44 ¹ ای خدا من می گوشِ اَمرَه بیشتَأوستم و اَمی پئرَأن اَمرِه تعریف بوکودد کی تو قدیمِ اَیامِ موقع چی عجیبِ کارانی بوکوده ایی. ² تو خودتِ دسِ اَمرَه دیگر قؤمَأنَ جی اَ سرزمین بیرونَ کودی و خودتِ قؤمَ اوشَأنِ سرزمینِ میَأن سامان بدَأیی. تو اون قؤمأنَ جی میَأن بوبوردی ولی خودتِ قؤمَ همه جا پخشَ کودی. ³ تی قؤم خوشَأنِ شمشیرِ اَمرَه نتَأنستد اَ سرزمینَ بیگیرد و اوشَأنِ دسِ قوت اوشَأنَ نجات ندَه، بلکی تی راستِ دسِ و تی بازو و اطمینانی کی تی حضورَ دَأشتد اوشَأنَ نجات بدَه، چره کی اوشَأنِ جَه راضی بویی. ⁴ ای خدا تو می پادشاهی، به حقِ یعقوب به اَمی پیروزی حُکم بوکون. ⁵ تی کمکِ اَمرَه اَمی دوشمنانَ شکست دهیم و تی نامِ اَمرَه اَمی بدخواهانَ پامالَ کونیم. ⁶ نه می تیروکمانَ توکل کونم و نه می شمشیرَ کی مرَه نجات بده، ⁷ چره کی اَن تو بویی کی اَمرَه اَمی دوشمنانِ دسِ جَه خلاصَ کودی و اَمی بدخواهانَ شکست بدَأیی. ⁸ اَمَأن همیشه اَمی خدایَ افتخار کونیم و تی نامَ تا اَبد ستایش کونیم. ⁹ ولی هَسَه تو اَمرَه فیشَأده ایی و رُسوا بوکوده ایی و اَمی لشکرانِ کمک نَأیی. ¹⁰ و اَمرَه اَمی دوشمنانِ پِشِ جَه فراری بدَأیی و اوشَأن اَمی مال و اموالَ غارت بوکودد. ¹¹ اَمرَه گوسفندانِ مَأنستَأن اوسه کودی کوشتارگاه و اَمرَه اُمتانِ میَأن پراکندَه کودی. ¹² تی قؤمَ ارزان بوفروختی و اوشَأن ترِه ارزشی نَأشتد. ¹³ همساده یانِ ورجَه اَمرَه خار و خفیف بوکودی، اوشَأن اَمرَه توهین کوند و خندَه گیفته دَأرد. ¹⁴ اَمرَه اُمتای دیگرِ میَأن اَنگوشت نما بوکوده ایی، اوشَأن اَمرَه مسخره کوند. ¹⁵ هر روز می دوشمنانِ تُهمتانِ وَسی خجالت زده بوم و همیشه می سر بیجیره، ¹⁶ می بدخواهانِ فُحش و ملامتانِ وَسی، رسوا و شرمنده یم. ¹⁷ همۀ اَ اتفاقان اَمی سر بأمو ولی ترَه فراموشَ نوکودیم و اون عهدی کی اَمی اَمرَه دوسته بوئی یَ جی خاطر نوبوردیم.