5 ¹ پس چون جی راهِ ایمان عادل محسوب بوبُستیم، به واسطۀ اَمی خداوند عیسی مسیح اَمَأن و خدا میَأن صلح برقرار بوبُست، ² اَمَأن بواسطۀ عیسی مسیح و جی راهِ ایمان، فیضی یَ دس پیدا کودیم کی هَسَه اونِ میَأن اُستواریم و اُمید دَأریم کی خدا جلالِ دورون هم شریک بیبیم، و هَنِه وَسی افتخار کونیم. ³ فقط هَنِه وَسی افتخار نوکونیم، بلکی سختیانِ میَأنم افتخار کونیم، چره کی دَأنیم سختیان صبرَ به بار اَوره، ⁴ و صبر شخصیتَ چَأکونه، و شخصیت باعثِ اُمید بِهِه. ⁵ اَ اُمید باعث نیبِه کی اَمَأن سر بیجیر بیبیم، چره کی خدا بواسطۀ روح القدس اَمی دیلَ خو عشق و محبتِ جَه پورَه کوده دَأره. ⁶ ونموقع کی همۀ اَمَأن درمانده و ذلیل بوئیم، دوروست در موقعی کی خدا مشخص بوکوده بو مسیح بأمو، و بی دینانِ وَسی خو جانَ فدا بوکود. ⁷ کم پیدا بِهِه کسی کی حاضر بیبِه، حتی ایته بی گوناه وَسی خو جان جی دس بِدِه، هر چن ایسَأ کسی کی شهامت بدَأره ایتَه خُرمه آدم وَسی خو جانِ جَه بوگذره. ⁸ ولی خدا خو محبتَ اَطو اَمرَه ثابت بوکود، کی وختی اَمأن هنوز گوناهکار بوئیم، مسیح اَمی وَسی بِمرد. ⁹ هَسَه کی اونِ خونِ وَسی اَمأن عادل به حیساب بأموئیم، خودشِ اَمرَه چقد ویشتر خدا غضبِ جَه نجات پیدا کونیم. ¹⁰ وختی اَمَأن خدا مرَه دوشمن بوئیم، اون خو پسرِ مرگِ اَمرَه، اَمی دوشمنی یَ به دوستی تبدیل بوکود. پس هَسَه کی اونِ اَمرَه دوستیم و عیسی مسیح اَمی دیلِ میَأن زندگی کونه چقد ویشتر اَمی نجاتَ باعث بِه، ¹¹ و فقط هَن نییِه، بلکی جی رابطه ای کی خدا مرَه دَأریم هم افتخار کونیم، همۀ اَشأن بواسطۀ اَمی خداوند عیسی مسیح بوجود بأمو کی اَمرَه خدا مرَه آشتی بدَه دَأره. ¹² گوناه بواسطۀ ایته انسان بأمو جهانِ میَأن، و اَ گوناه مرگَ خو مرَه بَأورد. و چون همه گوناه بوکودد، هَنِه وَسی مرگ، همه تَه انسانانَ بیگیفت. ¹³ پیشتر جی شریعت هم دونیا میَأن گوناه نَهَه بو، ولی چون شریعت نِنَه بو اِنسانانِ رِه گوناه به حیساب نَأمویِه. ¹⁴ ولی بازم جی آدم تا موسی، همۀ مردمِ رو مرگ حاکم بو، حتی اوشَأنی رو کی آدمِ اَقدر خدا جَه نافرمانی نوکوده بود. آدم، نمونۀ اون کسی ایسِه کی قرار بو بأیِه. ¹⁵ ولی اَ دو نفر همدیگرِ مَأنستَأن نییِد و آدمِ گوناه و خدا بخششَه، نِشَه همدیگرِ اَمرَه مقایسه کودَأن. دوروسته کی اینفرِ خطا وَسی خیلیان بِمِردد، ولی چقد ویشتر خدا فیض و اون بخششی کی بواسطۀ فیضِ ایته انسان، یعنی عیسی مسیح فراهم بوبُسته دَأره، به فراوانی خیلیانِ دسرس قرار بیگیفته. ¹⁶ نِشَه خدا اَ بخششَ، اینفر، یعنی «آدمِ» گوناه نتیجه اَمرَه مقایسه کودَأن. چره کی اونِ نافرمانی وَسی، مکافات نازل و انسان محکوم بوبُست، ولی اَن همه نافرمانی و خطا بوکوده پس، خدا بخشش باعث بوبُست انسان عادل و بی گوناه به حیساب بَأیِه. ¹⁷ اگر ایتَه انسانِ وَسی و اونِ نافرمانی رِه مرگ انسانانِ سرنوشت رو حاکم بوبُست، چقدر ویشتر زندگی دورون حکومت کوند، کسانی کی بواسطۀ عیسی مسیح، خدا فیضِ بی انتها و اونِ عدالتِ عطایَ دریافت بوکوده دَأرد. ¹⁸ پس هوطو کی ایتَه خطا و نافرمانی همۀ انسانانِ محکومیتَ باعث بوبُست، ایتَه کار کاملاً صالح هم باعث بوبُست همه انسانان بی گوناه به حیساب بَأیِد، و همه تَه یَ زندگی بِبِخشِه. ¹⁹ چون هوطو کی ایتَه انسانِ خطا وَسی، خیلیان گوناهکار بوبُستد، ایتَه انسانِ ایطاعت کودَأنِ وَسی هم، خیلیان بی گوناه به حیساب اَیِد. ²⁰ پس شریعت انسانِ نجاتِ رِه چی بوکود؟ شریعت اَن وَسی عطا بوبُست تا مردم بفهمد کی تا چی حد خدا احکامَ پامالَ کوند، ولی هر جایی کی گوناه زیادَ بوست، خدا فیض و بخشش هم خیلی اونِ جَه ویشترَ بوست. ²¹ پس هوطویی کی گوناه مرگِ دورون حکومت بوکود، هوطو هم خدا فیض عدالتِ دورون حکومت کونه، و بواسطۀ اَمی خداوند عیسی مسیح، اَمرَه به زندگانی اَبدی هدایت کونه.