82 ¹ خدا خو آسمانی دادگاه میَأن ایسَه، اون قاضیانَ محاکمه کونه. ² تا کِی بی اِنصافی اَمرَه قضاوت کونید و شریرانِ جَه طرفداری کونید؟ ³ بیچاره یان و یتیمانِ حقِ جَه دفاع بوکونید، مظلومان و فقیرانِ مرَه انصافِ اَمرَه رفتار بوکونید. ⁴ مظلومان و فقیرانَ آزادَ کونید، اوشَأنَ شریرانِ دسِ جَه خلاصَ کونید. ⁵ هیچی نَأند و هیچی نفهمد، تاریکی میَأن راه شُد، هَنه وَسی زمینِ میَأن عدل و انصاف جی میَأن بوشو دَأره. ⁶ من بوگوفتم شومَأن «خدایانید» و شمرَه «خدایِ مُتعالِ زَأکأن» لقب بدَم. ⁷ ولی شومَأنم آدمایِ دیگرِ مَأنستَأن میرید و دیگر رهبرانِ مَأنستَأن جی اَ دونیا شید. ⁸ خدایا، ویریز و جهانَ داوری بوکون، چره کی همۀ قؤمَأنِ اختیار تی دس نَهه.