7 ¹ ای برَأرَأن، شومَأن کی شریعتِ قوانینَ دَأنید و خبر دَأرید کی انسان تا وختی کی زنده یِه شریعتِ قانون، اونِ رو حُکم دَأره. ² مثلاً ایتَه زنی کی مرد دَأره، تا وختی کی اونِ مرد زنده یِه شریعتِ قانون گویه کی اون زن، خو مردَ تعلق دَأره، و اگر اونِ مرد بیمیره دِ اونموقع اون زن، جی تعهدِ شرعی کی نسبتِ به خو مرد دَأره آزادَه بِه. ³ هَنه وَسی یِ کی اگر موقعی کی اونِ مرد زنده یِه، ایتَه مردِ دیگر اَمرَه وصلت بوکونه زِناکار دِخَأده بِه، ولی اگر اونِ مرد بیمیره، دِ اَ قانون شاملِ اونِ حال نیبِه و اگر ایتَه مردِ دیگرِ اَمرَه ازدواج بوکونه، زِناکار به حیساب نَأیِه. ⁴ ای برَأرَأن، هَطو شومَأنم هَ وضعِ دورون ایسَأئید، شومَأن جزئی جی مسیحِ بَدنید کی نسبتِ به شریعت بِمِردِید و هَسَه کسی شینید کی مَردن پسِ رِه زندَه بوسته دَأره، و اونِ مرَه وصلت بوکوده اید تا خدا رِه ثمری بَأورید. ⁵ چون موقعی کی اَمَأن جسمِ طبیعتَ گرفتار بوئیم، گوناه کودَأنِ هَوس، کی شریعت هِی اونَ تحریک کوده اَمی وجودِ دورون عمل کوده تا مرگِ رِه ثمر بَأوریم. ⁶ ولی هَسَه دِ نسبت به اونچی کی اَمرَه بندگی دورون دَأشته بِمردِه ایم، و جی شریعتِ بند آزادَ بوسته دَأریم تا تازه راه میَأن، روح القدسِ اَمرَه خدایَ خدمت بوکونیم، نه پیشترَأنِ مَأنستَأن کی ایته سِری بینیویشته بوبُسته قوانینِ جَه ایطاعت کودیم. ⁷ پس چی بوگوئیم؟ آیا شریعت گوناهکاره؟ نه هیچموقع، اگر شریعت نِمَأنِستِه بِه من گوناهَ نشناختِم. اگر شریعت نوگوفته بِه کی «طمع نوکون»، من هیچموقع نَأنِستم کی طمع کودَأن چیسه. ⁸ ولی گوناه، شریعتِ اَ حُکم جَه سوء ایستفاده بوکود و فرصت پیدا کود تا هر جور طمعَ می دورون بوجود بَأوره، چره کی گوناه بدونِ شریعت ایته بِمِرده جسدَ مَأنه. ⁹ زمانی بیخبر جی شریعت من زنده بؤم، اما وختی شریعتِ حُکم بأمو، گوناه جان بیگیفت و زندَه بوست و من بِمردم. ¹⁰ هو حُکمی کی وَأستی مرَه به زندگانی راهنمایی بوکوده بِه، هون باعث بوبُست کی من بیمیرم. ¹¹ چون گوناه جی فرصتی کی حُکم بوجود بَأورده بو سوء ایستفاده بوکود و مرَه فریب بدَه و اَ کارِ اَمرَه، مرَه بوکوشت. ¹² پس شریعت خودش مقدسه، و شریعتِ اَحکام همه تَه مقدس و عادلانه و خوبد. ¹³ پس آیا خُرمِه چی، می مرگَ باعث بوبُست؟ نه به هیچ وجه، بلکی اَن گوناه بو کی ایتِه خُرمه چی جَه سوء ایستفاده بوکود و می مرگَه باعث بوبُست، پس دینیدی کی گوناه چقدر پست و شروره، و لعنتِ سزاواره چون خو هدف رِسِن وَسی، یعنی می نابودی رِه، خدا شریعت و اونِ مقدسِ اَحکامِ جَه سوء ایستفاده کونه. ¹⁴ اَمَأن دَأنیم کی شریعت روحانیه، ولی من انسانی نفسانیم و ایتَه برده مَأنستَأن گوناهَ بوفروخته بوبُستِم. ¹⁵ نَأنم چی کودَأن دِرِم، چره کی اونچی کی می دیل خَأیه یَ انجام نِدِهِم، بلکی شؤم اون کاری یَ انجام دِهِم کی اون کارِ جَه مرَه بد اَیِه. ¹⁶ وختی کاری کونم کی نخَأیم انجام بِدِم، اَن نیشان دِهِه کی من شریعتِ دوروستی یَ قبول دَأرم. ¹⁷ پس واقعاً من نییِم کی اون کارَه کودَأن دِرِه، بلکی گوناهی ایسه کی می دورون سامان دَأره. ¹⁸ دَأنم کی می دورون، یعنی می نفسانی طبیعتِ دورون، جایی خوبی رِه نِنَه، چون هر چن دوس دَأرم کی اَعمالِ خوب انجام بدم، ولی اونِ انجام دَئَنِ قوّتَ نَئرم، ¹⁹ چون اون خُرمه کاری کی خَأیم انجام بدَمَه انجام نِدِم، ولی اَعمالِ بدی کی نِخَأیمَه انجام دِهِم. ²⁰ پس اگر کاری کی نِخَأیمَه انجام دِهِم، در حقیقت او کارَ من نوکودَأن دِرِم، بلکی گوناهی کودَأن دِرِه کی می دورون سامان بیگیفته. ²¹ پس فهمم کی اَ ایته قانونِ کی من هر وخت خَأیِم خُرمِه کار انجام بِدم، فقط می جَه شرارت سر زنه. ²² خدا شریعتِ جَه قلباً لذت بورم، ²³ ولی دینم ایتَه قانونِ دیگر می بدنِ اعضاء رو حُکم کونه، و قانونِ شریعت کی می فکر اونَ قبول دَأره اَمرَه جنگ کودَأن دِره، و مرَه گوناه اسیر بوکوده و می بدنِ اعضایَ فرمان دِهِه. ²⁴ من چه آدم بدبختی ایسم، اَ بدن مرَه مرگِ طرف فَأکِشَأن دره، کیِه کی بتَأنه مرَه جی اونِ دس خلاصَ کونه؟ ²⁵ خدایَ شُکر کونم کی اَمی خداوند عیسی مسیح اَ کاره بوکوده دَأره. خلاصه با اَنکی می جسم گوناه شریعتَ بندگی کونه، ولی من می عقلِ مرَه، خدا شریعتَ بندگی کونم.