¹ Sa ahira asana anu adang a katuma ka Asere nan ananu wa bari abanga uguna wa hu me. ² Ba wa tiri me wa dusa in me, wa witi me atari ti Bilatus u gumna. ³ Sa Yahuda unu wito in guna ahu me ma iri aweki tize ti guna a hume, ma nyari a vete me ucara abanga me ni, ma kurzo anu akatuma kadang ka Asere me nan ananu, ikirfi me azumo awalwal akuri a taru. ⁴ Ma gu, "Ma wuza nihara ni madini sa ma wito unu zatu ayari." Ba wa gu, nyanini myei maru ni? Ade awe. ⁵ Ma samirka ikirfi azumo awalwal agino me udenge Asere, ma suri maka cerike nice nume. ⁶ Anu adang akatuma ka Asere wa ori ikirfi me wa gu, "Ida rizi me a wu ikirfi ige me anyimo ubata ba, barki ikirfi me i maye mani." ⁷ Ba wa gamarka tize me nigo me wa kpi ahira uvarsi agenu in nikirfi me. ⁸ Barki anime, atisa ahira me "Ahira a maye" u aye ukani me. ⁹ Ba a myincikina ubuka u Irimiya agi, "Wa ziki azumo awalwal akuri ataru agino me, akirfi anu u Israila wa wu anice nume. ¹⁰ Wa kpi ahira unu bara umu haru, kasi ubuka Ugomo Asere sa maa wum.'' ¹¹ Yeso ma tonno aje u gumna, u gumna ma iki me, ho mani ugomo a Yahudawa? Yeso ma gun me , "Wa buka". ¹² Sa ana katuma kadang ka Asere nan ananu, wa inta me tize, daki ma kabirka ba. ¹³ Ba Bilatus ma gun me, "Daki wa kunna ubursi sa azi weni ba? ¹⁴ A anime daki ma kabirka we nigurang ni inde ba, u gumna me ma kunna biyau kang. ¹⁵ Aname uganiya uremnu, utanda u Gumna ma ke ma ceki anu u rere u inde sa anu wa zauka. ¹⁶ Uganiya me waazi in ure urere ugbas una niza Barabas. ¹⁷ Sa wa orno Bilatus ma gun we, " Aveni i nyara in ceki shi ni? barabas nani Yeso sa atisa me ugomo Asere?'. ¹⁸ Barki ma rusa ishina ini ya wunna a wito me. ¹⁹ Barki anime cangi, uganiya sa ma ciki ukpanku u tigomo, uneh me ma tumi in kadura agi, "Kara tari tuwe ahra unu zatu abanga aburi agino me. Ma ziton kani me ati roo barki me." ²⁰ Aname anu adang aka tuma ka Asere wa rigiza anu inguna wa zauka Barabas ahu Yeso. ²¹ Ugumna me ma kuri ma gun we, "Aveni anyimo anu ware wa gino i nyara in ceki me?", ba wa gu, ''Barabas. ²² Bilatus ma gun we, ''Yanini indi wuzi in Yeso, sa atisa me vana Asere?" vat wa kabirka, "Aagnkirka me." ²³ Ba ma gu, "Barki nyani, iya imum iburi ini ma wuza? Wa kinki uyeze amyirang kang, "a gankirka me." ²⁴ Sa Bilatus ma ira daki ma meki ace awe ba, ma ziki myei, ma kpici tari aje anu, ma gu, "Mi ma suro inzoom in myei anyimo a maye mu unu uzati abanga aburi uge me. Agino me ade ashi." ²⁵ Anu wa kabirka vat wa gu, "Aca maye mame me ma tarsin duru nan ahana aru." ²⁶ Ba ma ceki we Barabas, ma cobi Yeso ma nya we barki aka gankirka me. ²⁷ Ba anu anikara ni nikono ni ugumna me wa ha in Yeso akura ugumna, wa ori vat anu anikara ni nikono. ²⁸ Wa suso me turunga wa soki me udibi uvu u tigomo. ²⁹ Wa bari ni ire nikana wa wu me anice, wa witti me ubina utigomo a tari tinare tume me, wa tunguno aje ame inu wuza ume nibasa, innu gusa, " Ivai idodonkino ugomo a Yahudawa!" ³⁰ Wa tufsi me tobi wa kabi ubina me wa cobi me ni anice. ³¹ Sa wa mara u wuza ume nibasa, wa suso udibi u tigomo me, wa soki me turunga tume me, wa dusan me uhana ahira ugankirka me. ³² Sa wa suro wa kem una nu kureme una niza Saminu. Desa wa wu me gbas ma dusa nan we ma hanna utiti