¹ Adi bati tigomo ta zesere kasi mabura manu kirau sa ma ziki mafitila mawe me tantu uka gura umanyani ma tiyum. ² Anu chibi anyimo awe me ababana wani, anu ucibi anyimo awe me anu a jinjing wani. ³ Asenke ababana agino me wa inta mani anyimo amafitila mawe me ba. ⁴ Anu ajinjing me wa inta aru amani nan mafitila mawe anyimo me. ⁵ Sa manyani matiyom ma de u aye wa tubi ugbiso moro ma ziki we. ⁶ Inna tii aniye akunna utissa, agusa, manyani matiyom me maye! Suro ni i guri me! ⁷ Vat mabura magino me ma hiri ma bari mafitila mawe me. ⁸ Ababana me wa gun in anu ajinjin me, nyangizi duru mani mashi me cing mafitila maru mazinni wijo! ⁹ Ba anu ajinjin me wa kabirka wa gu ma da bari haru nan shi ba, hanani ahira anu ziza me. ika kpa in nace ashi me.' ¹⁰ Sa wa dusa ahira ukpa me, manyani matiyom me ma eh, ande sa wa ra ahira me wa ribe akorso udenge me. ¹¹ Sa adondonkino mabura magino wa ka aye, wa gu, 'Una akura, una akura, pokon duru anatukum . ¹² Ma kabirka magun we, kadundere, in boo shi, in tam shi ba. ¹³ Barki anime, cukuno ni ibe, ita shi uganiya ba. ¹⁴ Kasi unu mani sa maa hazi atanu amare manyanga, ma titi arere ame me ma nya we vat imum be sa ma zini. ¹⁵ Ma nya unu inde matelenti mani u cibi. Unu inde matelenti mare uye ma nya me u inde . konde avi ibinani u nikara nime me, ma dusa tanu tume me. ¹⁶ Desa ma kabi matelenti u cibi ma gun me ma ha maka gamara mani, ma kem mare mani u cibi. ¹⁷ Ani me ani unu kaba matelenti mare me cangi maka kem mare mare. ¹⁸ Me de sa ma kaba utelenti u inde me, maka gense adizi ma hunze ukirfi unu akura me ni. ¹⁹ Sa adondonkino, una kura arere agino me ma zee ma basa nan we. ²⁰ Me urere sa ma kaba matelenti manu cibi, ma haha mamu ma witi mare matelenti ucibi, magu una akura wa nyam matelenti manu cibi. Ira, makem mare manu cibi.' ²¹ Una akura me ma gun me, 'Gai urere uhuma , wa wuza kadure anyimo imum icing, indi tari we anyimo i gbardang aye cukunno iruba una akura uwe me.' ²² Urere u matelenti mani mare ma haha mamu, ma gu, Una kura, wa nyam matelenti mare. I ye makem mani mare kaba . ²³ Una akura me me ma gun me, 'Gai, urere uhuma. wa wuza kadure anyimo i cing in di tari we anyiomo i gbardang ribe anyimo iriba irum i una akura awe me.' ²⁴ Me urere me sa maa kabi utalenti uinde me, ma haha mamu ma gu, 'Una akura mi ni rusa hu unu upatti mani. U kuza ahira sa daki wa bira ba, u kuri u orso ahira daki wa cofo ni ba. ²⁵ Barki anime ani ma kunna biyau, ma gense adizi ma ha inka hunze bitalenti buwo meni adizi. Ira, iye imum be sa izi iwe.' ²⁶ Ba una kura me ma kabirka ma gu,'hu urere uburi mani, ugbara! u rusa in orso ahira sa daki ma cofo ni ba. ²⁷ Aname ya wuna urii uda nya ikirfi im ahira anu inso ikirfi, ingi ma zeh inda kaba im nan mareu me. ²⁸ Barki anime kaba ni utalenti ahira ame me i nya urere desa mazi matalenti mani u kirau me. ²⁹ Barki vat unu imum ake a kinki meni, iwu gbardang. Anime de sa ma zo me in imum ba imu be sa ma zi ni ake akabi ame. ³⁰ Reki ni urere uhem uge me nyimo a mareu ma concong, ahira sa ake shi arumzi ahini.' ³¹ Inki vana unu ma aye anyimo a ninonzo nume nan ibe i kadura ka me, ma di cukuno ahira adang ame. ³² Adi ori anabu vat aje ame, ma di suzo we ma inki sassas, kasi unu nibe ni itam. Sa ma ke hari itam nan imani. ³³ Ma di inki itam atari tinare, ma inki imani atari ti nangure. ³⁴ Ugomo ma di gu ande sa wa ra atari tinare tume, aye ni shi sa acoo am ringirka shi, i kabi tigomo tishi sa amu inko shi ni dati utuba unee. ³⁵ Barki maa kunna ikomo i nyam imum yare. ma kunna niwe nimyei, i nyam ni mi myei. ma wuzi nigenu i kabum. ³⁶ Maa zi bihurba i sokum turunga; ma wuzi ukoni i inta ni mi; maa ra udenge u nirere i eh i iri ni mi.' ³⁷ Abini ani anu tanu tiriri me wa di kabirka, wa gu, 'Ugomo Asere, ta ira we abani ta nya we imum yare, nani niwe ni myei ta nya we wa sa? ³⁸ Inu maya uni ta ira we ini genu me ti kabi we nani in bihurba ti sokiwe tirunga . ³⁹ Nani inu maya ini taa iri we uzo we uhuma, nani akura a nirere me ti eh ti iri we? ⁴⁰ Ba Ugomo ma di kabirka ma gun we, Kadure in boo shi vat imum be sa ya wuza unu inde sa i zi cing anyimo anuhenu, ya wuza mi mani ni.' ⁴¹ Abini ani ma di gu ina anu atari ti nan gure, cekini mi, a wunna shi anyo ribeni anyimo ura nan unu uburi sa a barka barki unu uburi nan ibe i kadura kame me. ⁴² Barki maa kunna ikomo daki ya nya ni mi imum yare ba. ma kunna niwe ni myei ya nya nimi masa ba. ⁴³ Maa zin nigenu daki ya kaba ni ba. Maa zi bihurba daki ya soki ni mi turunga ba. Ma wuzi ukoni daki ya aye ya gunkunom ba, ma ra anyimo akura a nirere daki ya iko in mi ba. ⁴⁴ Abini me cangi wa di gu, Ugomo Asere inu maya uni ta iri we in ukomo me, nani in niwe nimyei, nani in nigenu, nani inu zatu turunga, nani uzatu nihuma, nani akura a nirere daki ta iko in hu ba. ⁴⁵ Abini ma di kabirka, ma gun we, kadure, in boo shi, imum sa daki ya wuzi unu u cing unu age ba, daki ya mi ni ba.' ⁴⁶ Anu age me wa di ribe uzito uzatu umara, anu ariri wa di uvenke uzatu umarsa.''