83
1
خدایا، ساکت نِئس، ای خدا تو آرام و قرار نیگیر،
2
چون تی دوشمنان شورش بوکودد و اوشَأنی کی تی جَه نفرت دَأرد، خوشَأنِ سرَ راستَ گیفتد و مغرور بوبُستد دَأرد.
3
مخفیانه بر ضّدِ تی قؤم نقشه کشد و اوشَأنی کی ترَه پناه اَوردِ رِه توطئه دیچیند.
4
اوشَأن گوید: بأئید اَشَأنَ هلاکَ کونیم تا دِ قؤمی نمَأنه و اسرائیلِ نام همیشه رِه محوَه بِه.
5
اوشَأن همه تَه همدست بوبُسته دَأرد و همدیگرِ اَمرَه عهد دوَستد و بر ضدِ تو توطئه بوکودد.
6
اشَأن، اَدومیان و اسماعیلیان و موآبیان و هاجریان و
7
جِبالِ مردم و عَمّون و عَمالیق و فلسطینیان و صورِ مردمد.
8
آشور هم اَشَأنِ اَمرَه متحد بوبُسته و جی عمونیان و موآبیان حمایت کونه و اوشَأنِ رِه بوبُسته دَأره دسِ قوّت.
9
اَشَأنِ اَمرَه هو کاری یَ بوکون کی مِدیانِ اَمرَه بوکودی، هو بلایی کی رودخانۀ قیشونِ ورجَه سیسِرا و یابینِ سر بأوردی اَشَأنِ سرم بأور.
10
چوطو اوشَأنَ «عِین دورِ» جَه هلاکَ کودی و اوشَأنِ جنازه یان اَقدر زمینِ رو بمَأنست تا خاک بوبُست.
11
اوشَأنِ پیله کسانِ آخرعاقبتَ عُرب و ذِئِب مَأنستَأن چَأکون و اوشَأنِ فرمانده یانَ «زِبَح» و «صَلمونَّع» مَأنستَأن هلاکَ کون.
12
اَشأن هون کسانی بود کی گوفتد: بأئید خدا سرزمینانَ بیگیریم تا اَمی شین بیبه.
13
خدایا، اَشَأنَ غبارِ مَأنستَأن پراکندَه کون و کلوشِ مَأنستَأن فَأدن بادِ دس.
14
چوطو آتش جنگلَ سوزَأنه و کوه هانَ شعله ور کونه،
15
اَشَأنَ تی غضبِ توندِ بادِ اَمرَه دورَ کون و خودتِ طوفانِ اَمرَه اَشَأنَ آشفتَه کون.
16
ای خداوند، چنان اَشَأنَ ذلیل و شرمنده بوکون تا تی نامَ التماس بوکوند.
17
بدَه همیشه رِه رسوا و پریشان بوبود و خواری و ذلتِ مرَه هلاکَ بود.
18
و بفهمد تو کی تی نام یَهوَه یه، تنها حاکم، و همۀ زمینِ رو مُتعالی.