9 ¹ مسیح دورون راس گوفتَأن دِرِم نه دوروغ، و می وجدان بواسطۀ روح القدس می شاهده ² کی می دیلِ دورون پیلِه دردی دَأرم و همیشه می دیلَ غم بیگیفته. ³ چره کی راضی بؤم، بنی اسرائیلِ وَسی کی می خویشَأند مسیح جَه محروم بوبوم، ⁴ اوشَأن اسرائیلی یِد و خدا پسرخواندگی و خدا جلالِ شراکت، و تمامی عهدَأن و وعده یَأن، و شریعتِ اَحکام و عبادتِ مراسم، همه اَشَأنَ بیسپارده بوبُسته. ⁵ خدا پیله مردَأکأن هم اوشَأنِ اَجداد بود، و مسیح اَصل و نسبِ انسانی، جی اوشَأنِ نسله. مسیحی کی جی همه بوجُرتره و اونِ وَسی تا اَبد خدایَ شُکر گوئیم. آمین ⁶ پس خدا، وعده یانی کی یهودیانَ بدَه بویَ عمل نوکوده؟ نه اَطو نییِه، چون خدا اَ وعده یانَ فقط کسانی یَ ندَه بو کی یعقوبِ نسلِ جَه یِد، بلکی اوشَأنی یَ فَأدَه بو کی راس راسی اسرائیلی ید، و هر کسی کی جی یعقوبِ نسل بیبِه، دلیل نیبِه کی اسرائیلی یِه واقعی بیبِه. ⁷ همۀ کسانی کی جی ابراهیمِ نسلد، اونِ حقیقی زَأکأن به حیساب نَأیِد، چونکی ابراهیم زَأکأنِ دیگری هم دَأشته، ولی خدا ابراهیمَ بفرماست: «نسلی کی من ترَه وعده بدَه دَأرم، جی اسحاقِ نسله» ⁸ اَن نیشان دِهِه کی همۀ ابراهیمِ زَأکأن خدا زَأی نییِد، بلکی فقط اوشَأنی خدا زَأی به حیساب اَیِد کی او نجاتِ وعده ایی یَ کی خدا ابراهیمَ بدَه بویَ ایمان بَأورد. ⁹ چون خدا ابراهیمَ بفرماسته بو:«سال دیگر هَ موقع وَأگردم و ساره پسری دَأره» ¹⁰ فقط اَ موضوع نییِه، بلکی «رِبِکا» هم اینفرِ جَه یعنی اَمی جدّ «اسحاقِ» جَه حامله بوبُست ¹¹ و پِشتر جی اونی کی اونِ دوقولویَأن بودونیا بَأیِد و پیشتر جی اونی کی اَ دو نفر بخَأید کارِ خوب یا بدی یَ انجام بدد، اَنِ وَسی کی خدا ایراده و خاست انتخابِ جَه اُستوار بیبِه، و به واسطۀ اونی بیبِه کی انسانَ دعوت کونه، نه جی راهِ اَعمال، ¹² رِبِکایَ بوگوفته بوبُست: «پیله پسر، کوچی پسرَ بندگی کونه» ¹³ هوطو کی کیتابِ مَلاکی دورون بینیویشته بوبُسته: «یعقوبَ دوس دَأشتم، ولی عیسو جَه مرَه بد اَمویِه» ¹⁴ پس چی بوگوئیم؟ آیا خدا بی انصافه؟ هیچموقع، ¹⁵ چره کی موسی یَ گویه:«هر کیَه بِخَأیم رَحم بوکونم رَحم کونم، و هر کیَه کی بِخَأیم دیلسوجی بوکونم، دیل سوجَأنم» ¹⁶ پس انسانِ خاسته و تلاشَ بستگی نَئره، بلکی خدایی یَ بستگی دَأره کی رَحم کونه. ¹⁷ چون کیتابِ مقدسِ خروجِ دورون خدا فرعونَ گویه: «ترَه اَنِ وَسی بوجور وُوکوشیم تا بواسطۀ تو می قدرتَ نیشان بِدِم و می نام، همۀ جهانِ میَأن پخشَه بِه» ¹⁸ پس هر کیَه بخَأیِه رحمت کونه و هر کیَه بخَأیه دیل سخت کونه. ¹⁹ پس مرَه گوئیدی:«پس دِ چره خدا اَمره مذمت کونه، چون کیِه کی بِتَأنه اونِ ایراده پِش تاب بَأوره؟» ²⁰ اما ای انسان، تو کیسی کی خدا جَه ایراد گیری؟ آیا کوزه، تَأنه کوزه گرَه بوگویه؛ چره مرَه اَطو چَأکودی؟ ²¹ آیا کوزه گر اختیار نَئره ایتَه گیلِ جَه، کارایِ مهمتره رِه ایتَه خُرمِه ظرف، و کارایِ معمولی ترِه رِه ایتَه معمولی ظرف چَأکونه؟ ²² چی شَه گوفتَأن، اگر خدا با اَنکی خَأیِه خو غَضَبَ نمایان و خو قدرتَ آشکارَ کونه، بازم بخَأیه صبرِ زیادِ اَمرَه کسانی یَ تحمل بوکونه کی اونِ خشمَ زیادَ کوده دَأرد و هلاکتَ سزاوارد، ²³ تا اَطو بتَأنه خو جلالِ عظمتَ، کسانی رِه آشکارَ کونه کی اوشَأنَ رحمت بوکوده و پیشتر جلالِ رِه آماده کوده دَأره؟ ²⁴ اون رحمت بوبُسته یان اَمَأنم ایسیم، اَمَأنی کی جی اونِ طرف دِخَأدِه بوبُسته دَأریم، نه فقط یهودیان، بلکی جی همۀ قومَأن و ملتَأن. ²⁵ هوطو کی هوشَع نبی کیتابِ دورون فرمایه:«اوشَأنی کی می قؤم نوبود، می قؤم دِخَأنم، و اوشَأنی یَ کی دوس نَأشتم، می عزیز بُد، ²⁶ و دوروست هو جایی کی اوشَأنَ بوگوفته بوبُست؛ شومَأن می قؤم نیئید، در هویَ اوشَأن زنده خدا، زَأکأن دِخَأدِه بِهِد» ²⁷ و اِشعیایِ نبی هم درباره اسرائیلِ قؤم نِدا دِهِه:«بنی اسرائیلِ قؤم حتی اگر دریا کنارِ فورشِ مَأنستَأن زیادَه بود، فقط بعضی جی اوشَأن نجات پیدا کوند، ²⁸ چره کی خدا خو حُکمَ انصافِ اَمرَه، توند و کامل زمینِ رو اِجرا کونه» ²⁹ هوطو کی اِشعیایِ نبی پیشگویی بوکوده بو:«اگر خدا یهودیانَ رَحم نوکوده بِه، همۀ اَشَأن شهرهایِ سدوم و غَمورَه مردمِ مَأنستَأن هلاکَ بوستد» ³⁰ پس نتیجه گیریم کی غیرِ یهودیانی کی عدالت و بی گوناهی دونبال نوبود، جی راهِ ایمان اونَ بدس بَأوردد، ³¹ ولی بنی اسرائیلِ قؤم کی هَمش شریعتِ دونبال بود تا اونِ انجام دَئَنِ مرَه، عادل و بی گوناه به حیساب بَأید، اونَ جی دس بِدَأد. ³² چی وَسی؟ چون جی راهِ اَعمالِ مذهبی انجام دَئَن اونِ دونبال بُد، نه جی راهِ ایمان. اون «لغزِشِ سنگ» باعث بوبُست کی اوشَأن بِکِفِد. ³³ هوطو کی اِشعیایِ نبی کیتابِ دورون بینیویشته بوبُسته: «بیدین، صیهونِ میَأن سنگی نِهِم کی مردم لیز خورد و اوشَأنِ کفتَأنَ باعث بِه، و صخره ای نِهِم کی اونِ جَه بیجیر کِفد، ولی هر کس اونَ ایمان بَأوره، هیچموقع پشیمان و شرمنده نیبِه»