni wuza imum be sa ya ayen hu." Wa eh wa meki Yeso wa dusan in me. ⁵¹ Abini me uye sa ma zi nigo nan yeso ma hupi uvira upanu, ma koriko utui urere unu dungara u katuma ka Asere. ⁵² Yeso ma gun me, "kurzo uvira uwe me upanu me, vat de sa ma suso uvira, uvira uni udi cukuno iwono ime ⁵³ I hira daki ma bari in nyari ubenki ahira acoo um ba, sa ma da ke ma tumi ibe kadura kame me ago ukirau in kani kare? ⁵⁴ A ane ani adi amyincikina imum be sa a nyettike unu guna gbas imum ige me idi cukuno." ⁵⁵ Yeso ma gu in nigura me, ya aye in tivira nan tibina idi meki ni mi kasi ukari? kondi umaya in ribize udenge Asere in nu dungura anu daki ya meki ni mi ba. ⁵⁶ A ani me ya cukuno vat barki amyincika tize ta anu u kurzuzo utize ta Asere sa waa nyettike." Abini me vat anu tarsa ume me wa ceki me wa sumi. ⁵⁷ Anu meki uYeso wa han me ahira a kayafa, unu dang utize ta Asere ahira anu nyettike u tize ta Asere ahira ani'ori ni anu . ⁵⁸ Akem Bitrus ma haka ma tarsa piit uhana a nikubu nu unu udang me. sa ma ribe, ma cukuno nan unu tonzino ana tukum udenge wa Asere batti ma iri umara abanga me. ⁵⁹ Uganiya ugino me anu adang akatuma ka Asere nan aroni akatuma wa nyari ukem utize ti macico anice ni Yeso bati wa hu me. ⁶⁰ A anime daki wa kem ba a nime anu nyara uwuna ume macico wa hirsa, akem anu ware sa wa suri. ⁶¹ Wa gu, "Unu uge me maa gu agi ma da ke ma tuburko udenge Asere ma kuri ma bari uni anyimo a tiye ti taru.'" ⁶² Unu udang ukatuma ka Asere ma hiri ma tonno ma gu, "U zo we unu kabirka ba? Nyanini wa zinu boo me anice nuwe?" ⁶³ Yeso ma ciki me tik. unu udang ukatuma ka Asere ma gun me, "Ma pata we nan Asere ivai bukan duru ho mani Yeso vana Asere? ⁶⁴ Yeso ma kabirka ma gu, "wa buka in nice nuwe me. A aname in boo we uzika u kani uhana aje udi iri vana unu ma ciki a tari tina re tu bari, ma ehze anyimo a tiwiri ta sesere." ⁶⁵ Ba unu udang ukatuma ka Asere me ma jani turunga tume ma gu, "Ma iza Asere! nyanini ti kuri ti nyari? ana me ya kunna bi'izi ba Asere me. ⁶⁶ Nyani ya ira? wa kabirka wa gu, "Ma bari uhuna." ⁶⁷ Ba wa meki tuffizi ume toobi amu henu, wa tiri me, aye wa sonsi me tari, ⁶⁸ Inu gusa, "wuza duru u ira hu vana Asere buka de sa ma vavi we." ⁶⁹ Bitrus ma ciki a matara mani kubu me, kure kurere ku eh ku gun me, "Hu cangi waa zi nan Yeso unu u Galili." ⁷⁰ Ma wu matara aje awe ma gu, "Mi inda tam imum be sa i boo ni ba." ⁷¹ Sa ma suro u hana anatukum kure kubura kurere ku iri me ku gu, ande sa wa ra ahira me unu ge me waa zin nigo me nan Yeso unu anu u Nazaret." ⁷² Ma kuri ma wu matara ini tonno ma gu, "Mi inda ba tam unu ge me ba!" ⁷³ Sa a dondokino cing ande sa waa tutturi wa gu in Bitrus, "Kudure hu uge me uzi nan me tize tuwe me ta bezi." ⁷⁴ Ma meki wuza unice nume anyo ini tonno sasas, in gusa shi inda tam unu me ba." Ahira me bigoro bi runo. ⁷⁵ Ba Bitrus ma ringi tize ti Yeso unu guna udi wu matara unu rusa um bigoro bidi ku runo." Ma suri a matara mam kataru.'' ma suri amatara ma meki aso kang.