92 ¹ خداوندا ترَه شُکر کودَأن چقدر خوبه، ای خدایِ مُتعال تی نامِ رِه سرود خَأدن و ستایش کودَأن. ² صبح ئان تی محبتَ وَسی ترَه شکر کونیم و هر شب تی وفاداری به یاد اَوریم. ³ ترَه سازِ دَه تارِ و بربطِ نغمه اَمرَه، پرستش کونیم. ⁴ چره کی ای خداوند خودتِ کارایِ عجیبِ اَمرَه مرَه خوشحالَ کوده ایی، تی دسِ اَعمالِ رِه شادی کونم و سرود خَأنم. ⁵ ای خداوند، تی اَعمال چی عظیمه و تی فکران چقدر عمیق. ⁶ وحشی مردای اَن درک نوکونه و جاهل اونِ معنی یَ نفهمه. ⁷ هر چند شروران هرز علفِ مَأنستَأن زیادَ بود، و بدکاران همیشه خوشَأنِ کارانِ میَأن موفق بهد، ولی آخرسر همیشه رِه جی میَأن شُد و هلاکَ بود. ⁸ ولی تو ای خداوند، جی همه بوجُرتری و تا اَبدالآباد مُتعالی. ⁹ چره کی تی دوشمنان ای خداوند، بله تی دوشمنان ای خداوند، همه هلاکَ بود و همۀ شروران پراکندَه بود. ¹⁰ تو مرَه ایتَه وحشی گاوِ مَأنستَأن قوی بوکوده ای و تازه روغنِ اَمرَه مَسح بوبُسته دَأرم. ¹¹ می چومَأنِ مرَه می دوشمنانِ شکستَ بیدم، و می گوشَأنِ اَمرَه شریرانی کی می مرَه مخالف بودِه، فریادِ صدایَ بیشتَأوستم. ¹² دوروستکاران نخلِ مَأنستَأن ثمر دهد و لبنانِ سروِ دارِ مَأنستَأن رشد کوند. ¹³ اوشَأنی کی اَمی خداوندِ خانه دورون بِکاشته بوبُسته دَأرد، اَمی خدایِ صحنِ دورون شکوفه دهد. ¹⁴ اوشَأن پیری اَیام هم میوه اَورد و تروتازه و سرسبز مَأند. ¹⁵ و اعلام کوند کی خداوند عادله. اون می تکیه گاهه و اونِ میَأن هیچ بی انصافی ایی وجود نَئره.