65 ¹ خدایا، شایسته ایسه کی ترَه صَهیونِ میَأن ستایش بوکونیم و اونچی کی نذر بوکوده ایمَه اَدا بوکونیم. ² ای کی دوعایانَ ایشتَأوی، همۀ آدمان تی ورجَه اَید، ³ اونموقع کی اَمی گوناهان اَمی رو سنگینی کونه، تو اَمی تقصیراتِ رِه کفاره کونی. ⁴ خوش به حال اون کسی کی تو اونَ انتخاب بوکوده ای تا بَأیه و تی مقدسِ خیمه دورون ساکن بیبه، اَمَأن جی همۀ خُرمه چیزایی کی تی مقدسِ خیمه دورون نَهه سِئرَ بیم و اونِ برکاتِ جَه بَهره بوریم. ⁵ کارای ترسناک و عادلانه مرَه اَمرَه نجات دهی، ای خدایی کی اَمی نجاتی، تو همۀ دونیا مردمِه رِه اُمید و پوشت و پناهی. ⁶ تو تی قوّتِ اَمرَه کوه هانَ قائمَ کوده ایی و خودتِ قدرتِ عظیمَ نیشان بدَه ایی. ⁷ تو دریا موجَأنَ آرامَ کونی، تو موجِ غُرش و مردمِ شورشَ آرامَ کونی. ⁸ همۀ زمینِ مردم تی مُعجزه یانِ جَه حیراند، جی مغربِ مردم تا مشرقِ مردم، همه تی کارایِ عجیبِ وَسی شادی کوند. ⁹ تو زمینَ نظر تَأوَأدی، اونِ رِه باران اوسه کونی تا اونَ آبیاری بوکونی کی محصول بأوره، رودخانه یانَ پور جی آب کونی، مردمِ وَسی زمینَ جی محصولات بارور کونی. ¹⁰ و اونِ شیارانَ سیراب کونی و بلندی یانَ هموار، زمینَ بارانِ اَمرَه نرمَ کونی و محصولاتَ برکت دهی. ¹¹ تی لطفِ وَسی زمین محصول فراوان بأورده و همۀ جهان تی نعمتانِ جَه لبریزَ بوسته. ¹² صحرایان پورَه بوسته دَأرد و تپه یان پور جی شادید، ¹³ چراگایان گاو و گوسفندانِ اَمرَه قشنگَ بوستد و دشتان پور جی محصولد، همه خوشی جَه فریاد زند و همدیگرِ اَمرَه سرود خَأند.