66 ¹ ای زمینِ مردمان، همه تَه خدا رِه جی شادی فریاد بوکونید. ² اونِ نامِ پور جلالَ ستایش بوکونید و اونِ عظمتِ جَه تعریف بوکونید. ³ خدایَ بوگوئید: تی کاران چی عجیبه، تی عظیمِ قدرتِ وَسی تی دوشمنان جی ترس ترَه تسلیم بود. ⁴ همۀ زمین ترَه پرستش کوند و ترِه سرود خَأند و تی نامَ ستایش کوند. ⁵ بأئید خدا کارانَ فَأندرید، بیدینید چی کارایِ عجیبی انسانانِ رِه انجام بدَه دَأره. ⁶ اون دریایَ خوشکَ کود و اَمی اَجداد خوشَأنِ پا مرَه پیاده اونِ میَأنِ جَه دوارستد، اوشَأن اَ کاری کی خدا اوشَأنِ رِه بوکود، خدا وَسی شادی بوکودد. ⁷ اون خو قدرتِ اَمرَه همیشه رِه سلطنت کونه و اونِ چومَأن اُمتانَ پَأیِه، ای مردمِ سرکش بر علیه اون قیام نوکونید. ⁸ ای قؤمَأن اَمی خدایَ ستایش بوکونید، وَألید شیمی ستایشِ آواز بیشتَأوسته بیبه. ⁹ اون اَمرَه زنده دَأره و وَأنَأله کی اَمی پا لغزش بوخوره. ¹⁰ ای خدا تو اَمرَه امتحان بوکودی، نُقره ای مَأنستَأن کی کوره میَأن تَأوَأدد تا پاکَ بِه، تو اَمرَه آزمایشِ کوره میَأن تَأوأده ایی تا پاکَ بیم. ¹¹ اَمرَه دامِ میَأن گرفتارَ کودی و بارایِ سنگین اَمی دوشِ رو بنَأیی. ¹² اَمی دوشمنانَ اَمی رو مُسلط بوکودی و وَأهَأشتی آب و آتشِ جَه دوَأریم، ولی آخرسر اَمرَه بأوردی ایتَه خُرمه سرزمینِ دورون. ¹³ تی خانه رِه قربانی سوختنی اَورم و خودمِه نذرانَ اَدا کونم. ¹⁴ وختی سختی موقع نذر بوکوده بؤم، همه تَه یَ اَدا کونم. ¹⁵ من گوساله یان و بُزانَ و گوسفندانِ پروار ترِه قربانی کونم، و همه یَ تی مذبحِ رو سوزَأنم تا اوشَأنِ دود به آسمان فَأرسه. ¹⁶ ای همۀ خداترسان بأئید و بیشتَأوید تا اونچی کی اون مرِه بوکوده دَأره یَ شمرِه نقل بوکونم. ¹⁷ فریاد بوکودم و اونِ جَه یاری بخَأستم و اونَ ستایش بوکودم. ¹⁸ اگر گوناهَ می دیلِ میَأن بدَأشتِه بِم خداوند می دوعایَ نیشتَأوسته. ¹⁹ ولی خدا می دوعایَ بیشتَأوست و اونَ اجابت بوکود. ²⁰ خدایَ شُکر کونم چون می دوعایَ بی جواب ننَه و خو رَحمتَ می جَه دریغ نوکود.