ugankirka u yeso. ³³ Sa wa biki ahira me sa a tisa ani ugolgota, a gusa ani "ukungkuwa." ³⁴ Wa nya me uwangu wa ketilke nan ire imum gbangbang masi, sa ma donkino ma game usa me. ³⁵ Sa wa gankirka me wa wuzi bizawazawa a hira aturunga tume me, ³⁶ Wa cukuno wa zinu ubee ume. ³⁷ Wa nyettike a naza a nice nume me wa gu, " Yeso ma zige me ugomo a Yahudawa." ³⁸ A gankirka akari ware nan me, unu inde a tari tinare unu inde a tari ti nan gure tume me. ³⁹ Anu agiza una innu zogizo ume inu zuro ace. ⁴⁰ Inu gusa, "Hu sa wa guna u dake u tuburko udenge Asere, ati ye ti taru u barka uni, bura nice nuwe me ni! Ingi hu vana Asere mani tunno azesere ugankirka me!" ⁴¹ Ane ani anu adangdang a katuma ka Asere nan na nu dungara nan ananu wa meki u wuza ume nibasa, wa zi innu gusa, ⁴² "Ma bursa aye, ca ma buri nice nume me. Me ugomo wa Israilawa mani ca ma tu ni ti di hem im me. ⁴³ Barki sa ma hem ina Asere, na Aserere me a buri me ana me, sa ma gusa agi me vana Asere mani. ⁴⁴ Akari agino me sa a gankirka we nigo me wa zogizi me cangi. ⁴⁵ Inu uwui ati ace ahira a wu mareu uhana azumo kataru uwunjoro. ⁴⁶ A zumo a taru me Yeso ma yeze nimyigrang magu, " Eloi Eloi lama sabatani? "Ugomo Asere Ugomo Asere nyanini ya wunna wa vetem ni? ⁴⁷ Aye sa wa turi mamu ahira me wa kunna, wa gu," unu me ma zinu tisa u Iliya mani." ⁴⁸ Ba uye anyimo awe me ma hiri innu sum, maka rumzo usoso a myei ma gbarara , ma yeze innu bina ma nya me ma si. ⁴⁹ Ukasu wa aye anyimo awe me wa gu ceki ni me ti iri nani Iliya ma di buri me. ⁵⁰ Yeso ma kuri ma yeze nimyirang in nikara, ma du ku nya nice. ⁵¹ Ugebtu me sa waa ra anyimo udenge Asere me u wata kare in nazessere utino adizi. Adizi azuruno, apo awara. ⁵² Mucau mu pogizino, anu alau sa wa wiji wa hirsa . ⁵³ Wa sussi anyimo a mucau, a mamu hira iwono me, wa ribe a nipin ni lau wa bezi ace awe me anu gbardang. ⁵⁴ Ana me sa una aje nikara ni nikono nan aye sa wazi nigo me sa wa zinu ubee u Yeso me wa iri adizi azuruno imum be sa ya kem, biyau bi meki we, wa gu, " kadure unu ge me vana Asere mani. ⁵⁵ Aneh gbardang sa wa tarsi Yeso usuro u Galili bati wa tarsi im me wa turi piit inu hira me . ⁵⁶ Anyimo awe Maryamu magdaliya nan Maryamu a'ino a yakubu nan Isubu nan ka' ino a hana a zabadi. ⁵⁷ Inu wunjoro shiu, ure unu ukem ma eh, unanu Armatiya, una niza Isubu, de sa maa zi unu tarsa u Yeso cangi. ⁵⁸ Ma ha ahira a Bilatus ma iki anya me nipum ni Yeso. Ba Bilatus ma wu anya me. ⁵⁹ Isubu ma ziki nipum me, ma tirzi inu malti ulau, ⁶⁰ maka nata ini anyimo icau ime me sa ma gansi a nipo. Ma hingirko nipo nidang anyo icau me ma dusa. ⁶¹ Maryamu Magadaliya nan Maryamu ukure me wa ciki anikira nicau me. ⁶² Sa ahira asana, rono uni kure u bara abanga, anu adang a katuma ka Asere nan anu bezi urusa wa gurna nan Bilatus. ⁶³ Wa gu "Sakura, ta ringi imum be sa unu rangigiza anu u gino me sa maa vengize ma buki ma di hiri anyimo a tiye ti taru amu cau. ⁶⁴ Anime buka aka bee icau me u hana a tiye ti taru kati anu tarsa umeme waka cuzo me, wa gu in nanu agi a ma hira anyimo icau, u rangiza wa dumo udi teki utuba." ⁶⁵ Bilatus ma gun we, " Zika ni anu nyarga waka bee ibinani nikara ni shi. ⁶⁶ Waka bee wa korso in nipo me wa wu anu nyarga.