49
1
ای همۀ قؤمَأن اَنَ بیشتَأوید. ای جهانِ مردمان گوش بوکونید.
2
ای ای عوام و ای خواص، ای فقیر و ثروتمند.
3
می زبان حکمتِ جَه گب زنه و می دیلِ فکرِ جَه فَهم جاریه.
4
مثلأنَ توجه کونم و وختی چنگ نواختن درم اونِ معنی یَ گویم.
5
چره مصیبتِ روزانِ دورون ترسان بوبوم؟ یا موقعی کی دوشمنان مرَه محاصره بوکوده دَأرد.
6
اَشَأن مردمی ایسد کی خوشَأنِ ثروتَ توکل دَأرد و خوشَأنِ مال و اموالِ فراوانی یَ افتخار کوند.
7
هیچ وخت کسی نِتَأنه خو برَأرِ جانِ کفاره یَ فَأده و نتَأنه اونِ خونِ قیمتَ خدایَ پرداخت بوکونه.
8
چره کی ایتِه آدم جانِ کفاره خیلی گرانه و هیچ قیمتی کافی نیه
9
تا کسی تا اَبدالآباد زنده بمَأنه، و مرگ و فسادَ نیدینه.
10
همه دینیم کی حتی حکیمانم میرد و هَطو جاهلان و اَبلهانم میرد، همۀ اَشَأن خوشَأنِ ثروتَ وارثانِ رِه باقی نِهد.
11
اوشَأن فکر کوند کی اوشَأنِ خانه یان دائمی و همیشگی یه، هَنه وَسی خوشَأنِ نامَ نهد خوشَأنِ خانه یان و زمینانِ رو.
12
ولی حُرمت و مقام آدمَ مرگِ جَه نجات نده، بلکی آدمانم حیوانانِ مَأنستَأن میرد.
13
اَ کسانی سرنوشته کی خودشانَ توکل دَأرد و هَطو کسانی سرنوشت کی اَجور اشخاصِ جَه پیروی کوند.
14
اوشَأن گوسفندانی یَ مَأند کی مرگَ محکوم بوبُستد و اوشَأنِ چوپان مرگه، صبحِ موقع دوروستکاران اوشَأنَ شکست دهد و اوشَأنِ جسد قبرِ میَأن پوسِه به دور از اوشَأنِ کاخان.
15
ولی خداوند می جانَ مُرده یانِ عالمِ جَه نجات دِهه.
16
پس وختی بیده ای کسی مال و اَموال، و اونِ خانه شکوه زیادَه بوست، آشفته نوبون،
17
چره کی وختی بیمیره، چیزی خو اَمرَه نوبوره و اونِ دارایی اونِ دونبال سر قبرِ دورون نیشه.
18
هر چقدم اون خو زندگی دورون خوشبخت بیبِه و مردم اونِ موفقیتِ وَسی اونِ جَه تعریف بوکوند،
19
ولی بازم آخر سر میره و شِه خو اَجدادِ ورجَه و دِ هیچموقع نورَ نیدینه.
20
ثروت و مقام کسی یَ مرگِ جَه نجات نده و آخر سر اونم حیوانانِ مَأنستَأن میره.