10
1
ای برَأرَأن، من نأجِه دَأرم و همیشه خدا درگاهَ دوعا کونم کی اسرائیلِ قؤم نجات پیدا کونه.
2
من تَأنم شهادت بدِم کی اَشَأن خدا رِه غیرت و تعصب دَأرد، ولی اَ غیرت و تعصب، دَأنستن و شناختِ جَه نییِه.
3
چره کی راهی یَ کی خدا بواسطۀ اون راه، انسانَ خو حضورِ جَه عادل به حیساب اَوره، نشناختد و تلاش بوکودد خوشَأنِ راهَ عادل بوستَأنِ رِه دوروست نیشان بِدد، و هَنِه وَسی خدا عدالتِ تسلیم نوبوستد.
4
چونکی مسیح آخر، و شریعتِ تمام کننده یِه، هر کسی رِه کی اونَ ایمان بَأوره، و بواسطۀ هَ ایمان، او شخص خدا حضورِ جَه عادل به حیساب اَیِه.
5
موسی درباره او عدالتی کی جی شریعت بدس اَیِه، کیتابِ لاویانِ دورون نیویسه:«هر کی شریعتَ عمل بوکونه، بواسطۀ اون زندگی کونه»
6
اما دربارۀ عدالتی کی جی راهِ ایمان بدس اَیِه کیتابِ تثنیه میَأن گویه:«لازم نییِه کی آسمانَ بوجُر بیشید، و اویَ مسیحَ پیدا کونید و اونَ بیجیر بَأورید تا شومرَه یاری بِدِه»
7
و «لازم نییِه کی مُردگانِ عالمَه بیجیر بیشید تا مسیحَ زندَه کونید و بوجُر بَأورید،
8
چره کی نجاتی کی جی راهِ ایمان بدس اَیِه، هَ یَه براحتی اَمی دسِ پِش نَهَه، و تی دیل و زبانِ رو نَهَه» اَن هو ایمانِ پیامِ کی اَمَأن موعظه کونیم.
9
کی اگر تی زبانِ مرَه اِعتراف بوکونی کی «مسیح خداونده» و تی دیلِ میَأن ایمان بدَأری کی خدا اونَ مَردن پسِ رِه جی مُرده یان زندَه کوده دَأره، نجات پیدا کونی.
10
چون دیلِ میَأنِه کی شخص ایمان اَوره و عادل به حیساب اَیِه، و زبانِ مرَه یِ کی خو ایمانَ اِعتراف کونه و نجات پیدا کونه.
11
اِشعیایِ نبی کیتاب فرمایه: «هر کی اونَ توکل بوکونه، هیچموقع شرمنده نیبِه»
12
پس یهودی و غیرِ یهودی میَأن فرقی نِنَه، چون خدا ایتَه یِه و همه تَه خدایه، و خدا همۀ کسانی کی اونِ نامَ دِخَأندَه برکت دِهِه.
13
چون هر کی خدا نامَ دِخَأنِه و اونِ جَه کمک بِخَأیِه نجات پیدا کونه.
14
اما چوطو کسی نامَ دِخَأند کی اونَ ایمان نَأورده دَأرد؟ و چوطو کسی یَ ایمان بَأورد کی اونِ جَه چیزی نیشتَأوسته دَأرد؟ و چوطو تَأند بیشتَأود اگر کسی اوشَأنِ رِه موعظه نوکونه؟
15
و چوطو موعظه بوکوند، اگر اوسه نوبود؟ اِشعیایِ نبی کیتاب درباره اَ موضوع فرمایه:«چی خوش قدمد اوشَأنی کی بشارت اَورد و خُرمِه چیزانِ رِه مُژده دِهِد»
16
اما همه بشارتَ قبول نوکودد، چون اِشعیایِ نبی خودش گویه: «خداوندا، کیسه کی اَمی خبرَأنَ باور بوکوده بِه؟»
17
پس ایمان، جی پیامِ ایشتَأوستَأن بوجود اَیِه، و پیامَه اَطو تَأنیم بیشتَأویم کی مسیح کلامَ گوش بدیم.
18
اما وَأورسم: آیا ایمکان دَأره کی اوشَأن پیامَ نیشتَأوسته بِد؟ البته کی بیشتَأوستد، چون اوشَأنِ صدا همۀ جهانِ دورون و اوشَأنِ کلام دورترینِ جاهانَ فَأرِسِه دَأره.
19
بازم وَأورسم: آیا اسرائیلِ قؤم اونچی کی بیشتَأوستَه یَ درک نوکود؟ پیشتر جی همه موسی کیتابِ تثنیه میَأن گویه:«من شومرَه به غیرت اَورم بواسطۀ اوشَأنی کی حتی قؤم به حیساب نَأیِد، و بواسطۀ اون قؤمی کی درک و فهم نَئرِد شومرَه عصبانی کونم.»
20
بازن اِشعیایِ نبی هم جرأت کونه و گویه:«اوشَأنی کی می دونبال نوبود مرَه پیدا کودد، و خودمَ کسانی رِه کی می طالب نوبود آشکارَه کودم»
21
ولی در حقِ اسرائیلِ قؤم گویه:«همۀ روز می دَسانَ بازَه کوده دَأرم، و اَ قؤمِ نافرمان و گردنکشِ وَأگردستنِه رَأفأ ایسَم.»