6 ¹ پس چی بوگوئیم؟ آیا وأستی هَطو گوناه بوکونیم تا خدا فیض زیادَه بِه؟ ² نه هیچموقع، اَمَأن کی نسبتِ به گوناه بِمِردیم، چوطو تَأنیم بازم اونِ دورون زندگی بوکونیم؟ ³ آیا نَأنید کی همۀ اَمَأن کی عیسی مسیح مُتحد بوستَأنِ اَمرَه غُسلِ تعمید بیگیفته دأریم، اونِ مرگِ دورون هم تعمید بیگیفتیم؟ ⁴ پس اَمی تعمید گیفتنِ اَمرَه، اونِ مرَه دفن بوبُستیم و اونِ مرگِ دورون شریک بوبُستیم، تا هوطو کی مسیح بواسطۀ پئرِ جلال، جی مُرده یان ویریزانِه بوبُست، اَمَأنم ایتِه تازه زندگی یَ شروع بوکونیم. ⁵ پس اگر اَمَأن ایته مرگِ دورون، اونِ مرگِ مَأنستَأن اونِ اَمرَه ایتَه بوبُستیم، مطمئن بیبید کی ایتِه قیام دورون اونِ قیامِ مَأنستَأن، اونِ اَمرَه ایتَه بیهیم. ⁶ چون اَنَ دَأنیم کی اون آدمی کی پِشتر بوئیم، مسیح مرَه صلیبِ رو بِمِرد تا اَمی گوناهکارِ نفس، نابودَ بِه، و دِ اَمَأن گوناه بنده نیبیم. ⁷ چون کسی کی بِمِرد، جی گوناه آزادَه بوسته دَأره. ⁸ پس هر وخت مسیح مرَه بِمردیم، ایمان دَأریم کی همیشه اونِ مرَه زندگی کونیم. ⁹ چون دَأنیم کی مسیح جی مُرده یان ویریشته دَأره و دِ هیچموقع نیمیره و مرگ اونِ رو قدرتی نَئره. ¹⁰ مسیح بِمِرد و ایبار همیشه رِه نسبتِ به گوناه بِمرد، بأزن اون زندَه بوست، و دِ تا اَبد خدا رِه زندگی کونه. ¹¹ هَطو شومَأنم خودتانَ نسبتِ به گوناه بِمرده، و اتحادِ مسیح مرَه خودتَأنَ نسبتِ به خدا زنده بدَأنید. ¹² پس وَأنَألید گوناه شیمی بدنهای فانی دورون فرمان بده تا کی اونِ هَوسانَ ایطاعت بوکونید. ¹³ شیمی بدنِ اعضاء یَ گوناهَ تسلیم نوکونید کی شرارتِ اَبزار بوبود. بلکی کسانی مَأنستَأن کی جی مرگ به زندگی وَأگردسته دَأرد بیبید و خودتَأنَ خدایَ تسلیم بوکونید، و شیمی بدنِ اعضایَ اونَ بیسپارید تا خدا رِه عدالتِ اَبزار بیبه. ¹⁴ نوَأستی گوناه شیمی وجودَ حاکم بیبِه، چره کی شریعتِ دورون نِئسَأئید، بلکی فیضِ دورون ایسَأئید. ¹⁵ پس چی بوگوئیم؟ اجازه دَأریم گوناه بوکونیم چون شریعتِ دورون نِئسَأئیم و فیضِ دورون ایسَأئیم؟ نه، هیچموقع، ¹⁶ آیا نَأنید کی هر موقع خودتَأنَ ایتَه غلامِ مَأنستَأن اینفرِ اختیار بنید و اونِ جَه ایطاعت بوکونید، او نفری کی اونِ فرمانَ بوردَأن دأریدِه بنده بیهید، هَسَه خَأیِه گوناه بنده بیبه کی اونِ عاقبت مرگِه، یا خدا ایطاعتِ بنده کی اونِ عاقبت بی گوناهی یه. ¹⁷ اما خدایَ شُکر کی اگر چی پیشترَأنِ رِه گوناه بنده بوئید، ولی هَسَه تمامی یِ دیلِ اَمرَه تعلیمی کی شومرَه فَأدَه بوبُسته جَه ایطاعت کونید. ¹⁸ و گوناه بندگی جَه آزادَ بوسته و بی گوناهی مطلقِ بنده بوبُسته دَأرید. ¹⁹ شیمی ضعفِ انسانی وَسی، اَ گبَأنَ میثالای ساده مرَه شومرَه گویم تا درک کودَأن شومره آسانتر بیبِه، هوطو کی پیشترَأن گوناه کودَأنِ رِه شیمی بدنِ اعضایَ نجاستِ بنده کودید و شرارتَ ایسپاردید، هَسَه هم شیمی بدنِ اعضایَ عدالتِ بنده بوکونید و بی گوناهی یَ بیسپارید، تا مقدسِ اَعمالِ انجام دَئَنِ رِه بکار بَأیه. ²⁰ وختی گوناه بنده یان بوئید عدالتِ جَه آزاد، و مجبور نوبوئید کی خوبی جَه ایطاعت بوکونید. ²¹ اونموقع جی انجام دَئَنِ کارایی کی هَسَه اوشَأنِ جَه شرمنده اید چی سودی بوبوردید؟ اون کارانِ عاقبت مرگه. ²² اما هَسَه کی گوناه جَه آزاد و خدا بنده یان بوبُسته دَأرید، سودی کی بورید زندگی پور جی پاکیه کی اونِ عاقبت، زندگانی اَبدیِه. ²³ چون کسی کی گوناه کونه اونِ دستمُزد مرگه، ولی کسانی کی اَمی خداوند عیسی مسیح اَمرَه مُتحد بود، خدا اوشَأنَ زندگانی اَبدی عطا کونه.